طالبان قندهارده ۱۰ یاشدن کتّه قیزلر‌نینگ مکتبگه باریشینی تقیقله‌دی
۸صبح، قندهار: محلی منبعلر‌نینگ اَیتیشیچه، طالبان قندهار ولایتیده ۱۰ یاشدن کتّه قیزلر‌نینگ مکتبگه باریشینی تقیقله‌گن و سۉنگگی بیر آی ایچیده اوشبو ولایتده‌گی مکتبلردن قریب ۶۰۰ نفر قیزنی اویلریگه قَیترگن.
منبعلر شنبه کونی، ۹ عقرب، ۸صبح گزېته‌سیگه بېرگن معلوماتیده «هبت‌الله علمالر کېنگشی» طالبان‌نینگ قندهارده‌گی معارف باشقرمه‌سیگه آغزه‌کی کۉرسه‌تمه بېریب، یېتّینچی صنفدن قویی صنفلرده تحصیل آله‌یاتگن اۉقووچیلر‌نینگ شخصینی تصدیقلاوچی حجتلرینی تېکشیریشنی طلب قیلگنینی اَیتیشدی.
منبعلر‌نینگ اَیتیشیچه، اوشبو کۉرسه‌تمه‌گه موافق، حتا آلتینچی صنفده اۉقییاتگن بۉلسه هم، ۱۰ یاشدن کتّه قیزلرگه مکتبگه باریشگه رخصت بېریلمه‌یدی.
منبعلر قۉشیمچه قیلیشیچه، طالبان‌نینگ اوشبو ولایتده‌گی معارف باشقرمه‌سی، امر باالمعروف و نهی عن المنکر باشقرمه‌سی، طالبان علمالر کېنگشی همده مذکور گروه وکیللریدن عبارت قۉشمه کمیته اۉقووچیلر‌نینگ شخصینی تصدیقلاوچی حجتلرینی تېکشیرماقده.
منبعلرگه کۉره، طالبان سۉنگگی بیر آی دوامیده ۱۰ یاشدن کتّه‌لیگی و بۉیی بلندلیگی سببلی قندهارده‌گی مکتبلر‌نینگ بیرینچی صنفیدن آلتینچی صنفیگچه تحصیل آله‌یاتگن قریب ۶۰۰ نفر قیزنی اویلریگه قَیترگن.
منبعلر قندهارده‌گی «طالبان علمالر کېنگشی» بلاغت یاشینی ۱۲ یاش دېب حسابلشینی و شو سببلی اوشبو یاشگه یقینلشه‌یاتگن قیزلرگه زمانوی تعلیم آلیش اوچون اویدن تشقریگه چیقیشگه رخصت بېرمه‌یاتگنینی اَیتماقده.
بو حالت قویاش ۱۴۰۵ اۉقوو ییلی باشیده هم قندهارده‌گی اَیریم عایله‌لر طالبان یېتّینچی صنفدن قویی صنفلرده اۉقیدیگن قیزلر‌نینگ مکتبگه باریشیگه تۉسقینلیک قیله‌یاتگنی حقیده خبر بېرگن بیر پیتده یوز بېرماقده.
