فایو: بېش ولایتده ۴۶۸ ته عایله قویاش انرژیسیده ایشلهیدیگن اجاقلر آلدی
۸صبح، کابل: بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (فایو) بادغیس، بامیان، غزنی، کنر و پکتیا ولایتلریدهگی ۴۶۸ ته عایله قویاش انرژیسیده ایشلهیدیگن اجاقلر آلگنینی معلوم قیلدی. تشکیلاتنینگ اَیتیشیچه، بو تشبث یاقیلغی صرفی و اوندن کېلیب چیقهدیگن افلاسلنیشنی کمهیتیرهدی.
فایو، یکشنبه کونی، ۵ میزان، قویاش اجاقلریدن فایدهلنیش عایلهلرنینگ اۉتین، بته، قوریتیلگن گۉنگ و گازگه بۉلگن احتیاجینی کمهیتیریشینی، نتیجهده یاقیلغی تأمیناتی اوچون ضرور بۉلهدیگن خرجت و وقت هم قیسقریشینی معلوم قیلدی.
تشکیلاتنینگ اَیتیشیچه، ییلاولردن اۉتین ییغیشنینگ کمهییشی اۉسیملیک قاپلهمینی اسرهش و طبیعی منبعلرگه توشهدیگن باسیمنی کمهیتیریشگه یاردم بېرهدی.
فایو معلوم قیلیشیچه، ییلاولر بامیاندهگی چاروادار و دهقان-چاروادار جماعهلر اوچون مهم یېم-خشک، آزیق-آوقت و درآمد منبعی حسابلنهدی. بیراق ییلاولردن حددن تشقری فایدهلنیش و بتهلرنی کېسیش اولرنینگ بوزیلیشیگه آلیب کېلگن.
فایو معلوماتلریگه کۉره، ۲۰۱۸-ییلدن بویان اوشبو لایحه آرقهلی بامیانده ۷۷ مینگ ۱۹۰ هکتاردن آرتیق ییلاو قَیته تیکلنگن.
تشکیلاتنینگ اَیتیشیچه، ییلاولرنی محافظه قیلیش، نوبتلب باقیش همده بېده و محلی یېم-خشک اۉسیملیکلری اوروغلرینی بېواسطه اېکیش ییلاولرنی قَیته تیکلش اوچون قۉللنیلهیاتگن اصوللردندیر.
فایو قۉشیمچه قیلیشیچه، اوشبو لایحه جماعهلرنینگ اقلیم اۉزگریشیگه چیدملیلیگینی آشیریش، قیشلاق عیاللرینی قۉللب-قوّتلش و چاروادار جماعهلرنینگ تورموش شرایطینی یخشیلش مقصدیده عملگه آشیریلماقده.
