طالباننینگ انکاری و پاکستاننینگ قطعی طلبی؛ تیتیپینینگ ۱۰ اعضاسی جسدی افغانستانگه آلیب اۉتیلدی
۸صبح، لوگر
لوگر، پکتیا، بغلان و میدان وردک ولایتلریدهگی ایشانچلی منبعلر ۸صبح گزېتهسیگه تصدیقلشیچه، افغانستان طالبانینینگ کمیده ۱۰ نفر جنگچیسی جسدی، پاکستان طالبان حرکتی اعضالری بیلن بیرگه اوشبو مملکت خوفسیزلیک کوچلریگه قرشی جنگ قیلگن بو جنگچیلرنینگ جسدلری سۉنگگی بیر هفته ایچیده چېگره حدودلریدن اوشبو ولایتلرگه آلیب کېلینگن.
لوگر ولایتیدهگی ایشانچلی منبعلردن بیری اَیتیشیچه، اوشبو ولایتنینگ محمد آغا تومنیده یشهگن طالباننینگ تۉرت نفر اعضاسی جسدی پاکستاننینگ خیبرپختونخوا ایالتیگه قرهشلی کرم حدودیدن لاگر ولایتیگه آلیب کېلینگن.
منبع قۉشیمچه قیلهدی: «بو شخصلرنینگ جسدلری اۉلدیریلگنیدن قریب اوچ کون اۉتیب، تۉقنهشوو جاییده قالیب کېتگن و کېچه لوگرگه آلیب کېلینگن. اۉلدیریلگن تۉرت کیشینینگ برچهسی یاش بۉلگن و اولر لوگردهگی طالبان حربی کوچلری صفیده خدمت قیلگن.»
شو بیلن بیرگه، پکتیا و میدان وردک ولایتلریدهگی منبعلر هم تۉرت نفر طالبان جنگچیسی جسدینینگ اوشبو ایکّی ولایتدهگی چک، نرخ و زرمت تومنلریگه آلیب کېلینگنی حقیده خبر بېرگن. منبعلرگه کۉره، بو شخصلر پاکستان حدودیگه کیریشگه اورینگن پیتده شمالی وزیرستاندهگی چېگره حدودلریده پاکستان خوفسیزلیک کوچلرینینگ پیستیرمهسیگه توشیب، هلاک بۉلگن.
اوّلراق بغلان ولایتیدهگی منبعلر هم اوشبو ولایت اهالیسی بۉلگن، طالبان اعضالری و پاکستان کوچلری بیلن جنگلرده هلاک بۉلگن ایکّی کیشینینگ جسدی بغلانده آلیب کېلینگنینی تصدیقلهگن اېدی. منبعلرگه کۉره، بو شخصلر پاکستان طالبان حرکتی اعضالری بۉلیب، طالبان افغانستانده حاکمیتگه کېلگنیدن سۉنگ اوشبو گروه صفیگه قۉشیلگن. منبعلر اولردن بیری وایهگه یېتمهگن بۉلگنینی هم قۉشیمچه قیلگن.
۸صبحنینگ بیر نېچه حساباتلری نتیجهلری شونی کۉرسهتهدی که پاکستان طالبان حرکتی اعضاسی بۉلگن و عینی پیتده افغانستان طالبانی ترکیبیده هم بۉلگن جنگچیلر جسدلرینینگ مملکتگه آلیب کېلینیشی بیرینچی مرته صادر بۉلهیاتگنی یۉق. بونگچه هم طالبان اعضالرینینگ جسدلری بیر نېچه بار چېگره ولایتلریگه، اینیقسه افغانستاننینگ شرقی ولایتلریگه آلیب کېلینگن.
اوّلراق منبعلر تیتیپینینگ ایکّی مینگدن آرتیق عایلهسی چېگرهالدی حدودلریگه کۉچیریلگنینی تصدیقلهگن اېدی. شونینگدېک، ۸صبح گزېتهسینینگ بیر حساباتیده کېلتیریلگن معلوماتلرگه کۉره، طالبان پاکستان طالبان حرکتی و ال-قاعده اعضالری اوچون غزنی ولایتیده تۉرتته تورر جای شهرچهسی قورگن.
بیرلشگن ملتلر تشکیلاتی خوفسیزلیک کېنگشی کۉزهتیش گروهینینگ ۲۰۲۵-ییل فبروری آییده اعلان قیلینگن ۳۵-حساباتیده هم طالبان پاکستان طالبان حرکتی (تیتیپی) اوچون هنوزگچه اۉپراتیف و لاگیستیکه امکانیتلری همده مالیوی یاردم تقدیم اېتهیاتگنی کۉرسهتیلگن. حساباتگه کۉره، تیتیپی کۉریب چیقیلگن دورده پاکستانگه قرشی ۶۰۰ دن آرتیق هجوم عملگه آشیرگن بۉلیب، اولرنینگ اَیریملری افغانستان حدودیدن صادر اېتیلگن. حساباتده، شونینگدېک، کونر، ننگرهار، خاصت و پکتیکه ولایتلریده تیتیپینینگ ینگی اۉقوو مرکزلری تشکیل اېتیلگنی و افغانستان طالبانی صفیدن جنگچیلر جلب قیلینیشی کوچهیگنی قید اېتیلگن.
حساباتده اَیتیلیشیچه، تیتیپی هجوملرینی کوچهیتیریش بیلن بیر وقتده کنر، ننگرهار، خوست و پکتیکانینگ برمل حدودیده ینگی اۉقوو مرکزلرینی تشکیل اېتگن همده جنگچیلر، جملهدن افغانستان طالبانی صفیدن اعضالرنی جلب قیلیش جریانینی کوچهیتیرگن. شونینگدېک، تتپ، افغانستان طالبانی و هندوستان یریمارالیدهگی القاعده اۉرتهسیدهگی همکارلیک کوچهیگن و اوشبو گروهلر اَیریم هجوملرده «پاکستان جهاد حرکتی» نامی آستیده فعالیت یوریتگن.
