فینکا مشتریلری قرض و ناانیقلیک اۉرتهسیده؛ قرضلر پوللرینی کیم ییغیب آلهدی؟
امین کاوه
اوشبو حسابات نتیجهلری شونی کۉرسهتهدی که طالبان حاکمیتنی اېگهللهگچ، فینکا افغانستان فعالیتی تۉختهتیلگنیدن سۉنگ، قرضلر و اوشبو مؤسسه مشتریلرینینگ مبلغلری تقدیری موهوملیگیچه قالگن. حجتلر، مزاجلر و منبعلر بیاناتلری شونی کۉرسهتهدی که متحد مالیوی ترقیات تشکیلاتی سابق فینکا مشتریلرینینگ قرضلرینی اوندیریش اوچون اۉزینی مسؤول دېب تنیشتیرگن. منبعلر دعواسیگه کۉره، فینکا افغانستان قرضلرینی اوندیریشده اشتراک اېتهیاتگن شخصلر اۉزلرینی «قاری» و «امارتی» کبی عنوانلر بیلن تنیشتیریب، مقصدلری «بیتالمال» مبلغلرینی ییغیش اېکنینی اَیتگن و بو ایشنی مشتریلرگه باسیم اۉتکزیش آرقهلی عملگه آشیرگن. اوشبو حسابات نتیجهلریگه کۉره، ایلگری فینکا انترنشنل یاردمیده فعالیت یوریتگن فینکا افغانستان مالیوی تشکیلاتی طالبان حاکمیتنی اېگهللهگچ، افغانستاندهگی فعالیتینی تۉختهتگن. فینکا انترنشنل معلوم قیلیشیچه، طالبان حاکمیتنی اېگهللهگچ، خلقارا چېکلاولر و فینکا افغانستان اوستیدن ثمرهلی نظارتنی یۉقاتگنی سببلی اوشبو مؤسسه فعالیتینی باشقریش و نظارت قیلیش امکانیگه اېگه بۉلمهگن. نتیجهده، فینکا افغانستان ۲۰۲۱-ییل آخریده اوشبو تشکیلاتنینگ ارهلشتیریلگن مالیوی حساباتلریدن چیقریلگن و اونینگ فعالیتی «تۉختهتیلگن عملیات» صفتیده تصنیفلنگن. اوشبو مؤسسه کم تأمینلنگنلر، کیچیک تدبیرکارلر و احتیاجمند عایلهلرگه کیچیک قرضلر تقدیم اېتگن همده افغانستاننینگ تورلی حدودلریده ۲۳ ته وکالتخانهسیگه اېگه بۉلگن.
منبعلر دعوا قیلیشیچه، اوشبو تشکیلات افغانستاندهگی فعالیتینی تۉختهتگنیدن سۉنگ، مشتریلریگه عاید برچه حجتلرنی یۉق قیلگن و مشتریلرنینگ قالگن کریدیتلرینی کېچیریب، یکونلنگن دېب اعلان قیلگن. آلینگن معلوماتلرگه کۉره، اوشبو تشکیلات خادملری هم حساب-کتاب و توگهتیش جریانلرینی عملگه آشیرگن.
منبعلر دعوا قیلیشیچه، اوشبو موسسهنینگ فقط بیرته وکالتخانهسینینگ اۉزیده ۱۰۰ میلیون افغانیدن آرتیق سرمایه و معاملهدهگی مالیوی مبلغلر موجود بۉلگن. منبعلرگه کۉره، فینکا افغانستانده فعالیتینی تۉختهتگنیدن سۉنگ، «متحد مالیوی ترقیات» ناملی باشقه بیر مؤسسه اۉزینی فینکا بیلن باغلیق ایشلر اوچون مسؤول دېب تنیشتیریب، اوشبو مؤسسهنینگ سابق مشتریلریدن کریدیتلرنی اوندیرماقده.
منبعلر قۉشیمچه قیلیشیچه، فینکا افغانستان مالیوی مؤسسهسینینگ اکثریت مشتریلری کمبغل و کم تأمینلنگن شخصلر بۉلیب، اولر بیر نېچه باش چاروا ساتیب آلیش یاکه کیچیک بیزنس باشلش اوچون کریدیت آلگن و حاضر هم اقتصادی معمالر بیلن کورهشماقده. شونگه قرهمهی، منبعلرگه کۉره، ایکّینچی مؤسسه طالبان بیلن موافقلشتیرگن حالده، اوشبو کریدیتلرنی مشتریلردن باسیم و کوچ ایشلهتیش آرقهلی اوندیرماقده.
