مزاردن کابل‌گچه؛ طالبلر همه جایده اېدی
شجاع امینی
سرپل و جوزجان ولایتلری سقوط قیلگندن سۉنگ، بلخ ولایتیگه کېلدیم. نېچه کون مزار شهریده قالدیم. کاشکی بو یېرده قالمه‌سم اېدی. مارشال دوستم و عطامحمد نورنینگ دشمننی ایزووچی بیانیه‌لریگه کۉنگیل بېرگن اېدیم، تۉستدن و بېردنگه بلخ ولایتی سقوط قیلیشینی، امکان‌سیز دېب اۉیله‌ردیم. شونینگدېک، جمهور رئیس غنی‌نینگ بلخ‌گه سفر قیلگنی و امنیت بۉییچه ییغین اۉتکزیشی، طالبلرگه قرشی اوروش پیامینی اویغاتدی. مزار شریف شهری هر بیر وقتدن کۉره اۉزیگه یالغیزلیک توسی آلگن اېدی. شهرده حاکم بۉلگن حال و احوال سقوطدن حکایت قیلردی؛ اما بلخ‌ده مارشال دوستم و عطامحمد نور باشچیلیگیده‌گی حربی کمیته‌نینگ بیانیه‌لری مردمگه اوروش و مقاومت پیامینی مخابره قیلردی گویا. هوا آرقلی کابل‌گه سفر قیلیشده تکت قیمتی کوتیلمه‌گن درجه‌ده کۉتریلگن. چهارشنبه، ۲۰- اسد، کابل‌گه کېلیش اوچون دوستلریمدن بیری بیلن تکت ساتووچیلرنینگ بیریدن پرواز تکتینی ساتیب آلدیم. اوچیش وقتی یک‌شنبه ۲۴اسد، بېلگیلنه‌دی و بلخ ولایتی سقوط قیلیشی بیلن کابل‌گه سفر قیلیشی زمینه‌سی برابر بۉلمه‌یدی. مزار یشاووچیلری، اینیقسه دولت مامورلری بای و به دولت کیشیلر بلخ ولایتی سقوط قیلمسدن بیر هفته آلدین بار و بستره‌لرینی باغلب کابل قره‌ب یۉل آلگنلر. شنبه، ۲۳ اسد، مزار شهری یشاووچیلری‌نینگ تشویشی آشگن. توشدن کېین مزار شهریگه کیریله دیگن خوفسیزلیک بېلباغ طالبلر تامانیدن تصرف قیلینگنی حقیده خبرلر چیقه‌دی، اوشبو بېلباغگه عطامحمد نور جنابلری شنبه ۲۳- اسد توشده باریب اۉز فیس‌بوکیدن قیسقه بیر بیانیه‌نی نشر قیلیب طالبلرگه قرشی کېسکین مقاومت قیلیشی حقیده گپیرگن اېدی. کېچقورون، همه جاینی قرانغو قاپله‌گن و خلق‌نینگ اېسه تشویشی و قورقووی آلدیندن کۉره کۉپراق بۉلگن. اۉرتاقلریمدن بیری خالد شهرچه‌سیده یشه‌یدی. اونینگ جاری وضعیت تۉغریسیده انیق معلوماتی بار. مېن بیلن تیلفونده باغله‌نیب دېدی: اوروش چیزیغی (خطی) سېنگن دیر و حاضر اېسه تانکلر و دولت نقلیه واسطه‌لری کاروانی خالد شهرچه‌سی یۉلیدن اوتماقده‌لر، بولر مارمول تاغلریگه می یا حیرتان بندریگه باره می انیق معلوم اېمس. بو خبرنی اېشیتیب حیرتده قالدیم. سرپل سقوطی شوکه‌سیدن هنوز اۉزیمگه کېلمه‌گن، بلخ سقوطی‌نینگ شوکه‌سیگه باته‌من. ایکّی کیشی اۉرتاقلریم بیلن خالدشهرچه‌سیگه باره‌میز. تکسینی توخته‌تیب شهرچه