ارزگان اهالیسی: آغاجان تۉغانی آچیلگنیدن ایکّی ییل اۉتیب هم ایشگه توشیریلمهگن
۸صبح، ارزگان
طالبان ایکّی ییل آلدین آغاجان تۉغانینی قوریشنی باشلهگنینی، بو تۉغان ۷۰ میلیون کوب متردن آرتیق سوونی سقلش قوّتیگه اېگه بۉلیشی و ۱۰۰ مینگ هکتاردن آرتیق یېرنی سوغاریشی اَیتیلگنینی بیلدیرهدی. بیراق حاضرگچه اونینگ قوریلیشی بۉییچه عملی ایشلر باشلنمهگن. اوشبو تۉغان طالبان باش وزیری اقتصادی مسألهلر بۉییچه اۉرینباسری عبدالغنی برادر و بو گروهنینگ بیر قطار باشقه منصبدار شخصلری اشتراکیده آچیلگن اېدی.
ترینکوت شهریده یشاوچی فیضالله زیارملنینگ اَیتیشیچه، طالبان دستلبکی کوننینگ اۉزیده اوشبو تۉغاننینگ باتفصیل لایحهسینی ایشلب چیقیش و تخنیکی-اقتصادی اساسلش تدقیقاتلرینی عملده باشلهگن، بیراق بیر مونچه وقت اۉتگچ، بو جریان تۉختهگن و حاضرگچه قَیته دوام اېتتیریلمهگن.
جناب زیارمل طالبان تامانیدن تۉغاننینگ آچیلیش مراسمیدن آلینگن صورتنی کۉرسهتیب، شوندهی دېیدی: «اگر بو صورتگه قرهلسه، هر کیم بو تۉغان قنچهلیک مهملیگینی و آدملر اونینگ قوریلیشیگه قنچهلیک قیزیقهیاتگنینی توشونهدی.»
ارزگانلیک بو یشاوچی شوندی دېیدی: «بیزنینگ بوتون تیریکچیلیگیمیز سووگه باغلیق. حاضر کۉریب توریبسیز، بوتون ولایتده سوو قوریب بارماقده و آدملر هر کونی بو بارهده تاباره کۉپراق معمالرگه دوچ کېلماقده. بو یېرده ایستهلگن کیشیدن سۉرهسنگیز، یگانه یېچیم آغاجان تۉغانینی قوریش اېکنینی اَیتهدی. بو لایحه یکونلنمهگونچه، بیز بوندهی معمالر بیلن کورهشیشده دوام اېتهمیز و حدودیمیزده قورغاقچیلیک کوندن-کونگه کوچهیهدی.»
ترینکوت شهری اهالیسی نصیبالله سعادتنینگ اَیتیشیچه، بو ییلگی قورغاقچیلیک اۉتگن ایکّی ییلگه نسبتاً کوچهیگن و اهالینینگ کۉپلب باغلری قوریب قالگن. اونینگ اَیتیشیچه، آدملر تیرینکات دریاسیده بوندهی تۉغان قوریلیشینی قریب ۴۰ ییلدن بېری کوتماقده، چونکه او قوریلسه، مینگلب جېریب اېکینچیلیک یېرلری سوغاریلهدی.
ترینکوتلیک بو یشاوچی قۉشیمچه قیلیشیچه، اوشبو تۉغان ارزگان اهالیسی، اینیقسه دهقانلر اوچون حیاتی اهمیتگه اېگه و لایحه عملگه آشیریلسه، ولایتدهگی اېکینچیلیک یېرلرینینگ سوو تنقیصلیگی معماسی کمهیهدی.
جناب سعادت دېیدی: «ایلگری آدملر ۲۰ جریب یېرنی اېکیشردی، اما بو ییل سوو یۉقلیگی سببلی اونینگ حتا یریمینی هم اېکه آلیشمهدی. آدملر سوو مسألهسیده جوده کۉپ معمالرگه دوچ کېلماقده. حکومت بو آدملرگه یاردم بېریشی و اولر اوچون سوو تأمیناتی تیزیمینی یرهتیشی کېرهک.»
شو بیلن بیرگه، سوو ساحهسی متخصصلری و مهندسلر هم ارزگان ولایتیدهگی آغاجان تۉغانینی مهم دېب حسابلب، طالبان اوشبو تۉغان قوریلیشینی استوار وظیفهگه ایلنتیریشی کېرهکلیگینی اَیتماقده.
سوو ساحهسی مهندسلریدن بیری سمیعالله حقملنینگ اَیتیشیچه، دوام اېتهیاتگن قورغاقچیلیک تشویشلی و بو معمانینگ آلدینی آلیشنینگ یگانه یۉلی سوو تۉغانلرینی قوریش دیر. اونینگ قۉشیمچه قیلیشیچه، تۉغانلر قوریلسه، حتا آز مقداردهگی یاغینگرچیلیک بیلن هم ییلنی آباد اۉتکزیش ممکن.
جناب حقمل دېیدی: «الله بیزگه یاغینگرچیلیکدن حاصل بۉلهدیگن سوونی باشقریب آلیشنی بویورگن. اگر تۉغانلر قوریلسه، ینه آباد ییلگه اېگه بۉلهمیز. فقط تۉغانلرگینه حاضرگی قورغاقچیلیک طفیلی یوزهگه کېلگن انقراضگه یېچیم تاپه آلهدی. طالبان ارزگان اهالیسی اوچون آغاجان تۉغانینی پُخته قوریشی ضرور.»
باشقه تاماندن، ارزگان ولایتیدهگی منبعلر اَیتیشیچه، اگر طالبان بو لایحهنی تۉغری عملگه آشیرسه، حاضر ترینکوت دریاسی آرقهلی آقیب، اوندن کېین هلمند دریاسیگه و او یېردن ایرانگه یېتیب بارهیاتگن طبیعی سوو آقیمی اوشلب قالینهدی همده سوونینگ بیر قِسمینینگ ایرانگه آقیب کېتیشینینگ آلدی آلینهدی.
عینی پیتده، بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (FAO) اۉزینینگ اېنگ سۉنگگی بهالشیده سوغاریش اوچون سوونینگ کېسکین تنقیصلیگی و اېکینچیلیک اۉغیتلری نرخینینگ آشیشی افغانستاندهگی دهقانلر آلدیده تورگن مهم معمالردن بیریگه ایلنگنیدن آگاهلنتیرگن.