اوشبو مؤسسه مشتریلرینینگ تأکیدلشیچه، اولرنینگ کریدیتلری فینکا افغانستان تامانیدن کېچیریلگن و افغانستاننی اۉزینینگ مالیوی تیزیمیدن چیقریب تشلهگن، بیراق ایکّینچی مؤسسه کریدیتلرنی قَیسی مېزانلر اساسیده اوندیرماقچی اېکنی نامعلوم.
مشتریلرنینگ دعوا قیلیشیچه، متحد مالیوی ترقیات تشکیلاتی خادملری اۉزلرینی طالبانگه علاقهدار شخصلر صفتیده تنیشتیریب، بو پوللر «بیتالمال ملکی» اېکنینی و ییغیب آلینیشی کېرهکلیگینی اَیتگن. اولرنینگ سۉزلریگه کۉره، اوشبو مبلغلرنینگ طالبان نامیدن اوندیریلیشی بو بایلیکلرنینگ احتمالی تالان-تاراج قیلینیشی یوزهسیدن خواطرلرنی کوچهیتیرگن. اولر، شونینگدېک، بو شخصلر متحد مالیوی ترقیات تشکیلاتی بیلن کېلیشوو اساسیده اوندیریلگن مبلغلرنینگ قریب ۳۰ فایزینی خدمت حقی صفتیده آلیشینی اَیتماقده.
مشتریلرنینگ اَیتیشیچه، پول «بیتالمال» نامیدن ییغیلهیاتگنیده، قَیسی رخصت اساسیده انیق بانک حسابلریگه، جملهدن «بیرینچی کېچیک قرضلر بانکی»دهگی حساب رقملریگه اۉتکزیلهیاتگنی و بو مبلغلر قندهی میکانیزم اساسیده سقلنهیاتگنی همده صرفلنهیاتگنی آچیق کۉرسهتیلیشی کېرهک.
اوشبو خط فینکا سابق خادملریدن بیرینینگ نامیگه بېریلگن. حساباتده بو شخصنینگ اسمی آلیب تشلنگن. خط ۲۰۲۲-ییل ۲۰-نوامبر کونی اوشبو خادمگه فینکا افغانستان یوقاری مرتبهلی منصبدارلریدن بیرینینگ امضاسی بیلن بېریلگن.
خطده شوندهی دېییلهدی: «اوشبو حساب-کتاب خطی FINCA International و FINCA Coop که FINCA افغانستان اولوشدارلری) نامیدن [اسمی آلیب تشلنگن شخص] اوچون بېریلدی. بیز اوشبو خادمنینگ حلاللیک، صداقت و تیریشقاقلیک بیلن قیلگن همکارلیگی و فعالیتینی قدرلهیمیز. شو بیلن تصدیقلنهدی که اوشبو خادم فینکا افغانستانگه تېگیشلی برچه مال-ملک و جهازلرنی تاپشیرگن، آلینگن برچه اوانس و حسابدارلیک مبلغلری بۉییچه حساب-کتاب قیلگن همده وظیفهلرنی تاپشیریش (Hand Over) بیلن باغلیق ایشلرنی تۉغری عملگه آشیرگن.»
اوشبو خطنینگ تگیده فینکا افغانستان باشقیرووچیلر کېنگشی اعضاسی و وکیلی (Jeffery Smith) امضا قۉیگن.
مشتریلرنینگ شخصینی تصدیقلاوچی حجتلری یۉقالگنی حقیدهگی دعوا
فینکا افغانستان مشتریلرینینگ اَیریملری اوشبو مؤسسهنینگ افغانستاندهگی فعالیتی تۉختهتیلگنیدن خبر تاپگچ، اۉز حجتلرینی آلیش اوچون مراجعت قیلگنینی، بیراق کریدیت آلگن پیتیده فینکاگه تاپشیرگن حجت و معلوماتلری متحد مالیوی ترقیات تشکیلاتی تصرفیده یۉقلیگینی انیقلهگنینی دعوا قیلماقده.
متحد مالیوی ترقیات تشکیلاتی ایلگری فینکا افغانستان نامیدن بېریلگن پول ییغیمی رسیدلرینی اۉزگرتیریب، حاضرده اوشبو رسیدلرنی اۉز نامیدن بېرماقده؛ حالبوکه، فینکا افغانستان ایلگری فینکا انترنشنل ترماغینینگ بیر قِسمی بۉلگن.
