طالباننینگ خوفسیزلیک کامرهلری؛ کابل اهالیسی اۉغیرلیکلرنینگ کۉپهییشی و بو تیزیمنینگ ثمرهسیزلیگیدن خواطرده
ایلیا
کابلنینگ بیر قطار اهالیسی طالبان تامانیدن کابلده اۉرنهتیلگن خوفسیزلیک کامرهلرینینگ جنایتلر و جنایی حادثهلرنی کمهیتیریشده کتّه رۉلی بۉلمهگنینی اَیتماقده. اولرنینگ اَیتیشیچه، برق تامیناتیدهگی اوزیلیشلر، کامرهلرنینگ ایشلهمهی قالیشی و تصویرلر صفتینینگ پستلیگی اۉغریلر خوفسیزلیک کامرهلریدن قۉرقمسلیگیگه سبب بۉلگن. طالباننینگ اۉغریلیک حالتلریگه شریکلیگی و ارهلشووی هم کابلده اۉغریلیکلرنینگ کۉپهییشیگه سبب بۉلهیاتگن عامللردن بیری صفتیده قرهلماقده. کابل اهالیسی اَیتیشیچه، برق ترماقلرینی اۉغیرلهیدیگنلر خوفسیزلیک کامرهلرینینگ برق سیملرینی اوزیب، کېین بېملال اۉغریلیک قیلیشهدی.
کابل اهالیسیدن بیری اقلیما شوندهی دېیدی: «فقط بیزنینگ کۉچهمیزنینگ اۉزیده تۉرت ته خوفسیزلیک کامرهسی اۉرنهتیلگن، بیزگه یقین بلاکده هم بیر نېچه ته کامره بار، اما کۉپینچه برق بۉلمهیدی و کامرهلر ایشلهمهیدی. کامرهلرنینگ کۉریش میدانی هم چېکلنگن و اولر بوتون حدودنی قمرهب آلالمهیدی. اۉغریلر هم اۉغریلیک پیتیده یوزلرینی یاپیب کېلیشهدی و کامرهلر اولرنی تۉغری قید اېته آلمهیدی؛ اهالی خوفسیزلیگینی تأمینلش اوچون ثمرهلیراق اصوللرنی قۉللش کېرهک.»
کابلنینگ ینه بیر اهالیسی شفیقه شوندهی دېیدی: «اوییمنی اۉغیرلشدی و بار-بودیمنی آلیب کېتیشدی. کۉچهگه خوفسیزلیک کامرهسی اۉرنهتیلگن، اما اونینگ تصویرلرینی کۉرگنیمیزده، اۉغرینینگ یوزی عموماً انیق کۉرینمهدی. اۉغریلر کامرهده یوزلری انیقلنمسلیگینی بیلگنلری اوچون خاطرجمع اۉغریلیک قیلیشهدی، آدملر اېسه اېندی طالبانگه مراجعت قیلمهیپتی، چونکه ایش تۉغری تېکشیریلمسلیگینی بیلیشهدی.»
کابلنینگ ینه بیر اهالیسی صدیق عمر شوندهی دېیدی: «خوفسیزلیک کامرهلری خوفسیزلیکنی تامینلش و جنایت همده اۉغریلیکلرنینگ آلدینی آلیش اوچون زمانوی تیزیم بۉلیب، اولرنینگ کابلده اۉرنهتیلیشی معلوم درجهده نتیجه بېرگن؛ اَیریم حالتلرده کامره تصویرلریدن دلیل صفتیده فایدهلنیلگن و جنایتچیلر قۉلگه آلینگن. اما آست-قورمهنینگ ضعیفلیگی، خصوصاً، برق تامیناتیدهگی اوزیلیشلر، کامرهلرنینگ اۉچیق بۉلیشی و اوشبو تیزیمنی نظارت قیلیش همده سقلش اوچون مخصوص خادملرنینگ یۉقلیگی کۉپلب حالتلرده اونینگ ضرور درجهده ثمرهلی ایشلهمسلیگیگه سبب بۉلگن. اگر بو آست-قورمهلر مستحکملنسه و کامرهلرنی نظارت قیلیش اوچون مخصوص بۉلیم تشکیل اېتیلسه، اوشبو تیزیمدن ینهده ثمرهلی فایدهلنیش ممکن.»
طالبان سۉنگگی بیر نېچه ییل دوامیده خوفسیزلیکنی تامینلش بهانهسیده کۉپلب حالتلرده خوفسیزلیک کامرهلرینی مجبوری طرزده و اهالی مبلغی حسابیدن اۉرنهتیشنی عملگه آشیریب کېلگن. اۉشه پیتده طالبان خوفسیزلیک کامرهلرینی اۉرنهتگن حدودلر اهالیسی خوفسیزلیکنینگ یۉقلیگی و شخصی حیات دخلسیزلیگینینگ بوزیلیشیدن شکایت قیلگن اېدی. بیراق طالبان جنایتلرگه قرشی کورهشیش دعواسی بیلن بو جریاننی مجبوری قیلگن. حاضر اېسه اوشبو خوفسیزلیک کامرهلرینینگ اۉرنهتیلیشی هم جنایتلرنی کمهیتیریشگه کتّه تاثیر کۉرسهتمهگنی کۉرینماقده.
خلقارا کېچیریم تشکیلاتی بوندن اوّل طالبان تامانیدن خوفسیزلیک کامرهلرینینگ کېنگ کۉلمده اۉرنهتیلیشی حقیده آگاهلنتیریب، بونی فقرالر اوستیدن نظارتنینگ کېنگهییشیگه مثال صفتیده بهالهگن اېدی.
انسان حقلرینی کوزهتوو تشکیلاتی هم افغانستانده معلوماتلرنی حمایه قیلیش بۉییچه انیق قانونلرنینگ یۉقلیگیگه اشاره قیلیب، کېنگ کۉلملی کوزهتوونینگ عاقبتلری و فقرالرنینگ معلوماتلریدن ناتۉغری فایدهلنیش احتمالی حقیده آگاهلنتیرگن.
اعلان قیلینگن حساباتلرگه کۉره، بو خواطرلر قطاریگه شخصلرنی کوزهتیش، ییغیلیشلرنی نظارت قیلیش و یاش، جنس، سقال قۉیگنلیک همده نقاب تقیش کبی خصوصیتلر اساسیده آدملرنی تصنیفلش اوچون یوزنی انیقلش امکانیتیدن فایدهلنیش احتمالی کیرهدی.
طالبان ایچکی ایشلر وزیرلیگی کابل شهریده قریب ۹۰ مینگ ته خوفسیزلیک کامرهسی اۉرنهتیلگنینی، اولر اساسا شهرنینگ گوجوم و مهم حدودلرینی قمرهب آلیشینی بیلدیرگن اېدی
