طالباننینگ ترغیبات تاکتیکی؛ جبههلر اۉرتهسیدهگی کېلیشماوچیلیکلرنی کوچهیتیریش و خلق اوروشیدن قۉرقوو اویغاتیش
نیما
طالبان باش استخبارات باشقرمهسیدن چیققن حجتلر اوشبو گروه کېنگ کۉلملی ترغیبات و میدیا دستورینی عملگه آشیریش اوچون ۷۰ میلیون افغانیدن آرتیق مبلغ اجرهتگنینی کۉرسهتهدی. بو گروه مخالف جبههلرنی ضعیف قیلیب کۉرسهتیش، سابق سیاسی رهبرلر و اولرنینگ طرفدارلری اۉرتهسیده کېلیشماوچیلیک یرهتیش، طالبان حاکمیتی اغدریلگن تقدیرده خلق اوروشی و قومی اوروش قَیتیشیدن قۉرقوو اویغاتیش همده اوشبو گروهنی یېنگیلمس قیلیب کۉرسهتیش اوچون میدیا و ساخته اکونتلردن فایدهلنهدی. اوشبو حجتلرده، شونینگدېک، مخالفلرنینگ آبروسینی توشیریش، طالبان و پاکستان اۉرتهسیدهگی کېلیشماوچیلیکلرنی بۉرتتیریب کۉرسهتیش، طالبان رژیمی حقیده ایجابی تصور یرهتیش همده اونگه قرهشلی یېتکرمه و مستعار اکونتلر آرقهلی جماعتچیلیک فکرینی باشقریشگه اورغو بېریلگن. طالبان اوشبو ترغیبات اصولی دایرهسیده اجتماعی ترماقلر و یېتکرمهده قریب ۱ مینگ ۵۰۰ ته ساخته اکونتگه اېگه بۉلیب، اوشبو گروه استخباراتی بو یېتکرمه فعالیتینینگ یۉنهلیشینی بېلگیلهیدی. شونینگدېک، حجتگه کۉره، اوشبو یېتکرمه پاکستاننینگ اقتصادی ضعیفلیگی و مملکت رهبرلری اۉرتهسیدهگی کېلیشماوچیلیکلر حقیده ماتریاللر تیّارلشی، شونینگدېک، خارجده یشهیاتگن و طالبان مقصدلریگه هماهنگ بۉلگن شخصلر حقیده هم خبرلر تیّارلب، خارجده اوشبو گروه حقیده ایجابی تصور یرهتیشی کېرهک.
طالباننینگ ترغیبات مقصدلری
طالبان باش استخبارات باشقرمهسی عملیات باشقرمهسی اۉرینباسرینینگ اوشبو گروهنینگ «یېتکرمه و فایدهلنووچی اکونتلری» سرلوحهسی آستیدهگی ترغیبات اسلوبینی توشونتیرووچی تاکتیک قۉللنمهسینینگ بیر نسخهسی یقینده جماعتچیلیککه چیقدی. حجتده طالباننینگ اساسی مقصدی مخالف و بو گروهگه قرشی حربی کوچلر اۉرتهسیده ایشانچسیزلیک یرهتیش اېکنی قید اېتیلگن.
اوشبو مکتوبده طالبان استخباراتی ۱۰ ته اساسی مقصدنی بېلگیلهگن و اوندن سۉنگ یېتکرمه همده ساخته اکونتلرگه اېگه شخصلر تیلگه آلینگن. حجتنینگ ایکّینچی بندیده طالبان اوشبو یېتکرمه و ساخته آنلاین فایدهلنووچیلر آرقهلی مخالف گروهلر، خصوصاً، مخالف جبههلر همده اولرنی قۉللب-قوّتلاوچی شخصلر و دایرهلر اۉرتهسیده کېلیشماوچیلیک یرهتیشی و موجود اختلافلردن فایدهلنیشی کېرهکلیگی اَیتیلگن.