تامان یۉل یوریمیز. تکسی هیداووچی بو پیتگچه شهر سقوط قیلگنیدن هنوزگچه هیچ نرسه بیلمه‌یدی. طالبلر هنوزگچه شهرگه کیرمه‌گن دولت حربیلری هم شهرنی بوتونله‌ی تَرک قیلمه‌گنلر. شهرچه‌نینگ جاد‌ه‌سیده کۉپ مقدارده زرهلی تانکلرنینگ کاروانی کوزه‌تیله‌دی. اوشبو تانکلرنینگ نهایی مقصدی هم بیزلرگه معلوم اېمس. اۉرتاغیمیزنینگ اوییگه یېتیب باره‌میز. تمرکزیمیز فیس‌بوککه چېکله‌نیب قالگن. فیسبوکچیلرنینگ کۉپینچه‌سی بلخ ولایتی سقوط قیلگنینی نا تۉغری دېب، اونی دشمن‌نینگ تېگیرمانیگه سوو قوییش دېدیلر. خارج‌ده یشه‌یدیگن بلخ‌لیک خبرنگارلردن بیری، هر دقیقه فیس‌بوکیده خبر یازیب نشر قیله‌دی و شهر وضعیتینی تینچ تعریف اېته‌دی. کېینراق ۲۰۹ شاهین قول اردوسی اۉزیگه تېگیشلی قراوللرنی دشمنگه قۉیبرگن. دوستیم کۉپراق اطمینان حاصل قیلیش مقصدیده عطا محمدنورگه یقین آدملردن بیرگه زنگ اوره‌دی، او کیشی تیلفون آرقه‌سیدن: اېنگ یخشیسی اۉزلرینگیزنی خوفسیز بیرجایگه آلینگلر دېدی. بو سۉزلر نظریمیزده مزار شریف شهری پیکریگه اوریلگن اۉق کبی تویولدی. افسوس مزار شهری بوتونله‌ی سقوط قیلیب طالبلر قۉلیگه اۉتدی. شهر جیم جریت و طالبلر هنوزگچه شهرگه کیریشمه‌گن. اجتماعی صحیفه‌لرده آلدین – کېین نشر بۉله‌دیگن خبرلرده بلخ دولت کوچلری حیرتان بندری آرقلی اۉزبېکستان اولکه‌سیگه اۉتگنی ایتیله‌دی. بو خبر بیر آزدن سۉنگ عطامحمدنور فیس‌بوک صحیفه‌سیدن ترقه‌تیلگن خبر تصدیقله‌یدی. عطامحمد نور یېریک بیر فتنه بارلیگیدن خبر بېره‌دی و بو فتنه کابل‌ده‌گیلرگه هم متوجه لیگینی اشاره اېته‌دی. چمه‌سی یریم کېچه طالبلر شهرگه کیریب کېله‌دی و بیراغینی چهار راهه‌لردن بیریده تیکله‌یدی و بو صحنه‌دن یازیلگن عکسلر فیس‌بوک‌ده قۉلمه – قۉل.
مېن و دوستلریم کابل‌گه کېتیش سفر ریجه‌سینی ترتیب بېره‌میز. یک‌شنبه، 24 اسد دیر. تانگ آتیشی بیلن بار و بستره‌میزنی تیارلب کۉزله‌گن مقصد اوچون یۉلگه توشه‌میز. بیری همکاریم سرپل ولایتی‌نینگ اولسواللیکلریدن بیریده قره‌لاوچی (داستان) صفتیده وظیفه بجره‌دی وباشقه بیری اولسواللیکلردن بیریده اولسوال. خالد شهرچه جاده‌سی بوتونله‌ی جیملیک نغمه‌سی بیلن قاپلنگن. جاده‌لرده بیرته گینه هم نقلیه واسطه‌سی کۉرینمه‌یدی. فرعی بیر کۉچه‌نینگ چېتیده، پولیس‌نینگ یشیل رنگلی رینجر موتری توخته‌تیب قۉییلگن. اونی کۉریش بیلن خورسند بۉله‌من. موترده‌گیلر پولیس اېمس، عکسینچه اولر طالبلر اېکن.