بوندن آلدین فینکا افغانستان سابق مشتریلرینینگ تۉلاولرینی ۰۲۱۱۰۴۰۱۰۰۰۶۱۰۱ رقملی بانک حسابیگه ییغیب کېلگن. بیراق حاضر کریدیتلر آدملردن «بیتالمال» و «اسلام امیرلیگی» نامیدن، متحد مالیوی ترقیات تشکیلاتی تامانیدن یاللنگن شخصلر آرقهلی اوندیریلماقده. بو شخصلر اۉزلرینی «قاری صاحب»، «امارتی» و «مجاهدلر» کبی عنوانلر بیلن تنیشتیریب، فینکانینگ سابق مشتریلریدن پول ییغماقده. فینکانینگ سابق مشتریلری اَیتیشیچه، بو جریان اوشبو مبلغلرنینگ باشقریلیشی و احتمالی تالان-تاراج قیلینیشی بارهسیده جدّی سواللر و خواطرلرنی یوزهگه کېلتیرگن.
شونینگدېک، ۸صبحگه تقدیم اېتیلگن حجتلرگه کۉره، متحد مالیوی ترقیات تشکلاتی آدملردن ییغیلگن مبلغلرنی خصوصی بانکلردن بیری بۉلگن «کېچیک قرضلر بانکی»گه کیریتهدی. مشتریلر تاکیدلشیچه، اگر بو پوللر «بیتالمال»گه تېگیشلی بۉلسه، نېگه اولر خصوصی بانکده ییغیلیب، سقلنهیاتگنی آچیق توشونتیریلیشی کېرهک؛ اینیقسه، مرکزی بانک و باشقه دولت بانکلری طالبان نظارتی آستیده فعالیت یوریتهیاتگن بیر پیتده.
حجتلر شونی کۉرسهتهدی که بیرینچی کېچک قرضلر بانکی فینکا افغانستان مشتریلریدن بیرینینگ کریدیتینی هم اوندیریشنی عملگه آشیرگن. اوشبو بانکنینگ دشت برچی نمایندهلیگیدن ۲۰۲۲-ییل ۳-اگوستده بېریلگن حجتده فینکا افغانستان مشتریلری بیریدن ۱۳۵ مینگ ۲۲۰ افغانی آلینگنی کۉرسهتیلگن. اوشبو حجتده حساب نامی حساب «MISFA FINCA Loan Collection» دېب قید اېتیلگن، حجت توری اېسه «Deposit Slip» دېب کۉرسهتیلگن. تراکنش ایضاحیده اوشبو مبلغ برچی نمایندهلیگی تامانیدن نقد شکلده کیریتیلگنی و جمعی کمیسیون مقداری صفر افغانی بۉلگنی قید اېتیلگن.
اَیریم مشتریلر دعوا قیلیشیچه، قرضدارلیکلرنی اوندیریش اوچون یاللنگن شخصلر اَیریم طالبان جنگریلری بیلن علاقهلری یاکه تنیش-بیلیشلریگه تیهنیب، اولرنی فینکا کریدیتلریگه تېگیشلی مبلغلرنی تۉلهشگه مجبورلش یاکه تهدید قیلیش آرقهلی باسیم آستیگه آلماقده.
فینکا و متحد مالیوی ترقیات تشکیلاتی اۉرتهسیده حجت امضالنیشی
باشقه تاماندن، ینه بیر حجت شونی کۉرسهتهدی که متحد مالیوی ترقیات تشکیلاتی و فینکا افغانستاننینگ و اَیریم خادملری اۉرتهسیده حجت امضالنگن بۉلیب، اونگه کۉره فینکا مشتریلرینینگ مبلغلری معین حساب رقمیده سقلنهدی و افغانستاندهگی فینکا خادملری اوشبو پوللر بۉییچه هېچ قندهی اداری، مالیوی یاکه حقوقی جوابگرلیککه اېگه اېمس.