مخالفلر اۉرتهسیده کېلیشماوچیلیک یرهتیش
حجتنینگ اوچینچی بندیده یالغان ترغیباتلرنی ترقهتیش آرقهلی خلق و یاشلرنینگ طالبانگه قرشی جبههلرگه قۉشیلیشینینگ آلدینی آلیش کېرهکلیگی قید اېتیلگن. تۉرتینچی بندده اېسه طالبان رژیمینینگ یېنگیلمسلیگینی کۉرسهتیشگه قرهتیلگن قرهشلر و ترغیباتلرنی یېتکرمه آرقهلی ترقهتیشگه اورغو بېریلگن.
حجتنینگ بېشینچی بندیده خارجی مملکتلرده تېگیشلی خبر و ماتریاللرنی ترقهتیش آرقهلی طالبان رژیمی حقیده ایجابی تصور یرهتیش کېرهکلیگی اَیتیلگن. آلتینچی بندده اېسه اوشبو یېتکرمه ترغیباتی آرقهلی پاکستانگه قرشی روحی فعالیت آلیب باریش همده همکارلیک و گومانیتار یاردمدن طالبان منفعتلری یۉلیده فایدهلنیش کېرهکلیگی تأکیدلنگن.
ترغیباتده نفوذلی شخصلردن فایدهلنیش
حجتنینگ یېتّینچی بندیده سیاسی تحلیلچیلر، ژورنالیستلر و باشقه نفوذلی شخصلرنی جلب قیلیش همده اولرنی طالبان رژیمی فایدهسیگه ترغیبات آلیب باریش و مخالفلر ترغیباتینی ضررسیزلنتیریش یۉلیده ایشلهتیش اوشبو گروهنینگ تاکتیک ترغیبات اصولیدهگی باشقه مقصدلردن بیری اېکنی قید اېتیلگن.
اوشبو گروه حجتنینگ سکّیزینچی بندیده یېتکرمهلر آرقهلی کېلیشماوچیلیکلرنی اوج آلدیریش و اولرنی بۉرتتیریب کۉرسهتیش یۉلی بیلن طالبان مخالفلری کوچلرینینگ بیرلشیشی و بیردملیگینینگ آلدینی آلیشگه اورغو بېرگن.
طالبان مخالف جبههلرینینگ آبروسینی توشیریش
طالبان رزوېدکهسی حجتنینگ تۉقّیزینچی بندیده طالبان مخالف گروهلری، خصوصاً، طالبانگه قرشی جبههلرنینگ پاکستان بیلن علاقهلری حقیده خبرلر ترقهتیش و بو حالتلرنی بۉرتتیریب کۉرسهتیش کېرهکلیگینی اَیتگن. مقصد خلقده بو جبههلر پاکستانگه قرهم دېگن تصور اویغاتیشدن عبارت.
حجتنینگ اۉنینچی بندیده اېسه عاموی اخبارات واسطهلری خبرلری و فعالیتی آرقهلی پاکستان حربی رژیمیگه قرشی ترغیباتدن همده موجود معمالر و ناراضیلیکلرنی بۉرتتیریب کۉرسهتیشدن فایدهلنیشگه اورغو بېریلگن.
پاکستانگه قرشی ترغیبات
اوشبو حجتلردن بیریده، شونینگدېک، پاکستاندهگی وضعیت و بو گروهگه قرشی جبههلرنینگ اوشبو مملکتدهگی فعالیتی، خصوصاً، «آزادلیک جبههسی» و او بیلن باغلیق مسألهلر حقیده خبر و ماتریاللر تیّارلش کېرهکلیگی اَیتیلگن. شونینگدېک، طالبان رهبریتیدهگی کېلیشماوچیلیکلرنینگ سلبی عاقبتلری و اولرنینگ طالبان رژیمیگه تأثیری حقیده خبر و مقالهلر چاپ اېتیشگه اورغو بېریلگن.
شونینگدېک، طالبان کوچلری حقیده خبرلر تیّارلش، تورلی حدودلرده اوشبو گروهگه قرشی جبههلرنینگ موجودلیگینی یالغان دېب کۉرسهتیش و انکار اېتیش کېرهکلیگی اَیتیلگن. حجتگه کۉره، اوشبو گروهگه بۉیسونهدیگن عاموی اخبارات واسطهلری منطقه مملکتلرینینگ پاکستان و افغانستان بیلن باغلیق فعالیتی حقیده هم خبرلر تیّارلشی و طالبان فعالیتینی بۉرتتیریب کۉرسهتیشی کېرهک.