کابل یۉلاووچی تشووچی موترلر بېکتیگه باریش اوچون تکسی تاپیلمه‌یدی. جاده‌نینگ بیر چېتیده قیزیل رنگلی بیر فولدر تیپلی موتر پارک اېتیلگن دیر و نېچه کیشی اېسه موترنینگ یانیده تورگنلر. همکاریم جاده‌نینگ اوتامانی باریب اولر بیلن گپیریشهدی. موتر بیر عایله‌نی کابل‌گه آلیب کېتیش اوچون بو یېرده تورگن. همکاریم موتر اېگه‌سینی بیزلردن بیریمیزنینگ کابل‌گه آلیب کېتیش اوچون قناعت بېره‌دی. قیسقه بیر مصلحتدن سۉنگ، مېن و همکاریم اولسوال موترگه مینیش اوچون راضلیک کۉرستدیک. موترنینگ ایلگری چوکیسینی ۴۰۰۰ مینگ مقابلیده دربَست آلدیک. هیداووچی ناچارلیگیمیزنی احساس قیلیب، بیزلردن سوء‌استفاده قیلدی. اېندی مېن و همکاریم قالگن. کېینراق باشقه بیر تکسینی دربست قیلیب یۉلاووچی تشووچی موترلر بېکتیگه جۉنه‌یمیز. همکاریم هیداووچیگه فرعی یۉللردن بېکتگه باریشنی ایسته‌یدی. فرعی جاده‌لردن بیرگه یېتیب کېله‌میز بو یېرده طالبلر تامانیدن موترلر تېکشیریله‌دی. طالبلرنینگ کتّه قسمی یۉل‌نینگ اۉرت‌سیده تورگنلر. اولرنینگ کییملری و تنه‌لری دهشتلی کۉرینه‌دی. تکسنی بیر یانده توخته‌تیب مېن و همکاریمنی موتردن توشیره‌دیلر. بیرچه‌نینگ باشیده قاره سله‌سی بار. همه‌سی پشتو تیلیده گپیریشهدی. اولرنینگ جسمانی تېکشیروولری هم زوروانلیک و غضب بیلن بیرگه. اېندی شهرگه کیرگن طالبلرنینگ سیماسیده بیر نوع ترتیب سیزلیک و قورقوو کۉرینه‌دی. جاده‌نینگ سۉل تامانیده یخشیگینه بیر گۉزل اوی قد راستلب تورگن. اوی‌نینگ اېشیگی لَنگ آچیق اونده طالبلر کوزه‌تیله‌دی. مېن سۉره‌مسدن، هیداووچی بو اوی افغانستان اسلامی وحدت حزبی رهبری محمد محقق نینگ یقینلریدن بۉلمیش سرپل سابق والیسی محمد ظاهر وحدتدن دېدی. طالبلر اېسه بو اوی‌نینگ تېکشیرماقده و احتمال بو اوینی اۉزلریگه حربی قرارگاه تنله‌گن بۉلسه.
