دهدانه اهالیسی: ملالرگه پول و نان بېریش خلقنینگ امکانیتیدن تشقریده
شهرزاد
کابلدهگی دهدانا اهالیسینینگ اَیریملری مسجد ملالری اوچون اولردن هفتهلیک یاکه آیلیک طرزده پول ییغیلهیاتگنینی اَیتماقده. اولرنینگ اَیتیشیچه، عایلهلرنینگ اقتصادی احوالینی حسابگه آلگنده، بو پولنی تۉلهش کۉپچیلیک اوچون قیین. اَیریم اهالی، شونینگدېک، ملالرگه نان نوبت بیلن یوباریلیشیدن شکایت قیلیب، عایلهلر پول تۉلهشدن تشقری، بېلگیلنگن نوبتلرده ملانینگ اوییگه نان یوباریشگه هم مجبور اېکنینی اَیتماقده.
اوشبو اهالی وکیللرینینگ قۉشیمچه قیلیشیچه، اَیریم عایلهلرنینگ دایمی درآمدی یۉق و اولر کوندهلیک حیاتنینگ اساسی خرجتلری، اوی اجارهسی، برق تۉلاولری و باشقه احتیاجلرنی تأمینلشده قیینهلماقده. اولرنینگ اَیتیشیچه، بوندهی شرایطده منتظم پول تۉلهش و ملا اوچون نان یوباریش عایلهلرگه ینهده کتّه اقتصادی باسیم یوکلهیدی.
اهالیدن بیری عمر (مستعار)نینگ اَیتیشیچه، او ارابهکش بۉلیب، دایمی کونلیک درآمدگه اېگه اېمس. اونینگ قۉشیمچه قیلیشیچه، اَیریم کونلری ایش تاپه آلمهیدی، ایشلهگن کونلری اېسه تخمیناً ۱۰۰–۲۰۰ افغانی درآمد آلهدی و شو پولدن عایلهسی خرجتلری، اوی اجارهسی همده برق تۉلاولرینی تۉلهشی کېرهک.
عمر شوندهی دېیدی: «مېن ارابهکشمن. بعضی کونلری عموماً ایشلهمهیمن، بعضی کونلری اېسه یوز یاکه ایکّی یوز افغانی تاپهمن. شو پولنی رۉزغار خرجتلری، اوی اجارهسی و برق تۉلاویگه صرفلهیمن. اېندی شو درآمددن ملا اوچون هم پول بېریشگه یاکه ملانینگ نانینی تیّارلشگه امکانیم یۉق.»
پول ییغیش بیلن بیر قطارده، اهالی ملا اوچون ناننی نوبت بیلن یوباریش اصولیدن هم شکایت قیلماقده. اولرنینگ اَیتیشیچه، اَیریم محلهلرده خاندانلر نوبت بیلن ملا اوچون نان یوبارهدی و بو هم مالیوی امکانیتی چېکلنگن عایلهلر اوچون قۉشیمچه یوک بۉلیب قالگن.
اهالیدن ینه بیری شیر (مستعار)نینگ اَیتیشیچه، اولرنینگ حدودیده تخمیناً ۲۰–۳۰ ته خاندان بار و هر بیر خانداندن ملا اوچون پول ییغیلهدی. او بیر محلهده بو پوللرنینگ جمعی قنچه بۉلیشینی و ملالر اوشبو درآمدنی نیمه قیلیشینی سۉرهماقده.
شیر شوندهی دېیدی: «بیزنینگ حدودیمیزده ییگیرمه یاکه اۉتّیزته خاندان بار و شو خاندانلردن ملا اوچون پول ییغیشهدی. ییگیرمه یاکه اۉتّیزته خانداندن پول ییغیلسه، جمعی آز بۉلمهیدی. سوال شوکی، ملالر بو پوللرنینگ برچهسینی نیمه قیلیشهدی و قهیېرگه صرفلنهدی؟»
اَیریم اهالی وکیللرینینگ اَیتیشیچه، اولر عایلهلرینینگ حیاتی خرجتلری و اساسی احتیاجلرینی قاپلشده اقتصادی معمالرگه دوچ کېلماقده همده مسجد و دینی ایشلر بیلن باغلیق یاردملر شفّاف و خلق راضیلیگی اساسیده عملگه آشیریلیشینی کوتماقده.
اهالیدن ینه بیری علی (مستعار) بو حالتنی تنقید قیلیب، آدملرنینگ اقتصادی باسیمی آرتگنینی و اونینگ فکریچه، اېندیلیکده آدملردن پول آلیش اوچون اسلام نامیدن هم فایدهلنیلهیاتگنینی اَیتماقده.
علی شوندهی دېیدی: «اسلامی حکومت نامی بیلن حیاتیمیزنی تالان-تاراج قیلیشدی، اېندی اېسه اسلام و ملا نامی بیلن چۉنتکلریمیزنی هم تالان-تاراج قیلیشماقده.»
شو بیلن بیرگه، اَیریم اهالی وکیللرینینگ اَیتیشیچه، کۉپلب سوداگرلر و بدولت کیشیلر هم مسجدلرگه مالیوی یاردم بېرهدی، بیراق بو یاردملر قندهی صرفلنیشی و اونینگ قنچه قِسمی مسجدنینگ حقیقی احتیاجلریگه اجرهتیلیشی بارهسیده سواللر موجود.
عمر شوندهی دېیدی: «کۉپلب سوداگرلر و بایلر مسجدلرگه یاردم بېریشهدی. اما سوال شو که بو پوللر حقیقتاً هم الله یۉلیده صرفلنهدیمی یاکه ملالرنینگ قارنیگه کېتهدیمی؟»
اوشبو اهالی وکیللری عایلهلردن پول ییغیش و ملالر اوچون نان تیّارلش مجبوری بۉلمسلیگینی، یاردم ییغیلگن تقدیرده اېسه اونینگ مقداری و قندهی صرفلنیشی محلی اهالیگه آچیق-آیدین معلوم قیلینیشینی طلب قیلماقده. اولرنینگ اَیتیشیچه، مالیوی امکانیتی یۉق عایلهلر پول تۉلهمهگنی یاکه نان یوباریشگه قُربی یېتمهگنی سببلی باسیم آستیده قالمسلیگی کېرهک.
