قندهارده ایکّی سودا مرکزی بوزیلیشی؛ دوکاندارلر طالباندن یېتکزیلگن ضررنی قیتریشنی طلب قیلماقده
توریالی ودان
بو دوکاندارلر‌نینگ اَیتیشیچه، طالبان اولرگه دوکانلرینی امکان قدَر تېزراق بۉشه‌تیشلری کېره‌کلیگی حقیده خبر بېرگن. «میرو‌یس» و «روشن» ناملری بیلن هم تنیلگن اوشبو ایکّی سودا مرکزی ارگ بازاری حدودیده، بلدیه‌سی اداره‌سی بناسی و طالبان‌نینگ ولایت حاکمی اداره‌سی یقینیده جایلشگن.
قندهار شهری دوکاندارلری‌نینگ بیر قِسمی طالبان اولرنی اوشبو ولایتده‌گی مشهور ایکّی سودا مرکزینی بوزیش قراری حقیده خبردار قیلگنینی اَیتماقده. اولر‌نینگ سۉزلریگه کۉره، طالبان دوکاندارلردن سودا جایلرینی بۉشه‌تیشنی طلب قیلگن، بیراق حاضرگچه اولرگه ضرر قاپلب بېریلیشی حقیده هېچ نرسه دېمه‌گن. دوکاندارلر اوشبو ایکّی سودا مرکزی‌نینگ بوزیلیشی یوزلب کیشیلرنی ایشسیز قالدیریشی و خلق اقتصادیاتیگه ینه‌ده کتّه ضرر یېتکزیشینی تأکیدله‌ماقده.
دوکاندارلر‌نینگ اَیتیشیچه، اوشبو ایکّی سودا مرکزیگه قریب ۴۰۰ میلیون افغانی سرمایه کیریتیلگن. اولر‌نینگ فکریچه، بو مرکزلر‌نینگ بوزیلیشی اقتصادیاتیگه آغیر ضربه بېره‌دی و اۉنلب کیشیلرنی درآمد منبعلریدن اَیریلیش خوفی آستیده قالدیره‌دی.
دوکاندارلر طالباندن دوکانلرینی بوزیش عوضیگه اولرگه مناسب جای اجره‌تیب بېریشنی سۉره‌ماقده. شونده اولر سودا فعالیتینی دوام اېتتیریب، عایله‌لری‌نینگ تیریکچیلیگینی تأمینله‌ی آله‌دی.
بو آره‌ده قندهارده‌گی طالبان شهر حاکمیتی هم اوشبو ایکّی سودا مرکزینی بوزیش رېجه‌سینی تصدیقله‌گن. اوشبو طالبان اداره‌سی‌نینگ اَیتیشیچه، مرکزلر اۉرنیده ینگی و زمانوی توزیلیشگه اېگه ایکّیته ییریک سودا مجموعه‌سی قوریله‌دی.
طالبان شهر حاکمیتی حاضرگچه دوکاندارلرگه مقابل جای اجره‌تیش یاکه اولر‌نینگ دوکانلری بوزیلیشی عوضیگه تاوان پولی تۉله‌ش مسأله‌سیده هېچ قنده‌ی ایضاح بېرمه‌گن.
قندهار اهالیسی طالبان سۉنگگی بېش ییل دوامیده کۉپلب دوکانلر و تورر جایلرنی بوزگنینی، بیراق خلق ملکلرینی بوزیش و مجبوری روشده آلیب قۉییش عوضیگه ضرر قاپلش مسأله‌سیده جوابگرلیکنی اۉز ذمّه‌سیگه آلمه‌گنینی اَیتماقده. اولر بو حرکتلر‌نینگ عاقبتلریدن خواطر بیلدیریب، طالباندن آدملر‌نینگ ملکلرینی بوزیش عوضیگه عدالتلی تاوان پولی تۉله‌شنی همده بونده‌ی حرکتلر بیلن خلق آره‌سیده قشّاقلیک، ایشسیزلیک و آچرچیلیک‌نینگ ینه‌ده کوچه‌ییشیگه سبب بۉلمه‌سلیکنی سۉره‌ماقده.
بو حالت «افغان ویتنس» تدقیقات تشکیلاتی ۲۰۲۴-ییل نوامبر آییده اعلان قیلگن حساباتده طالبان شهر حاکمیتی ۲۰۲۱-ییل ۱۵-اگوستدن ۲۰۲۴-ییل ۱۵-اگوستگچه بۉلگن دورده کابل شهری‌نینگ ۲۲ ته ناحیه‌سیدن ۱۵ ته‌سیده قریب ۱ میلیون ۵۶۹ مینگ متر مربع یېرنی بۉشه‌تیب، تازه‌له‌گنی حقیده معلومات بېرگن بیر پیتده یوز بېرماقده. حساباتگه کۉره، بوزیب تشلنگن ملکلر‌نینگ ۴۴ فایزینی تورر جایلر، ۳۴ فایزینی نارسمی یشش منزللری، ۱۵ فایزینی تجارت انشااتلری و ۶ فایزینی اېکینچیلیک یېرلری تشکیل اېتگن.
حساباتده اَیتیلیشیچه، یېرلرنی بۉشه‌تیش و آزاد قیلیش جریانی کۉپلب عایله‌لر همده تدبیرکارلرنی باش‌پناه‌سیز قالیش و درآمد منبعلریدن اَیریلیش خوفی آستیده قالدیرگن. شونینگدېک، ضرر کۉرگن اَیریم عایله‌لر تۉلیق تاوان پولی آلالمه‌گن یاکه اۉزلری اوچون باشقه دایمی باش‌پناه تاپه آلمه‌گن.