یۉلاووچی تشووچی موترلر بېکتیگه یېتیب باره‌میز. سرپل ملی خوفسیزلیک ریاستی‌نینگ خادملریدن بیری هم بیز بیلن همراه بۉله‌دی. موتر کراسی اوچ برابرگه کۉتریلگن. هیداووچیلرنینگ معامله‌سی یۉلاووچیلری عکسینچه. اولرنینگ بورنیگه سروغ یېتمه‌یدی مسافرنینگ سلامینی اصلا علیک آلمه‌یدی. حیرتان بندری دو راهی یۉلی چېکه‌سیده قوراللنگن بیر قنچه طالبلر موتر سایکللری یانیده ییغیلیب تورگنلر. هیداووچی، بولر حیرتان بندریگه کېته‌دیلر و بلخ حربی کوچلریدن قالگن نقلیه واسطه‌لر و جهازلرنی غنیمتگه آلیب شهرگه انتقال بیره دیلر دېدی. سمنگان‌دن بغلان‌نینگ خنجان اولسواللیگیگچه طالبلر برچه یۉللر و جاده لرده کوزه‌تیله‌دی، لیکن یۉلاووچی تشووچی موترلرنی اونچه‌لیک قتیق نظارت و تلاشی قیلمه‌یدیلر. کابل، پروان و کاپیسا سقوط قیلگنیدن خبریمیز یۉق. هیداووچی، پل دوشاخ منطقه‌سیگچه طالبلر حضوری بار و پل دوشاخ‌دن او تامان دولت اختیاریده دېب ایتیب قۉیه‌دی. خنجان‌ده قیسقه بیر توختله‌میز و هتللردن بیریده شاشیلینچ حالتده آوقتلنه‌میز. سالنگلرگه کېلیشمیز بیلن یامان خبرلرنی اېشیته‌میز. همکاریم بیلن بیراو تیلفون آرقلی گپیریب طالبلر کابل‌نینگ دارالمان منطقه‌سیگه کیرگنیدن خبر بېره‌دی. قیغوله‌نیب کابل‌گه بۉلگن سفریمیزدن پیشمان بۉله‌میز. قنچه‌لیک یۉل باسیب ایلگری کیلمه‌لیک امنیتی کوچلر و سالنگ قۉریقچیلریدن هیچ کیمنی کۉرمه‌یمیز. تونللردن بیریده چمه‌سی تۉرت ساعت بند بۉلیب قالدیک. نه ایلگری کېتیب بۉله‌دی نه هم کېیین. هیداووچیلر موترلرنینگ تیز هیده‌شی و ترافیک قانونینی رعایت قیلمسلیک سبب موترلر بیر- بیری بیلن توقنشگن دېدی بو معمانی ییچیش اوچون محل‌ده هم هیچ بیر مسئول کیشی کۉرینمه‌یدی. سالنگلرنی قۉریقچی تیم برچه‌سی قاچیب کېتگن. خنجان اولسواللگیگه قۉنغیراق قیلیب طالبلردن کمک ایسته‌یدیلر. شو آنده دولت بۉلمه‌گنینی جوده یخشی حس قیله‌من. سالنگ مسووللری صحنه‌نی تَرک قیلیش بیلن، هیداووچیلر باریش – کېلیش قاعده‌سینی آیاغ آستی قیلگنلر و بو ایش اېسه تونل ایچیده ترافیک حادثه یوز بېریشیگه سبب بۉله‌دی.هیداووچیلرهم قیینچیلیکنی حل اېتیشدن عاجزلر و بیری – بیری نینگ گپیگه قولاق سالمه‌یدی. ساعتلب کوتیشدن سۉنگ طالبلر کیلیب قورال نینگ زوری بیلن یۉلنی آچیشگه موفق بۉله‌دی. سالنگ یۉلی جبل‌السراج‌گه بوتونله‌ی سکوت حکم سوره‌دی. نه هم امنیتی کوچلر و نه هم طالبلر کۉرینه‌دی. فقط قوراللنگن بیر کیشی جاده نینگ چیتیده ایکّی ایاققه