بیرلشگن ملتلر تشکیلاتی قندوز و بغلان ولایتلریده عیاللر اوچون اقتصادی و تعلیم امکانیتلری یره‌تیلگنینی معلوم قیلدی
۸صبح، کابل: بیرلشگن ملتلر تشکیلاتی‌نینگ ترقیات دستوری (UNDP) افغانستانده‌گی عیال تدبیرکارلر قندوز و بغلان ولایتلریده اوشبو تشکیلات یاردمیده اۉز بیزنسلرینی کېنگه‌یتیریب، باشقه عیاللر و قیزلر اوچون تعلیم آلیش، ایش بیلن تأمینلنیش و درآمد تاپیش امکانیتلرینی یره‌تگنینی معلوم قیلدی.
اوشبو تشکیلات چهارشنبه کونی، ۲۹-مېزان، عیال تدبیرکارلرنی قۉللب-قوّتلش عایله‌لر‌نینگ اقتصادی احوالینی یخشیلش و عیاللر اوچون ایش ا‌ۉرینلرینی یره‌تیشگه یاردم بېریشی حقیده خبر بېردی.
حساباتگه کۉره، بغلان ولایتیده‌گی تیکووچیلیک مرکزلریدن بیری مالیوی یاردم و اسکونه‌لر آلگچ، اۉز فعالیتینی کېنگه‌یتیرگن همده اونده ایشله‌یاتگن عیاللر سانی هم آشگن.
حاضرده اوشبو مرکز کییم-کېچک ایشلب چیقریش بیلن بیر قطارده، یاش عیاللر و قیزلرگه تیکووچیلیک همده کشته‌چیلیکنی اۉرگتماقده. اونینگ تینگلاوچیلری آره‌سیده ایراندن و پاکستاندن قَیتگن ۱۵ نفر عیال و قیز هم بار.
بیرلشگن ملتلر تشکیلاتی‌نینگ ترقیات دستوری معلوم قیلیشیچه، اوشبو یاردملر تینگلاوچیلرگه مزاجلر‌نینگ بویورتمه‌لرینی تیّارلشده همکارلیک قیلیش آرقه‌لی درآمد تاپیش امکانینی بېرگن.
تشکیلات‌نینگ قۉشیمچه قیلیشیچه، قندوز و بغلان ولایتلریده عیال تدبیرکارلرنی قۉللب-قوّتلش نه‌فقط اولر‌نینگ اقتصادی فعالیتینی مستحکملشگه، بلکه ینگی ایش ا‌ۉرینلرینی یره‌تیش همده باشقه عیاللرگه کسب-هنر اۉرگنیش و درآمد تاپیشده یاردم بېریشگه هم خدمت قیلماقده.
