اوروش اۉلجه‌سیدن اندیواللرنینگ تۉپلنیش جاییگچه؛ پروانده طالبان والیسی‌نینگ کویاوینی لوازمگه تعیینلش اوستیده ماجرا
نیما
پروان ولایتیده‌گی محلی منبعلر‌نینگ اَیتیشیچه، طالبان‌نینگ اوشبو ولایتده‌گی والیسی عزیزالرحمان منصور، گروه نظارتیده‌گی بیر قطار اداره‌لر رهبرلرینی لوازمیدن آزاد اېتیب، اولر‌نینگ اۉرنیگه اۉزیگه یقین و قره‌م بۉلگن شخصلرنی تعیینله‌گن. منبعلرگه کۉره، او ولایتده‌گی بیر قطار مهم لوازملرنی دۉستلری، یقینلری و عایله اعضالریگه تاپشیرگن همده بو جریان هنوز دوام اېتماقده. منبعلر قۉشیمچه قیلیشیچه، طالبان والیسی عمکی‌بچه‌سینی گروه‌نینگ قیشلاقنی رواجلنتیریش باشقرمه‌سی رهبری، یقین دۉستلریدن بیرینی طالبان‌نینگ مالیه باشقرمه‌سی باشلیغی (مستوفی)، ینه بیر دۉستینی اېسه گروه‌نینگ بلدیه باشلیغی اېتیب تعیینله‌گن. شونینگدېک، او اۉز کویاوینی هم طالبان‌نینگ ایش و اجتماعی ایشلر باشقرمه‌سیگه تعیینلشگه اورینگن. بیراق بو اورینیش ایکّی تامان وکیللری اۉرته‌سیده قوراللی تۉقنه‌شووگه سبب بۉلگن و نتیجه‌ده گروه‌نینگ آلتی نفر جنگچیسی یره‌لنگن. منبعلر‌نینگ تأکیدلشیچه، طالبان‌نینگ اوشبو عملداری گروه نظارتیده‌گی دولت اداره‌لرینی دۉستلری و یقینلری‌نینگ تۉپلنیش جاییگه ایلنتیرگن. شونینگدېک، منبعلر طالبان اۉز نظارتیده‌گی دولت اداره‌لرینی «اوروش اۉلجه‌سی» دېب بیلیشینی و گروه‌نینگ هر بیر عملداری اۉز یقینلری همده صادق کیشیلرینی لوازملرگه تعیینلشنی اۉز حققی دېب حسابلشینی اَیتماقده. منبعلرگه کۉره، حاضرده سابق حکومت خادملرینی ایشدن بۉشه‌تیش جریانی اېنگ یوقاری درجه‌گه یېتگن و کۉپلب تجربه‌لی همده ملَکه‌لی خادملر اۉز وظیفه‌لریدن چېتله‌تیلگن.
منبعلر معلوماتیگه کۉره، طالبان‌نینگ قیشلاقنی رواجلنتیریش باشقرمه‌سی، بلدیه اداره‌سی، اسلامی تعلیماتلر بۉلیمی، طالبان‌نینگ تعلیم باشقرمه‌سی و مالیه باشقرمه‌سی عزیزالرحمان منصور اۉزیگه یقین و قره‌م شخصلرنی تعیینله‌گن اداره‌لر جمله‌سیدن دیر. منبعلر‌نینگ اَیتیشیچه، او عمکی‌بچه‌سی محمد امیننی طالبان‌نینگ قیشلاقنی رواجلنتیریش باشقرمه‌سی باشلیغی، یقین دۉستلریدن بیرینی اېسه گروه‌نینگ مستوفی‌سی اېتیب تعیینله‌گن.