ایچکی اوروشدن قۉرقوو اویغاتیش
طالبان اوشبو حجتده اوشبو گروه استخبارات بودجهسیدن مالیهلشتیریلهدیگن یېتکرمهگه ایچکی اوروش و قومی اوروش یوز بېریشی احتمالی حقیده خبرلر تیّارلش همده طالبان رژیمی بۉلمسه، بوندهی اوروشلر یوز بېرهدی دېگن تصور اویغاتیش حقیده کۉرسهتمه بېرگن. شونینگدېک، طالبان مخالف کوچلرینینگ فعالیتی و حرکتلری حقیده خبرلر تیّارلش همده جماعتچیلیک فکرینی اولرگه نسبتاً سلبی شکللنتیریش کېرهکلیگی اَیتیلگن.
طالبان اوشبو حجتده اۉز نظارتی و قرهماغیدهگی یېتکرمهگه تلویزیون کاناللری خارجده یشهیاتگن رهبرلرنینگ دبدبهلی و فراوان حیاتی حقیده منتظم خبر و ویدیولر بېریشنی، عکسینچه، اوروشلرده کمبغل آدملرنینگ فرزندلری هلاک بۉلیشینی بۉرتتیریب کۉرسهتیشنی بویورگن. اوشبو حجتده طالبان استخباراتی سابق رهبرلر و طالبان منصبدارلری عایلهلرینینگ فسادی و مال-ملکی حقیده خبرلر تیّارلش آرقهلی خلقنینگ سابق رهبرلرگه بۉلگن ایشانچینی یۉقاتیش کېرهکلیگینی اَیتگن.
عاموی اخبارات واسطهلری و ترغیبات بودجهسی
حجتگه کۉره، طالبان استخباراتیگه قرهشلی یېتکرمهلر سوداگرلرنینگ فعالیتی و اولرنینگ غرب مملکتلری بیلن علاقهلری حقیده هم خبرلر تیّارلشی کېرهک. اوشبو حجتده «یاد چینل»، «مثلث چینل»، «حجاز فارسی»، «صدای هندوکش»، «المرصاد»، «آفاق چینل»، «نقاب چینل»، «گرین میدیا»، «رادیو حریت»، «تلویزیون طلوع»، «تلویزیون یک»، «تلویزیون شمشاد»، «تلویزیون آریانا» و «پرده نقاب پیچینل» اوشبو ماتریاللرنی ترقهتیشی شرط بۉلگن عاموی اخبارات واسطهلری صفتیده سنهب اۉتیلگن. اوشبو یېتکرمهلر اوچون ۳۰ میلیون افغانی مقداریده بودجه اجرهتیلگن.
طالبان شونینگدېک، خوفسیزلیک و سیاسی ساحهلرده خارجی پوللر و یاردملر حقیده حسابات تیّارلنیب، اعلان قیلینیشینی اَیتگن. شونینگدېک، مخالفلرنینگ فعالیتی و ترغیباتی، مملکتده بېقرارلیک و خوفسیزلیکنی ایزدن چیقریشگه قرهتیلگن اورینیشلر حقیده هم حسابات تیّارلنیشی کېرهک.
طالباننینگ فعالیتی هم یېتکرمهده یاریتیلیشی، تلویزیون کاناللری و عامهوی اخبارات واسطهلریده مخالفلرنینگ ترغیباتیگه قرشی کورهشیش و طالبانلرنینگ فعالیتینی کۉرسهتیش مقصدیده رایورتاژلر تیّارلنیب، اعلان قیلینیشی کېرهک. اوشبو حجتگه کۉره، اوشبو کۉرسهتمهلرنینگ هر بیر یۉنهلیشی اوچون معین عاموی اخبارات واسطهلری و صحیفهلرگه مذکور ماتریاللرنی ترغیب قیلیش و اعلان اېتیش وظیفهسی یوکلهتیلگن.
طالبان ترغیباتینینگ اوشبو قِسمی «هلمند چینل»، «یاد چینل»، «مثلث چینل»، «رادیو حریت»، «نقاب چینل»، «پرده نقاب پیچینل»، «وطندار پس چینل» و «آفاق چینل» ذمّهسیگه یوکلهتیلگن بۉلیب، بونینگ اوچون ۲۰ میلیون افغانی بودجه اجرهتیلگن.