منبعلر اَیتیشیچه، متحد مالیوی ترقیات تشکیلاتی و فینکا خادملری اۉرتهسیدهگی کېلیشوو شرطنامهسیده فینکانینگ برچه پوللری بیرته حسابده قالیشی و فینکا خادملریدن هېچ بیری اولر اوچون جوابگر بۉلمسلیگی قید اېتیلگن. منبعلرگه کۉره، بو یېرده شوندهی سوال توغیلهدی: فینکا پوللرینی اۉتکزیش وکالتیگه اېگه بۉلمهگن بیر نېچه خادم قندهی قیلیب متحد مالیوی ترقیات تشکیلاتی بیلن اوشبو شرطنامهنی امضالهی آلگن؟
متحد مالیوی ترقیات تشکیلاتی و فینکا افغانستان خادملری اۉرتهسیدهگی اوشبو بیتیم ۲۰۲۲-ییل ۳-اکتوبرده امضالنگن. اوشبو خطده شوندهی دېییلهدی: «۲۰۲۲-ییل ۲۹-سپتمبردهگی ایمیل آرقهلی بیلدیریلگن خواطرلر و بېریلگن سواللر یوزهسیدن سۉراوینگیزنی انابتگه آلیب، خواطرلرینگیزنی برطرف اېتیش اوچون قوییدهگی جوابلرنی تقدیم اېتیشدن ممنونمیز: ینگی کریدیتینی فقط متحد مالیوی ترقیات تشکیلاتیدن آلگن شخصلرگه تېگیشلی حجتلر اۉز تصرفیگه آلینهدی.»
خطده فینکا قرضلری جمعلنمهسی ۲۶۴۵-کود آستیده رۉیخطگه آلینیشی و اوشبو کریدیتلر جمعلنمهسی اوچون خادملرنینگ هېچ بیری جوابگر بۉلمسلیگی اَیتیلگن. خط متنیده قوییدهگیلر قید اېتیلگن: «فینکا کریدیتلری جمعلنمهسی ۲۶۴۵-سانلی قانونی کود آستیده رۉیخطگه آلینهدی و مسوول خادملرنینگ هېچ بیری اولر اوچون جوابگر بۉلمهیدی. نمایندهلیکنینگ برقرارلیگی سقلنیب تورگن وقتگچه، فریبگرلیک یاکه اخلاققه ضد خطی-حرکت صادر اېتیلگن حالتلردن تشقری، ایش جایینگیز سقلب قالینهدی.»
اوشبو همکارلیک شرطنامهسیگه کۉره، برچه رسمی حجتلر متحد مالیوی ترقیات تشکیلاتینینگ لوگوسی اۉزگرتیریلهدی و برچه خادملرگه رسمی ایمیل منزلی همده شخصنی تصدیقلاوچی گواهنامه تقدیم اېتیلهدی. شونینگدېک، اوشبو شرطنامهده فینکا افغانستان سرمایهلری متحد مالیوی ترقیات تشکیلاتیگه قۉشیش یاکه اۉتکزیش مسألهسی اوشبو مؤسسهنینگ حقوقی بۉلیمی تامانیدن ییغیلیشده کۉتریلیشی و تقدیم اېتیلیشی اَیتیلگن.
اوشبو خطنینگ باشقه بیر قِسمیده شوندهی دېییلهدی: «کېچیک مالیهلشتیریش سکتورینی مالیهلشتیریشده سرمایه کېریتیشلرنی قۉللب-قوّتلش دستوری (MISFA)و متحد مالیوی ترقیات تشکیلاتی (MDFI) اۉرتهسیدهگی کېلیشوونینگ برچه بندلری اوشبو مؤسسه رهبریتی تامانیدن کۉریب چیقیلگن و اونینگ مضمونی متحد مالیوی ترقیات تشکیلاتی رهبریتی تامانیدن سیز بیلن تۉلیق بهم کۉریلهدی. متحد مالیوی ترقیات تشکیلاتی مسألهلر، جملهدن خادملرگه عاید مسألهلر، کریدیتلرنی اوندیریش و باشقه ضرور ایشلر اوچون مسوول بۉلهدی. بۉلیملر و ادارهلر توزیلمهسی هم (MDFI) توزیلمهسی اساسیده بۉلهدی. متحد تشکیلاتی رهبریتی برچه خادملرنی حرمت قیلهدی و اولرنینگ افغانستان اقتصادی احوالینی یخشیلش یۉلیدهگی سعی-حرکتلرینی یوقاری قدرلهیدی همده خادملرنینگ هر قندهی تکلیفلرینی ممنونیت بیلن قبول قیلهدی.»