منبعلر‌نینگ اَیتیشیچه، سۉنگگی کېلیشماوچیلیک پروان ولایتیده‌گی طالبان‌نینگ ایش و اجتماعی ایشلر باشلیغینی المشتیریش همده اونینگ اۉرنیگه عزیزالرحمان منصور‌نینگ کویاوی قاری ریحاننی تعیینلش مسأله‌سیده یوزه‌گه کېلگن. منبعلرگه کۉره، قاری ریحان حاضرده طالبان والیسی‌نینگ کاتبی صفتیده فعالیت یوریته‌دی. اولر‌نینگ قۉشیمچه قیلیشیچه، پروانده‌گی طالبان‌نینگ ایش و اجتماعی ایشلر بشالیغی قدرت‌الله ذاکر بو قرارگه قرشیلیک بیلدیرگن و عیناً شو مسأله اونینگ بیلن طالبان والیسیگه یقین شخصلر اۉرته‌سیده کېسکینلیکنی کېلتیریب چیقرگن.
منبعلر‌نینگ اَیتیشیچه، پروانده طالبان والیسیگه یقین شخصلردن بیری حضرت‌الله خالد اوشبو کېلیشماوچیلیکده مهم رۉل اۉینه‌گن. عزیزالرحمان منصور اونگه طالبان‌نینگ ایش و اجتماعی ایشلر باشلیغینی استعفاگه چیقیشگه مجبورلش وظیفه‌سینی تاپشیرگن. منبعلرگه کۉره، حضرت‌الله خالد سابق حربی خدمتچیلر‌نینگ بیر نېچه بار اۉلدیریلیشیده هم اشتراک اېتگن. اینیقسه منبعلر اونی طالبان حاکمیتنی اېگه‌للب آلگنیدن کېین سابق حکومتده‌گی قوملر و قبیله‌لر باشقرمه‌سی‌نینگ سابق باشلیغی آغاشیرین‌نینگ اوکه‌سینی اۉلدیریشده اشتراک اېتگنلیکده عیبله‌یدی.
منبعلر قۉشیمچه قیلیشیچه، اوشبو کېلیشماوچیلیک آرتیدن ایکّی تامان‌نینگ قوراللنگن شخصلری حرکتگه کېلگن و طالبان والیسیگه یقین کیشیلر بیلن گروه‌نینگ ایش و اجتماعی ایشلر باشلیغی‌نینگ قۉریقچیلری اۉرته‌سیده تۉقنه‌شوو یوز بېرگن. منبعلرگه کۉره، اوشبو حادثه‌ده ایکّی تامان‌نینگ کمیده آلتی نفر وکیلی یره‌لنگن. بیراق قربانلر سانی و اولر‌نینگ احوالی حقیده انیق تفصیلاتلر حاضرچه معلوم اېمس.
منبعلر‌نینگ اَیتیشیچه، پروانده‌گی طالبان والیسی یوقاریده قید اېتیلگن اداره‌لرده گروه‌نینگ محلی رهبرلرینی المشتیریشدن تشقری، باشقه بیر قطار محلی عملدارلرنی هم لوازمیدن آزاد اېتیب، اولر‌نینگ اۉرنیگه باشقه شخصلرنی تعیینله‌گن. اولر‌نینگ اَیتیشیچه، ایلگری پنجشیردن بۉلگن طالبان‌نینگ حج و اوقاف باشلیغی لوازمیدن چېتله‌تیلیب، اونینگ اۉرنیگه باشقه شخص تعیینلنگن.
منبعلرگه کۉره، او طالبان‌نینگ بامیانده‌گی سابق بلدیه باشلیغی و یقین دۉستلریدن بیری مولوی روزی‌محمد افکارنی هم باشقه جایگه اۉتکزیش آرقه‌لی چاریکار شهری‌نینگ ینگی حاکمی اېتیب تعیینله‌گن.
شونینگدېک، طالبان‌نینگ اسلامی تعلیماتلر بۉییچه سابق بۉلیم باشلیغی مولوی شیراجان لوازمیدن آزاد اېتیلگن و اونینگ اۉرنیگه ایلگری مسجدلردن بیریده امام بۉلیب ایشله‌گن مولوی طاهر تعیینلنگن.
