ارزگان اهالیسی:عادی کسللیکلریمیز هم دوالنمهیپتی
۸صبح، ارزگان
ارزگان ولایتی اهالیسی بو ولایتده طبی امکانیتلر یۉقلیگیدن خواطر بیلدیریب، کۉپلب عادی کسللیکلر طبیات مرکزلریده دوالنمسلیگینی اَیتماقده. اولرنینگ سۉزلریگه کۉره، بو ولایتده طبی خدمت کۉرسهتیش جریانی جوده ضعیف.
گیزاب تومنیده یشاوچی محمدشفیقنینگ اَیتیشیچه، بو تومندهگی طبیات مرکزلریده ساغلیق خدمتلر ضعیف، طبیات خادملری سانی کم، ملَکهلی شفاکارلر یۉق و اَیریم طبیات خادملری حتا نرسلیک یۉنهلیشینی هم تماملمهگن. او قۉشیمچه قیلیشیچه، ترینکوت مرکزی بیلن گیزاب تومنی مرکزی اۉرتهسیدهگی مصافه موترده تخمیناً سکّیز ساعتلیک یۉلنی تشکیل اېتهدی و یۉللرنینگ یامانلیگی هیداوچیلرنینگ اهالیدن کتّه مقدارده یۉل حقی آلیشیگه سبب بۉلگن.
گیزاب بو یشاوچیسینینگ اَیتیشیچه، دولت شفاخانهسیده دارو-درمانلر کېسکین یېتیشمهیدی و اوشبو شفاخانهگه مراجعت قیلگن بېمارلرگه کېرهکلی دارولرینی بازاردن ساتیب آلیش توصیه اېتیلهدی.
شفیق قۉشیمچه قیلهدی: «بیزنینگ تومنیمیزدهگی اېنگ یخشی جهازلنگن شفاخانه تومن مرکزی شفاخانهسی دیر؛ اما بو شفاخانهده حتا شماللش کبی عادی کسللیکلر هم دوالنمهیدی. بیز بېمارلریمیزنی ترینکوتگه آلیب بارهمیز. او یېرگه سکّیز ساعتلیک یۉل بار و اگر کیمدیر موتر یاللهسه، بېش مینگ افغانی یۉل حقی تۉلهشی کېرهک. تومنیمیز شفاخانهسینینگ احوالی بوتونلهی آغیر حالتگه کېلگن.»
بوندهی معمالرگه فقط گیزاب اهالیسی دوچ کېلمهیپتی؛ ارزگاننینگ باشقه بیر قطار تومنلری اهالیسی هم ساغلیق خدمتلر حالتیدن شکایت قیلیب، طالبان حاکمیتنی قۉلگه آلگنیدن سۉنگ بو ولایتده ساغلیقنی سقلش ساحهسی فلج بۉلگنینی اَیتماقده.
ارزگان خاص تومنی اهالیسی هم ساغلیق معمالردن شکایت قیلیب، یۉللرنینگ اوزاقلیگی، ملَکهلی شفاکارلرنینگ یېتیشمسلیگی، شفاخانهلرده طبی جهازلرنینگ یۉقلیگی و خدمتلرنینگ ضعیف کۉرسهتیلیشی بو تومن اهالیسینی جدّی معمالرگه دچار قیلگنینی اَیتماقده.
بو تومن اهالیسیدن بیرینینگ اَیتیشیچه، ارزگان خاصدهگی اَیریم ساغلیق مرکزلری طالبان، بعضیلری اېسه خلقارا تشکیلاتلر تامانیدن مالیهلشتیریلهدی، بیراق اوشبو مرکزلرنینگ احوالی جوده ناساز و کۉرسهتیلهیاتگن خدمتلر اهالینینگ احتیاجلرینی قاندیرمهیدی. اونینگ اَیتیشیچه، آدملر بېمارلرینی دوالنیش اوچون ترینکوت ولایت شفاخانهسیگه یاکه غزنی ولایتینینگ جاغوری و مالستان تومنلریگه آلیب بارهدیلر.
ارزگاننینگ خاص تومنی بو یشاوچیسی شوندهی دېیدی: «بیزنینگ تومنیمیزده ساغلیق خدمتلر جوده ضعیف کۉرسهتیلهدی. شفاخانهلرده هېچ قندهی دارو-درمان و امکانیتلر یۉق. بیز بېمارلریمیزنی دوالنیش اوچون ترینکوت یاکه مالستان و جاغوریگه آلیب بارهمیز.»
چنارتو تومنیدهگی یاشلردن بیری بۉلگن سیفالله کسل خاتینینی ترینکوت شهریدهگی خصوصی شفاخانهگه دوالنیش اوچون آلیب کېلگنینی اَیتیب، بیر تاماندن اهالینینگ اقتصادی احوالی جوده یامان اېکنینی، باشقه تاماندن اېسه دولت ساغلیق مرکزلریده مناسب دوالش خدمتلری کۉرسهتیلمهیاتگنینی بیلدیرهدی. اونینگ اَیتیشیچه، چنارتو تومنیده بیرارته هم عیال شفاکار یۉق و بوتون تومنده عیال بېمارلرگه فقط ایکّی دایه خدمت کۉرسهتهدی.
بو ییگیت قۉشیمچه قیلهدی: «آدملرده اېرتهلب و کېچقورون یېییشگه نانی یۉق و توننی قندهی اۉتکزیشنی بیلمهیدی. آچ قارینگه اوخلهیدی و کسل بۉلیب قالگنیده، بېمارینی دوالش خرجتلرینی قندهی تامینلشنی بیلمهیدی. بوتون تومنیمیزده بیرارته هم عیال شفاکار یۉق و فقط بیر یاکه ایکّی دایه بار. باشقه هېچ کیم یۉق. تومنلریمیز اهالیسینینگ احوالی جوده یامان و اولر اۉزلرینی همده عایله اعضالرینی قندهی دوالشنی بیلمهیدی.»
ولایتدهگی بیر قطار مدنی فعاللر ارزگان و افغانستاننینگ باشقه حدودلریدهگی ساغلیق مرکزلرینینگ احوالی ناساز اېکنینی، خلقارا یاردملرنینگ کمهییشی و اولر طالباننینگ بېپروالیگی دېب حسابلهیاتگن حالت اوشبو وضعیتنینگ اساسی عامللریدن اېکنینی اَیتماقده.
ارزگان مدنی فعاللریدن بیری خوفسیزلیک خواطرلری سببلی اسمی اوشبو حساباتده کېلتیریلیشینی ایستهمهگن حالده، بو ولایتدهگی کۉپلب ساغلیق مرکزلری یاردملرنینگ کمهییشی سببلی یاپیلگنینی اَیتهدی.
بیراق بو ولایتده طبی خدمتلرنی تأمینلش اوچون مسوول بۉلگن تشکیلاتلردن بیریدهگی منبع حاضرده بوتون ارزگان بۉیلب ۱۰۵ ته طبیات مرکزی فعالیت یوریتهیاتگنینی اَیتهدی. او قۉشیمچه قیلیشیچه، هنوزگچه اَیریم حدودلرده «آق حدودلر» موجود بۉلیب، اولرده هېچ قندهی فعال ساغلیق مرکزی یۉق و اوشبو حدودلرده هم ساغلیق خدمتلر یۉلگه قۉییلیشی ضرور.
