انسان حقلرینی کۉزهتووچی تشکیلاتی: پاکستان انسان حقوقلری بۉییچه اۉز مجبوریتلریگه ضد روشده افغانستانلیک طلبهلر بیلن معامله قیلماقده
۸صبح
انسان حقوقلری کۉزهتوو تشکیلاتی پاکستاندن طبیات یۉنهلیشیده تحصیل آلهیاتگن افغانستانلیک طلبهلرنی چیقریب یوباریلیشیدن خواطر بیلدیریب، بو مملکت هېچ قندهی آلدیندن آگاهلنتیرمسدن، برچه طبیات و ستوماتولوژی اۉقوو موسسهلریگه افغانستانلیک طلبهلرنی چیقریب یوباریش و اولرنینگ افغانستانگه قَیتیشی اوچون شرایط یرهتیش حقیده بویروق بېرگنینی اَیتدی. اوشبو حقوقنی حمایه قیلووچی تشکیلاتنینگ اَیتیشیچه، بو پاکستان رسمیلرینینگ افغانستان وطنداشلرینی مملکتدن زودلیک بیلن چیقریب یوباریش بۉییچه سۉنگگی چارهسی حسابلنهدی.
اوشبو تشکیلاتنینگ قۉشیمچه قیلیشیچه، قیز طلبهلرنی افغانستانگه قَیتریش اولرنینگ شفاکار بۉلیش امکانیتیدن محروم بۉلیشینی انگلهتهدی؛ چونکه طالبان عیاللرنینگ بیلیم یورتلرده تحصیل آلیشی و طبی تعلیم آلیشلرینی تقیقلهگن.
انسان حقوقلری کۉزهتوو تشکیلاتی قۉشیمچه قیلیشیچه، پاکستاندهگی طبیات تعلیم مؤسسهلری هم افغانستان وطنداشی بۉلگن طلبهلرنی ینگی قبول قیلیشنی تۉختهتگن. لاهوردهگی «کینگ ادوارد» طبیات بیلیم یورتی ۲۰ نفر طبیات طلبهسی، جملهدن، تۉرت نفر عیال و یېتّی نفر بیتیرووچی کورس طلبهسی، چیقیب کېتیش جریانینی یکونلش اوچون ۲۴ ساعت ایچیده مراجعت قیلیشلری حقیده کۉرسهتمه بېرگن.
پاکستان نادولت انسان حقوقلری کمیسیونی لاهورده طبیات و ستوماتولوژی یۉنهلیشلریده تحصیل آلهیاتگن قریب ۱۰۰ نفر طلبه اوشبو قراردن تأثیرلنیشی ممکنلیگینی تخمین قیلگن. اولرنینگ ۲۰ نفردن ۴۰ نفرگچهسینی عیاللر تشکیل اېتهدی. اوشبو طلبهلرنینگ اَیریملری اوشبو تشکیلاتگه مراجعت قیلیب، یقینلشیب کېلهیاتگن چیقریب یوباریلیشدن قۉرقهیاتگنلری سببلی خوفسیز باشپناه و حقوقی یاردم سۉرهگن.
انسان حقوقلری کۉزهتوو تشکیلاتی پاکستان «اقتصادی، اجتماعی و مدنی حقوقلر تۉغریسیدهگی خلقارا میثاق»گه اعضا دولت صفتیده عالی تعلیمدن تېنگ فایدهلنیش امکانیتینی لیاقت اساسیده و کمسیتیشلرسیز کفالتلشی شرطلیگینی اَیتگن. اوشبو شرطنامهنینگ بجریلیشینی نظارت قیلووچی بیرلشگن ملتلر تشکیلاتی کمیتهسی پکت دایرهسیدهگی حمایه چارهلری فقرالیگی بۉلمهگن شخصلرنی هم قمرهب آلیشینی و اولرنینگ مهاجرت مقامی بو بارهده فرق یرهتمسلیگینی تأکیدلهگن. اوشبو تشکیلاتنینگ اَیتیشیچه، تحصیل آلهیاتگن طلبهلرنی فقط افغانستانلیک بۉلگنی اوچون چیقریب یوباریش اوشبو مجبوریهتلرگه ضددیر.
انسان حقوقلری کوزهتوو تشکیلاتی بوندن اوّل هم پاکستان رسمیلری تامانیدن یوز مینگلب افغانستان فقرالرینینگ اۉزباشیمچهلیک بیلن حبسگه آلینیشی و مجبورا قَیتریلیشینی حجتلشتیرگن؛ بو شخصلرنینگ کۉپچیلیگی پاکستانده اۉنلب ییللر دوامیده یشهگن.
پاکستان، شونینگدېک، «مجبوری قَیترمسلیک» (نانرفولمان) عمومی تمایلیگه رعایه قیلیشی شرط. بو تمایل تعقیب، قییناقلر یاکه باشقه جدّی ضرر کۉریش خوفی حجتلر بیلن تصدیقلنگن شخصلرنی مجبورهن قَیتریشنی تقیقلهیدی. اوّل پاکستاندن چیقریب یوباریلگن افغانستانلیک باشپناه ایزلاوچیلر تېگیشلی روشده تېکشیریلمهگنی و بهالنمهگنی سببلی، اولرنینگ قنچهسی افغانستانگه قَیتگن تقدیرده طالبان تامانیدن تعقیبگه اوچرهش خوفیگه دوچ کېلیشی نامعلوم.
انسان حقوقلری کوزهتوو تشکیلاتی پاکستان رسمیلری اوشبو طلبهلرنی قَیتریش حقیدگی بویروقلرنی بېکار قیلیشی، اولرنینگ تعلیم مقامینی قَیته تیکلشی، افغانستانلیک طلبهلرنی قبول قیلیشگه نسبتاً کمسیتووچی تقیقنی بېکار قیلیشی و طلبهلر پاکستانده قانونی روشده قالیب، تعلیملرینی یکونلشلری ممکنلیگینی تأمینلشی کېرهکلیگینی اَیتگن. تشکیلاتنینگ قۉشیمچه قیلیشیچه، هر بیر طلبهنینگ حمایهگه بۉلگن احتیاجی علیحده بهالنیشی و یاردمگه محتاج شخصلرگه، اینیقسه طالبان تامانیدن تعقیب قیلینیش خوفی یوقاری بۉلگن عیاللرگه خوفسیز باشپناه تقدیم اېتیلیشی کېرهک.
اوشبو تشکیلات پاکستان بۉلهجک شفاکار تعلیملرینی یکونلشلریگه امکان بېریشی کېرهکلیگینی اَیتگن؛ بو نهفقط اولرنینگ کېلهجگی، بلکه کېلهجکده پاکستانده یاکه افغانستانگه قَیتیش اولر اوچون خوفسیز بۉلگن پیتده افغانستانده سان-سناقسیز انسانلرنینگ حیاتینی سقلب قالیشی یاکه ساغلیغینی یخشیلشی ممکن بۉلگنلری اوچون هم مهمدیر.