منبعلرگه کۉره، اوشبو حجت امضالنگنیگه قرهمهی، حاضرگچه فینکا مشتریلریگه تېگیشلی مبلغلر متحد مالیوی ترقیات تشکیلاتی تامانیدن یاللنگن خادملر آرقهلی ییغیب کېلینماقده. شونینگدېک، موجود معلوماتلرگه کۉره، اَیریم حاللرده بو جریان مزاجلر و خادملرگه باسیم اۉتکزیش همده تهدید قیلیش بیلن کېچگن.
شو بیلن بیرگه، منبعلر تأکیدلشیچه، تاپیلمهلر فینکا انترنشنل تامانیدن فینکا افغانستان مشتریلرینینگ مبلغلرینی متحد مالیوی ترقیات تشکیلاتیگه اۉتکزیش بۉییچه هېچ قندهی قانونی حجت چیقریلمهگن یاکه عملگه آشیریلمهگنینی کۉرسهتماقده.
فینکا انترنشنل حساباتلریده نیمه دېییلهدی؟
فینکا انترنشنل ۲۰۲۱-ییلگی ارهلشتیریلگن مالیوی حساباتیده افغانستانده طالبان حاکمیتنی اېگهللهگنیدن سۉنگ، اوّلگیدېک فینکا افغانستان فعالیتینی باشقریش و اونینگ فعالیتی اوستیدن ثمرهلی نظارتنی عملگه آشیریش امکانیگه اېگه بۉلمهگنینی اَیتگن. شو سببلی، ۲۰۲۱-ییل ۳۱-دسمبرده فینکا افغانستان اوشبو تشکیلاتنینگ ارهلشتیریلگن مالیوی حساباتلریدن چیقریلگن و اونینگ فعالیتی «تۉختهتیلگن عملیاتلر» (Discontinued Operations) قطاریگه کیریتیلگن.
اقتصادی مسالهلردن خبردار شخصلرنینگ اَیتیشیچه، نظارت یۉقالگنی سببلی افغانستاننینگ ارهلشتیریلگن حساباتلردن چیقریلیشی کریدیتلرنینگ کېچیریلگنینی انگلهتمهیدی. شونینگدېک، افغانستاندهگی فعالیتنینگ «تۉختهتیلگن عملیاتلر» صفتیده تصنیفلنیشی فینکا چیقیب کېتگنیدن کېین مشتریلرنینگ قرضدارلیکلری قَیسی تشکیلاتگه اۉتکزیلگنی یاکه اولرنی قانونی اوندیریش حقوقی کیمده بۉلگنینی انیقلشتیرمهیدی.
شو بیلن بیرگه، اوشبو تشکیلات ۲۰۲۲-ییلگی حساباتیده هم افغانستانده طالبان حاکمیتنی اېگهللهگنی و بونینگ آرتیدن خلقارا چېکلاولر جاری اېتیلگنی فینکا هلدینگ (FMH)نینگ مالیوی منفعتلرنی باشقریش، درآمدلردن فایدهلنیش و عادتی باشقروو کاناللری آرقهلی فینکا افغانستان قرارلریگه تأثیر کۉرسهتیش امکانیتینی عملده تۉلیق تۉختهتگنی و چېکلهگنینی اَیتگن.
حساباتده اَیتیلیشیچه، فینکا هلدینگ حالدینگ همان فینکا افغانستاننینگ قانونی اېگهسی بۉلیب قالگن بۉلسه-ده، اوشبو تشکیلات رهبریتی ۲۰۲۱-ییل ۳۱-دسمبرده اوشبو نمایندهلیک اوستیدن ثمرهلی نظارتنی یۉقاتگن دېگن رسمی خلاصهگه کېلگن. حساباتگه کۉره، بو قرار فینکا اولوشدارلری صفتیده اوشبو نمایندهلیک فعالیتیگه اۉز تأثیری و وکالتلرینی عملگه آشیره آلمهگنی، اونینگ اۉزگرووچی درآمدلریدن منفعتدار بۉلمهگنی و باشقروو ارهلشووی آرقهلی اونینگ مالیوی نتیجهلریگه تأثیر کۉرسهتیش امکانیگه اېگه بۉلمهگنی سببلی قبول قیلینگن.
