دوجاریک: افغانستان پارتله‌مه‌ی قالگن اۉقلر سببلی اېنگ کۉپ تلفات کۉرگن مملکتلردن بیریدیر
۸صبح، کابل: بیرلشگن ملتلر تشکیلاتی باش کاتبی‌نینگ سۉزلاوچیسی استیفن دوجاریک‌نینگ اَیتیشیچه، جاری ییل باشیدن بویان افغانستان شرقیده اوروشدن قالگن پارتلاوچی مادّه‌لر قالدیقلری و پارتله‌مه‌ی قالگن اۉق-دارولر بیلن باغلیق ۶۴ ته حادثه قید اېتیلگن. نتیجه‌ده ۶۴ نفر تینچ اهالی جان بېریب و یره‌لنگن.
استیفن دوجاریک، مطبوعات انجمنیده افغانستان همان دنیاده پارتله‌مه‌ی قالگن اۉق-دارولر سببلی اېنگ کۉپ تلفات قید اېتیله‌دیگن مملکتلردن بیری اېکنینی اَیتگن.
بیرلشگن ملتلر تشکیلاتی باش کاتبی‌نینگ سۉزلاوچیسی، اوروشدن قالگن پارتلاوچی مادّه‌لر قالدیقلری و پارتله‌مه‌ی قالگن اۉق-دارولر افغانستانده تینچ اهالی، اینیقسه باله‌لر اوچون همان جدّی تهدید بۉلیب قاله‌یاتگنینی بیلدیرگن.
دوجاریک‌نینگ اَیتیشیچه، بیرلشگن ملتلر تشکیلاتی و اونینگ همکارلری پارتلاوچی مادّه‌لر خوفی حقیده خبردارلیکنی آشیریش، ضررلنگن حدودلرنی تازه‌لش و جبرلنگن جماعه‌لرگه یاردم بېریش بۉییچه فعالیت آلیب بارماقده؛ بیراق مبلغلر‌نینگ کېسکین یېتیشمسلیگی اوشبو فعالیتگه تأثیر کۉرسه‌تماقده.
