طالباننینگ بلخده یاردم ترقهتیلیشیگه ارهلشووی؛ محتاج عیاللر یاردم آلیشدن محروم بۉلماقده
نیما
بلخ ولایتی مرکزی مزارشریف شهریدهگی منبعلر طالباننینگ ارهلشووی و محتاجلر اوچون مۉلجللنگن تشکیلاتلر یاردمینینگ تالان-تاراج قیلینیشیدن جدّی خواطر بیلدیرماقده. اولرنینگ اَیتیشیچه، عیاللرگه تیکووچیلیک، هنرمندچیلیک و باشقه کسبلر بۉییچه تعلیم آلیش و ایشلش امکانیتینی یرهتیب بېرهیاتگن اَیریم یاردم تشکیلاتلری رۉیخطیگه طالبان اعضالرینینگ اکثریتی اۉز عایله اعضالرینی کیریتماقده و بو یاردملر محتاجلرگه یېتیب بارمهیپتی. اولرنینگ سۉزلریگه کۉره، تعلیم و اۉقیشدن چېتده قالگن عیاللر و قیزلر اوشبو کسبلرنی اۉرگنیشدن هم محروم بۉلماقده.
مزارشریف شهرینینگ اَیریم حدودلریدهگی محلی منبعلرنینگ تاکیدلشیچه، عیاللر و قیزلرگه تیکووچیلیکنی اۉرگهتهدیگن و اونینگ جهازلرینی تامینلهیدیگن تشکیلاتلر تامانیدن بېریلهدیگن یاردملرنینگ اکثریتی طالبان اعضالری و محله آقسقاللری تامانیدن تقسیملنیب، حقیقی محتاجلرگه یېتیب بارمهیپتی.
اَیریم عیاللرنینگ اَیتیشیچه، طالبان اعضالری یاردملرنی تالان-تاراج قیلیش و اولرنی تقسیملش جریانیگه ارهلشیشده کېنگ کۉلمده اشتراک اېتماقده همده بیران بیر ساحهده فعالیت یوریتماقچی بۉلگن هر قندهی تشکیلات طالبان تامانیدن توصیه اېتیلگن شخصلرنی بیرینچی اۉرینگه قۉیهدی. اولرنینگ سۉزلریگه کۉره، حتا اَیریم حاللرده طالبان اعضالری آدملرنی یاردم آلووچیلر رۉیخطیگه کیریتیب، کېین اېسه اولر آلگن یاردمنینگ یریمینی اۉزلری اوچون آلیب قۉییشهدی.
بو عیاللرنینگ بیلدیریشیچه، طالبان اَیریم شخصلرگه، اینیقسه محتاج عیاللرگه، اولرنینگ اسملرینی یاردم آلووچیلر رۉیخطیگه کیریتیشگه وعده بېرهدی؛ اما بونینگ عوضیگه یاردمنی آلگندن سۉنگ اونینگ یریمینی طالبان اعضالریگه قَیتریب بېریشنی طلب قیلهدی.
عیاللردن بیری شوندهی دېیدی: «تشکیلاتلر عیاللر اوچون تیکووچیلیکنی اۉرگنیش امکانیتینی یرهتیب بېرهدی. اوّلا، محله آقسقاللری قرار قبول قیلیشهدی و اولرنینگ یانیده طالبان اعضالری هم اشتراک اېتیشهدی. اولر قَیسی لوازمده بۉلیشیدن قطعی نظر، دستلب اۉز آنهسی، سینگلیسی و خاتینینی تیکووچیلیک کورسلریگه کیریتهدیلر همده اۉز اویلرینی اجارهگه بېرهدیلر؛ چونکه تشکیلاتلر تیکووچیلیک اۉقووچیلری اوچون امتیازلر، جملهدن، تیکوو ماشینی و آیلیک معاش تۉلهشنی کۉزده توتهدی».
بو عیال قۉشیمچه قیلهدی: «بو یاردملر حقلی انسانلرگه یېتیب بارمهیپتی. تعلیم، اۉقیش و ایشدن محروم بۉلگن عیاللر تنیش-بیلیشلری و واسطهچیلری یۉقلیگی سببلی حتا تیکووچیلیکنی اۉرگنیشدن هم محروم بۉلماقده. اولر تیکووچیلیک کورسلریگه کیریش اوچون پاره بېریشگه یاکه آلگن امتیازلرینی طالبان بیلن بۉلیشیشگه مجبور بۉلماقدهلر».