تورگن. اوستیده شخصی کییمی بار و ساچلری هم یېلکه‌سیگچه آویزان. بو منطقه بیر وقتلر طالبانگه قرشی مقاومت‌نینگ مرکزی اېدی، حاضر اېسه اونی فقط بیر کیشی اداره قیلیب تورگن. عمومی جاده چېتیده ملی اردو تانکلری کوزه تیله‌دی. تانک نینگ دروازه‌لری لنگ آچیق تایرلری پنچر و بی هوا. بیزلردن اوزاقراق ایلگریده تورگن باشقه بیر دوستیم، تماس آلیب سۉره‌یدی و دېدی: چاریکار شهری هم سقوط قیلگن و طالبلر جاده‌لرده بار لر. کابل‌ده‌گی دوستلریدن بیری بیلن باغله‌نیب سۉره‌یمن، اونینگ ایتیشچه، آدملر قۉرققنلر همه قاچه‌دی دکانلر بازارده یاپق دیر. چاریکا شهریگه کېله‌میز. شهر هر بیر وقتدن کۉره گاجوم و تیقین دیر. طالبلر یۉل اوستیده صف تارتگنلر. خلق، اینیقسه یاشلر و ییگیتلر طالبلرنی تماشا قیلیب تورگنلر. طالبلر بیزنینگ موتریمیزنی توخته‌دی. هیداووچیدن قوراللی ایکّی کیشینی سرای شمالی‌گه یېتکزیشنی ایسته‌یدی. گپ سرای شمالی حقیده کېته یاتگنینی اېشیتیب، کابل سقوط قیلگنیگه ایشانچیمیز کامل بۉله‌دی. همکاریم مجور اۉرنینی المشتیره‌دی ایلگری چوکیده ملی خوفسیزلیک خادمی یانیده باریب اۉلتیره‌دی و مېن اېسه اۉرته‌ده‌گی چوکیده قاله‌من. قوراللی ایکّی کیشی مېنینگ یانیمنده اۉلتیره‌دیر. اولرنینگ بیریده “ام ۱۶” رسوملی قورالی بار و باشقه بیری اېسه بو قورالدن علاوه ینه ایکّی‌ته قورالنی هم بوینگیه آویزان قیلیب آلگن دیر. ایکّیسی‌نینگ هم گوده‌سی کتّه دیر و جوده قیینلیک بیلن موترگه جای بۉله‌دیلر. اولرنینگ سقاللری و قلین ساچلری بار. یوز تیره‌سیدن اچیق تیر آقه‌دی. بدنلریده هم قیشگی کیملری بار. یوز و تیره‌سی ترتیب سیز. هوا ایسقلیگی و بو ایکّی آدم نینگ تېر ایسی وضعیتمنی بوزیمسدن هم قیتمه‌یدی. هیداووچی بو طالبلردن قورال‌نینگ میلی شیشه‌گه تېگیب اونی سیندیرمسلیگی اوچون احیاط قیلیشنی ایسته‌دی. ایکّیسی هم پشتو تیلیده گپیریشهدی. فارسچه‌ده بیر آز گپیره‌آله‌دی. هوا ایسیق وقویاش اېسه هنوز یاروغلیک ساچه دیر. آچ و سووسیزلیکدن نالی دیلر. اولر بیزلردن اگر ممکن بۉلسه ایکّی بوتل سوو و بیر پاکت نسوار آلیب بېریشیمیزنی التماس قیله‌دی، بیرار نرسه ساتیب آلیش اوچون اۉز چونتکلریده پول یۉق. همکاریم بو ایکّی طالب ایسته‌گینی قبول قیله‌دی. بوتل‌نی سووینی ایچگندن کېین، قۉلیده‌گی ناسدن بیر آتیمنی آلیب باش برماغی بیلن سېکین گینه تیلی نینگ تگیگه قۉیه‌دی. قۉرقوونینگ برقی کۉزلریمدن پارله‌یدی. جانیم تېرلب کېتیشگن. رنگ و رخم اوچگن. ایلگری