اوشبو مهم واقعه سببلی فینکا افغانستان محاسبه حسابیده «تۉختهتیلگن عملیات» (Discontinued Operation) صفتیده تصنیفلنگن. اوشبو تشکیلاتنینگ ۲۰۲۱-ییلدهگی مالیوی فعالیتی، نظارت یۉقاتیلگن وقتگچه، ۲۰۲۲-ییلگی حساباتنینگ تققاسلمه اوستونلریده «تۉختهتیلگن عملیات» نامی آستیده علیحده قید اېتیلگن، تاکه او فعال نمایندهلیکلرنینگ رقملری بیلن بیرلشتیریلمسین.
مالیوی حساباتلرنینگ ۲۹-ایضاحیده (Note ۲۹ – FINCA Entities))، ۲۰۲۲-مالیه ییلی آخریده بوتون دنیا بۉیلب فینکا تامانیدن نظارت قیلینهدیگن فعال نمایندهلیکلر و شعبه کمپنیلرنینگ تۉلیق رۉیخطی کېلتیریلگن بۉلیب، اونده افغانستان نامی بوتونلهی آلیب تشلنگن.
فینکا افغانستان افغانستاندهگی فعالیتینی تۉختهتیشیدن آلدین، ۲۰۲۰-ییلده کېچیک مالیهلشتیریش ساحهسیده فعالیت یوریتگن تشکیلاتلردن بیری بۉلیب، اساسا کم درآمدلی شخصلر، کیچیک بیزنسلر و بانک خدمتلریدن فایدهلنیش امکانیتی چېکلنگن مشتریلرگه مالیوی خدمتلر کۉرسهتگن.
فینکا انترنشنلنینگ ۲۰۲۰-ییلگه تېگیشلی و امریکاده سالیقدن آزاد اېتیلیشی اوچون تقدیم اېتیلگن ۹۹۰-شکلیدهگی حجتیده ۲۰۲۰-مالیه ییلیگه عاید مالیوی و رۉیخطگه آلیش حجتلری کېلتیریلگن. اولر فینکا افغانستان اۉشه پیتده فینکا خلقارا توزیلمهسینینگ بیر قِسمی بۉلگنینی همده اېگهلیک و نظارت زنجیری آرقهلی فینکانینگ خلقارا تشکیلاتلری بیلن باغلنگنینی کۉرسهتهدی.
حقوقی توزیلمه و اېگهلیک
فینکا انترنشنلنینگ ۲۰۲۰-مالیه ییلی اوچون سالیق ایضاحنامهلری و عامهوی اعلان قیلینگن حجتلریدهگی معلوماتلرگه کۉره، فینکا انترنشنل ناملی محلی تشکیلات تجارت کمپنیسی صفتیده فعالیت یوریتگن و اونینگ حقوقی مقامی اولوشدارلیک تجارت کمپنیسی (C Corporation) شکلیده رۉیخطدن اۉتگن. اوشبو توزیلمهده فینکا افغانستان بېواسطه FINCA Microfinance Cooperatief U.A. کمپنیسی نظارتی آستیده بۉلگن. اوشبو کمپنی فینکا زنجیریده واسطهچی رۉلینی بجرگن و اۉزی فینکا سرمایه کېریتیش تشکیلاتلرینینگ اېگهلیک توزیلمهسی آستیده بۉلگن.
حساباتلرگه کۉره، اوشبو توزیلمهدهگی فینکا بیلن باغلیق ملکچیلیک اولوشی ۶۵.۸۹ فایزنی تشکیل اېتگن. بو توزیلمه فینکا افغانستان ۲۰۲۰-ییلده محلی فعالیت نقطه نظریدن مستقل تشکیلات بۉلگنینی، بیراق اېگهچیلیک توزیلمه جهتیدن فینکا خلقارا ترماغی بیلن باغلنگنینی کۉرسهتهدی.
فینکا انترنشنل مالیوی حجتلریده قید اېتیلگن معلوماتلرگه کۉره، فینکا افغانستان ۲۰۲۰-ییلده قریب ۲۱ مینگ ۸۷۲ نفر مزاج و منفعتدار شخصگه مالیوی خدمتلر و محصولاتلر تقدیم اېتگن.
اوشبو معلوماتلرگه کۉره، ۲۰۲۰-ییلده فینکا افغانستان بیلن باغلیق حساباتلرده کۉرسهتیلگن درآمد تخمیناً ۳.۱۵ میلیون امریکا دالرینی، اۉشه ییل آخریده قید اېتیلگن بایلیکلر قیمتی اېسه تخمیناً ۱۱.۳۲ میلیون دالرنی تشکیل اېتگن.
