بیرلشگن ملتلر تشکیلاتی: افغانستان اهالیسی‌نینگ ۳۸ فایزی قیشده آزیق-طعام خوفسیزلیگی معماسیگه دوچ کېله‌دی
۸صبح، کابل: بیرلشگن ملتلر تشکیلاتی‌نینگ آزیق-طعام و اېکینچیلیک تشکیلاتی همده جهان آزیق-طعام دستوری جاری ییل قیشیده افغانستانده ۱۹،۲ میلیون کیشی اۉتکیر آزیق-طعام تنقیصلیگیگه دوچ کېلیشی و ۲۰۲۷-ییلده تۉییب-آوقت‌لنمسلیک حالتلری کۉپه‌ییشی کوتیله‌یاتگنی حقیده آگاهلنتیردی.
اوشبو تشکیلاتلر پنج‌شنبه کونی، ۲۳-میزانده حسابات اعلان قیلیب، افغانستان اهالیسی‌نینگ ۳۸ فایزی نوامبر آییدن اپرېل آییگچه بۉلگن دورده اۉتکیر آزیق-طعام تنقیصلیگیگه دوچ کېلیشینی معلوم قیلدی.
حساباتگه کۉره، بو کۉرسه‌تکیچ اۉتگن ییل‌نینگ شو دوریده‌گی ۱۷،۴ میلیون کیشیگه نسبتاً آشگن. شونینگدېک، افغانستانده قریب بېش میلیون کیشی آچلیک‌نینگ فوق العاده درجه‌سیگه دوچ کېله‌دی.
تشکیلاتلر ضعیف عایله‌لر آره‌سیده اۉلیم حالتلری‌نینگ آلدینی آلیش و اولر‌نینگ تیریکچیلیک منبعلری ایزدن چیقیشیگه یۉل قۉیمسلیک اوچون زودلیک بیلن آزیق-طعام یاردمی کۉرسه‌تیش همده اېکینچیلیک ساحه‌سیده فوق العاده یاردم بېریش ضرورلیگینی تأکیدله‌دی.
حساباتگه کۉره، بدخشان، بادغیس، دایکندی، غور، سمنگان و سرپل ولایتلری، شونینگدېک، غزنی ولایتی‌نینگ قیشلاق حدودلری آزیق-طعام تنقیصلیگی‌نینگ اېنگ آغیر درجه‌سیگه دوچ کېله‌دی.
شونینگدېک، ۲۰۲۷-ییلده افغانستانده تۉییب-آوقت‌لنمسلیک حالتلری قریب ۱۰ فایزگه آشیب، تۉرت میلیون حالتگه یېتیشی کوتیلماقده.