چوکیده اۉلتیرگن ایکّی دوستیم، گوشی نینگ چېکه‌سی بیلن انده سنده مېنگه باقیب قۉیه‌دی جیلمه‌یب کولیب هم قۉیه‌دی. طالبدن قاچه دېگن کېمسه، اېندی موتر ایچیده طالب‌نینگ قورشاویده قالگن. اصلا ذهنیگه کېلمه‌گن بیر یامان صحنه‌نی تجربه قیله‌یپمن. ایکّیسی هم تکرار اېته‌دی: الحمدالله همه جای فتح بۉلدی. پنجشیر هم فتح بۉلدیمی دېب سۉره‌یمن؟ تکرار اېته‌دی: همه جا فتح بۉلدی. اما، پنجشیر بولر اوچون اونچه‌لیک چینلگن تیار لقمه هم اېمس لیگینی بیله‌من. بیزلر سۉره‌مسدن آق دېدی: بو مجاهدلر سابق مجاهدلردېک اېمس، کۉپ فرقی بار. همکاریم کهنه‌کار و یاشی یېتیشگن بو ایکّی طالب بیلن یخشی صحبت قیله‌دی. بو ایکاویدن سۉره‌یدی قه‌یېرده حربی عملیاتلرینگیز بار اېدی؟ جواب بېریب: “بگرامده عملیاتیمیز بار اېدی تورمه‌ده‌گی مجاهدلرنی آزاد قیلماقچی اېدیک، اما دشمن یۉلده ماین اۉرنتگن اېکن، پارتلش نتیجه‌سیده آلتی مجاهد شهید بۉلدی دېدی” طالبلر هر نېچه قدمده نظارت پونکتلرینی اۉرنتگن. طالبلرنینگ کتّه مقداری تورلی خیل قوراللر بیلن مسلح بۉلیب یۉلده تورگنلر. بیزنینگ موتریمیزنی توخته‌دی. قوراللی بۉلگن بو ایکّی کیشینی موتردن توشیره‌دی. بو بویوک لشکر ایچیده فارسچه گپیره دیگن بیر کیشینی هم تاپیمه‌یسیز. همه پشتو تیلیده گپیریشهدی. بیزلر بیلن بیرگه کېلگن بو ایکّی طالب‌نینگ قورالل اسلحه‌سینی آلیش اوچون تلاش قیله‌دی نظارتده تورگن طالبلر. بو ایکّی نفر یالغان ایترکن. بولر بگرامده تورمه‌ده بۉلگن قماقخانه‌نینگ قفلینی سیندیریش بیلن قورالنی غنیمت آلیب طالبلرگه بېریشنی ایسته‌مس اېکن. بو ایکاوی: میدان وردک ولایتیدن میز فلان دلگی‌گه تیگیلیشیمیز و ییللر پروان ولایتی نینگ غوربند اولسوالیگیده جهاد قیلگنمیز دېدی. هر تامانگه قۉنغیراق اېته‌دیلر و لېکن تماسلری نتیجه بېرمه‌یدی. بیزلر یۉل اوستیده کوتیب توره‌میز و طالبلر اېسه بو ایکّی کیشینی اۉزلری بیلن بیرگه قورال ییغیش کمیته‌سیگه آلیب باره‌دی. بیر ساعتدن کیین کیلیب موترگه مینه دیلر. موترگه مینگندن سۉنگ، سېکین – سېکین طالبلرنی اۉغری دېیه خطاب قیله باشله‌یدیلر. بیرته‌سی نینگ قورالینی آله‌دی و باشقه بریسی نینگ آلمه‌یدی. اۉزی‌نینگ قورالینی تاپشیرمه‌گن کېمسه‌نینگ باشقه هم ایکّی‌ته قورالی بار، اونی موترده چوکی نینگ آستیده یاشیرگن. جوده نا تینچ میز. چوکیده میخله‌نیب قالگنمیز. ایاغلریمنی قورال‌نینگ ایکّی میلی اوستیگه قۉیگنمن و اۉزیم اېسه بو ایکّی‌نینگ اره‌سیده