منبعلر قۉشیمچه قیلیشیچه، طالبان‌نینگ جسمانی تربیه بۉلیمی باشلیغی هم عزیزالرحمان منصور تامانیدن المشتیریلگن و مولوی انصارالله اسملی شخصنی اوشبو اداره‌‌نینگ ینگی مسؤولی اېتیب تعیینلش تۉغریسیده رسمی خط چیقریلگن. بیراق بو تعیینلاو حاضرگچه یکونی تصدیقدن اۉتمه‌گن. منبعلرگه کۉره، طالبان‌نینگ نفت و گاز بۉلیمی باشلیغی هم المشتیریلگن و اونینگ اۉرنیگه طالبان والیسیگه یقین شخصلردن بیری تعیینلنگن.
عزیزالرحمان منصور بوندن آلدین طالبان‌نینگ پکتیا ولایتیده‌گی والیسی اۉرین‌باسری، کېینچه‌لیک اېسه گروه‌نینگ ارشاد، حج و اوقاف وزیرلیگیده دینی و تصوفی مرکزلرنی موافقلشتیریش بۉییچه اۉرین‌باسری صفتیده فعالیت یوریتگن.
عینی پیتده، سۉنگگی بېش ییلدن آرتیق وقت دوامیده عامه‌وی اخبارات واسطه‌لریده اعلان قیلینگن کۉپلب خبرلر و ۸صبح گزېته‌سی‌نینگ سوریشتیروولری طالبان دولت لوازملریگه اۉزیگه قره‌م و صادق شخصلرنی کېنگ مقیاسده تعیینلب کېله‌یاتگنینی کۉرسه‌تگن. ۸صبح گزېته‌سی‌نینگ سوریشتیروو حساباتلریدن بیری نتیجه‌لریگه کۉره، طالبان نظارتیده‌گی یۉل حرکتی باشقرمه‌سی قومی انحصارگه و میدان وردک همده قندهار ولایتلریدن بۉلگن شخصلر‌نینگ اوستونلیگیگه اساسلنگن مرکزگه ایلنگن. اوشبو معلوماتلرگه کۉره، مذکور باشقرمه‌ده‌گی رهبرلر، بۉلیم باشلیقلری و مهم خادملر‌نینگ قریب ۸۰ فایزی میدان وردک ولایتیدن. شونینگدېک، برچه رهبرلیک لوازملری و بۉلیم باشلیقلری ا‌ۉرینلری وردک و قندهاردن بۉلگن پشتونلر قۉلیده. حسابات نتیجه‌لری شونی کۉرسه‌ته‌دیکی، یۉل حرکتی باش باشقرمه‌سیده‌گی جمعی ۲۱ ته باشقرمه و بۉلیم باشلیغی لوازمیدن ۱۸ ته سی میدان وردک ولایتیدن بۉلگن شخصلرگه تېگیشلی.
بوندن آلدین هم ۸صبح گزېته‌سی سوریشتیروو حساباتیده طالبان‌نینگ نیمروز ولایتیده‌گی تعلیم باشقرمه‌سی رهبری اۉزی‌نینگ ۱۷ نفر قرینداشینی اوشبو باشقرمه‌گه ایشگه تعیینله‌گنینی انیقله‌گن اېدی. حسابات نتیجه‌لری بو شخصلر‌نینگ اَیریملری پول تۉله‌ش عوضیگه هم مذکور لوازملرگه تعیینلنگنینی کۉرسه‌تگن.
شو بیلن بیرگه، ۲۰۲۶-ییلگی اوزگریش حالتی (BTI) حساباتیده افغانستان حقیده قید اېتیلیشیچه، طالبان دولت اداره‌لریگه خادملرنی تنلش و تعیینلشده اولر‌نینگ کسبی مهارتی، ملَکه‌سی و ایش تجربه‌سیدن کۉره، گروهگه صادقلیگی و اونگه قره‌ملیگیگه کۉپراق اعتبار قره‌ته‌‌دی. حساباتگه کۉره، ملالر و طالبانگه یقین شخصلر قرار قبول قیلیش همده اجرا توزیلمه‌لریده تاباره مهم‌راق رۉل اۉینه‌ماقده، عینی پیتده سابق حکومت‌نینگ کۉپلب ملَکه‌لی و تجربه‌لی خادملری اداری توزیلمه‌لردن چېتلشتیریلگن.
