بیرلشگن ملتلر تشکیلاتی عایلهلرگه طبی خدمتلر کۉرسهتیشده عیال خادملرنینگ رۉلی مهملیگیگه اورغو بېردی
۸صبح، کابل: بیرلشگن ملتلر تشکیلاتینینگ اهالی جمغرمهسی (UNFPA) افغانستاندهگی اوشبو تشکیلاتنینگ عیال خادملری آنهلر و عایلهلرنینگ طبی خدمتلر همده روحی-اجتماعی یاردمدن فایدهلنیش امکانیتینی تأمینلش اوچون تینیمسیز محنت قیلهیاتگنینی معلوم قیلدی.
اوشبو تشکیلات سهشنبه کونی، ۱۷-سنبله، ایکس صحیفهسیده یازیشیچه، اولرنینگ استوار وظیفهسی بیرلشگن ملتلر تشکیلاتی خدمتلریدن فایدهلنهیاتگن هر بیر عیال و قیزنینگ سلامتلیگی، فراوانلیگی و کېلهجگی دیر.
بیرلشگن ملتلر تشکیلاتینینگ اهالی جمغرمهسی، اوشبو تشکیلاتنینگ افغانستاندهگی عیال خادملری آنهلر و عایلهلرگه مذکور خدمتلرنی تقدیم اېتیش یۉلیده فعالیت یوریتهیاتگنینی تأکیدلهدی.
بو حالت افغانستاننینگ کۉپلب حدودلریده عیاللر، اینیقسه حاملهدار آنهلرنینگ طبی خدمتلردن فایدهلنیش امکانیتی چېکلنگن، عیال شفاکارلرنینگ، خصوصاً، چېکّه حدودلرده، یېتیشمسلیگی اېسه عیاللر آلدیدهگی اساسی معمالردن بیری حسابلنهیاتگن بیر پیتده یوز بېرماقده.
سۉنگگی بېش ییل ایچیده عیاللر و قیزلرگه نسبتاً جاری اېتیلگن چېکلاولر هم اولرنینگ طبی خدمتلر، تعلیم و ایش امکانیتلریدن فایدهلنیشینی ینهده کۉپراق قیینچیلیکلرگه دچار قیلدی.