سوو بۉله‌من. شونگه قره‌مه‌ی قوراللر کۉریلمس‌لیگی اوچون بعضا مینگه وصیت هم قیلیب قۉیه‌دی. ثانیه‌لرنینگ اۉتیشی حتی روحیمگه هم آغیرلیک قیله‌دی. موترلر قۉی سوری کبی عمومی جاده‌لر اوستیده تورگن. موترلر اېندی بگرام تورمه‌سیدن آزاد بۉلگنلر بیلن لیق تۉله‌دی. طالبلر محبسلر مینیلگن موترلرنی نظارت بیکتیده توخته‌تیب تېکشیره‌دی. محبوسلر مینیلگن موترلردن بیری نظارت بېکتیده توخته‌مه‌ی اۉتیب کېتیشگه اولگوره‌دی، بو موتر طالبلرنینگ هواگه قر‌ته اوق اوزیشیگه باعث بۉله‌دی. تورمه‌دن چیققن محبوسلرنینگ برچه‌سیده قورال اسلحه‌سی بار. حتی اولر طالبلردن کۉره غضبلی‌راق کۉرینه‌دی. شمالدن کابل‌گه کېله دیگن تیز رفتار موترلرنی طالبلر چاریکار چوکیده توخته‌تیب قوتقریلگن محبوسلرنی زوردن موترلرگه میندیره‌دی.
انتظام سیزلیک طالبلر ایچیده تۉلقینله‌دی. بیر تاماندن، یېلکه‌لریده قورالی بۉلگن محبوسلرنی موترگه میندیریب کابل‌گه یوباره‌دیلر و باشقه بیر تاماندن ایسه چاریکار شهریدن قوییراقده نظارت پوسته‌سی ایجاد قیلگن طالبلر، قورال آلیب اۉتیش اوچون رخصت بېرمه‌یدی. نظارت پوسته‌لریدن بیرین کېتین اۉته‌میز و کابل‌گه یقینله‌شه‌میز. بو ایکّی کیشی قۉللریده‌گی شماره بیلن بیزنینگ تلفونیمیز آرقلی تماس آلماقچی بۉله‌دیلر. همکاریم بولرنینگ مرادینی برآورده قیلیب زنگ اوریب بېره‌دی. اولر ایناغه‌لری بیلن گپیریشهدی اولرنی کابل‌نینگ سرای شمالی منطقه‌سیده استقبال‌گه اونده‌یدی. بو ایکّی نفرنینگ ایناغه‌لرینی اویی کابل‌نینگ سرای شمالی منطقه‌سیده جایلشگن. سرای شمالینی کابل‌نینگ یوره‌گی دېسه بۉله‌دی. یعنی کابل‌نینگ یوره‌گیده هم طالبلر اویه قۉیگن دیر. سرای شمالی‌گه کېلیشیمیز بیلن هیداووچینی موترنی بیر چیکّه‌ده توخته‌تیشگه اونده‌یمیز. موترده‌گی قوراللنی جابجه ایتیش وقتیده بیراو کورمس‌لیگی اوچون اولگوریله‌دی. هیداووچی اونینگ اَیتگنلرینی ناچارلیک بیلن بجره‌دی. سرای شمالی هر بیر وقتدن کۉره تیقین و شاووقین سېسلر قولاقه چلینه‌دی. طالبلر جاده‌لرده شادلیککه غرق بۉلیب تورگن. دولت نقلیه واسطه‌لریگه مینیب هر تامانگه یوگوره‌دیلر. هر بیر کۉروچی بیلردیکی شهرده بوتونله‌ی آنارشیسم حاکم دیر. کابل هیچ بیر وقت منه شو کون دیک دلگیر و ماتم زده اېمس اېدی. تکسی‌گه مینیب شهرده‌گی هتللردن بیریگه بارماقچی بۉله‌میز. یَشش اوچون اتاق آلماقچی میز. تکسی‌دن پیاده بۉلگنیمیزده رفیقلریمدن بیری‌نینگ سمارت فونی اۉغیرلنگنیگه متوجه بۉله‌میز.