۸صبح، بوندن آلدین هم کۉپلب حساباتلریده طالبان انسانپرورلیک یاردملرنی اۉز عایلهلری و یقینلری اۉرتهسیده تقسیملهیاتگنی همده اوشبو یاردمنی آلهدیگن کمبغل آدملردن پول اوندیرهیاتگنینی انیقلهگن اېدی.
بو شوندهی بیر پیتده صادر بۉلماقدهکی، بیرلشگن ملتلر تشکیلاتی باش کاتبی اۉز حساباتیده ۲۰۲۶-ییل ۱-اپرېلدن ۳۰-جونگچه انسانپرورلیک تشکیلاتلر طالبان تامانیدن انسانپرورلیک یاردمگه کیریشده ۱۵۹ ته چېکلاو حالتینی قید اېتگنینی معلوم قیلگن. اوشبو حساباتگه کۉره، مذکور ارهلشوولر آرتیدن ۸۶ ته انسانپرورلیک فعالیت تۉختهتیلگن. طالباننینگ امر باالمعروف و نهی عن المنکر وزیرلیگی اوشبو ارهلشوولرنینگ ۴۰ ته سیگه علاقهدار دېب تاپیلگن و ۲۴ ته حالتده عیال خادملرنینگ انسانپرورلیک فعالیتدهگی اشتراکیگه یاکه عیاللرنینگ یاردم آلیشیگه چېکلاولر قۉییلگن.
شونینگدېک، بیرلشگن ملتلر تشکیلاتینینگ انسانپرورلیک یاردملرنی موافقلشتیریش باشقرمهسی (اوچا) تامانیدن ۲۰۲۶-ییل جولای آییدهگی انسانپرورلیک یاردمگه کیریش حالتی بۉییچه اۉتکزیلگن و سپتمبر آییده اعلان قیلینگن بهالشگه کۉره، انسانپرورلیک یاردمگه کیریشدهگی جمعی ۳۰ ته چېکلاو حالتیدن ۱۶ ته سی یاردم کۉرسهتووچی تشکیلاتلر فعالیتیگه ارهلشوو بیلن باغلیق بۉلگن.
اوشبو حساباتده قید اېتیلیشیچه، اوچ ته حالتده طالبان رسمیلری یاردم آلووچیلرنی تنلشگه ارهلشگن و ینه اوچ ته حالتده انسانپرورلیک دستورلرنی عملگه آشیریشگه دخل قیلگن. شونینگدېک، ایکّی ته حالتده یاردم تشکیلاتلری اۉز خادملری رۉیخطینی یاکه یشیرین معلوماتلرینی تقدیم اېتیشگه مجبور قیلینگن. مذکور حساباتگه بناءً، اوشبو چېکلاولر قۉللنیلیشی آرتیدن ۱۸ ته یاردم دستوری وقتینچه تۉختهتیلگن و ایکّی ته یاردم مرکز یاپیلگن.
بوندن تشقری، بیرلشگن ملتلر تشکیلاتینینگ انسانپرورلیک یاردملرنی موافقلشتیریش باشقرمهسی یوقاری مرتبهلی رسمیلریدن بیری ادیم ووسورنو ۲۰۲۶-ییل می آییده خوفسیزلیک کېنگشی ییغیلیشیده انسانپرورلیک یاردم تشکیلاتلر یاردم آلووچیلرنی تنلش جریانی و لایحه شرطنامهلریگه تاثیر اۉتکزیش بۉییچه باسیملرگه دوچ کېلهیاتگنینی اَیتگن اېدی. شونینگدېک، او انسانپرورلیک یاردملرنینگ اۉز مقصدیدن آغیب کېتیشی (تالان-تاراج قیلینیشی) خوفی حقیده آگاهلنتیریب، بیرلشگن ملتلر تشکیلاتی سوءاستعماللیکلرنینگ آلدینی آلیش مقصدیده یاردم تقسیماتی اوستیدن نظارتنی و شکایتلرنی کۉریب چیقیشنی کوچهیتیرگنینی تاکیدلهگن اېدی.
کنر ولایتیدهگی شبههلی حالتلردن بیریده بیرلشگن ملتلر تشکیلاتی نقد پول یاردملرینینگ احتمالی اۉزلشتیریلیشی حقیده خبر آلگندن سۉنگ قۉشیمچه تېکشیروولر اۉتکزگن. اوشبو تشکیلات یاردم آلووچیلر رۉیخطینی تېکشیریش جریانیده فریبگرلیک یاکه یاردمنینگ مقصدسیز صرفلنگنلیگیگه عاید هېچ قندهی دلیل تاپیلمهگنینی اعلان قیلگن.