اوشبو حجتنینگ باشقه بیر قِسمیده پاکستاندهگی کېلیشماوچیلیکلر و مملکتنینگ آغیر اقتصادی احوالی حقیده حسابات تیّارلنیشی همده پاکستان اوردوسی باشلیغی عاصم منیر مملکت رسمیلری بیلن کېلیشماوچیلیکلرگه اېگه اېکنی کۉرسهتیلیشی اَیتیلگن. شونینگدېک، پاکستان طالبان حرکتی (تیتیپی)، بلوچستان آزادلیک حرکتی (BLA) پاکستاندهگی سیاسی و خوفسیزلیک ساحهسیدهگی فعالیتلر و اۉزگریشلر همده اولر بیلن باغلیق مسألهلر حقیده حسابات تیّارلنیشی کېرهکلیگی قید اېتیلگن.
حجتده، شونینگدېک، طالبان و پاکستان اۉرتهسیدهگی مناسبتلر همده ایکّی تامان اۉرتهسیدهگی کېلیشماوچیلیکلر حقیده حسابات و تحلیللر تیّارلنیشی بېلگیلنگن. اوشبو قِسم اوچون مسوولیت هندوکش رادیوسی، حجاز فارسی و الماس دری ذمّهسیگه یوکلهتیلگن بۉلیب، بونینگ اوچون ۵۰۰ مینگ افغانی بودجه اجرهتیلگن.
شونینگدېک، حجتده ایران و تاجیکستان بیلن باغلیق مسألهلر و موضوعلر حقیده تنقیدی رادیو راپورتاژلری همده باشقه میدیا ماتریاللری تیّارلنیب، اعلان قیلینیشی اَیتیلگن. اوشبو قِسم اوچون اوچ آیگه ۲۰۰ مینگ افغانی بودجه اجرهتیلگن بۉلیب، مذکور رېجهنینگ عمومی بودجهسی ۷۰ میلیون ۷۰۰ مینگ افغانی اېکنی معلوم قیلینگن.
ساخته حسابلر و استخباراتنینگ میدیا ترماغی
طالبانلرنینگ استخبارات عمومی باشقرمهسی ۰۱۵-باشقرمهسی تامانیدن عاموی اخبارات واسطهلریگه چیققن مکتوبده مستقل عامهوی اخبارات واسطهلری فعالیتینی شبهه آستیگه قۉییشگه قرهتیلگن کېنگ کۉلملی دستور حقیده سۉز یوریتیلگن. اوشبو مکتوبدن کۉرینیشیچه، طالبان استخباراتی اختیاریده ۱ مینگ ۵۰۰ دن آرتیق ساخته حساب و میدیا واسطهلری موجود بۉلیب، بو گروهنینگ میدیا وکیللری هر بیری بیر نېچه ته مستعار حسابلر و ینگی تشکیل اېتیلگن میدیا پلتفورملرنی باشقرهدی.
محمدجواد سارگر اۉزینینگ (Jawad Sargar) ناملی اساسی حسابی همده «En Naser Hashemi»، «مدینه پنجشیری»، «نیلوفر رحمانی»، «نجلا پنجشیری»، «مریم پنجشیری» و «تاجیکستان انترنشنل فوری» ناملی ساخته حسابلری آرقهلی اجتماعی ترماقلرده فعالیت یوریتهدی.
قاری سعید خوستی اۉزینینگ «Qari Saeed Khosty»ناملی شخصی حسابیدن تشقری، باشقه حسابلریگه هم اېگه . «SoniaNiazi»، «نفیسه پنجشیری»، «Rana Afghan»، «رسانه جنگ فکری»، «Najeem Yalman» و «Savia Alkozay» اجتماعی ترماقلرده اساسا قیزلر اسملری بیلن فعالیت یوریتهدیگن باشقه حسابلر جملهسیدن دیر. اوشبو حجتگه کۉره، اولر اۉز امکانیتلری و معلوماتلرینی طالبان استخباراتیدن آلهدی.
طالبانلرنینگ سۉنگگی بېش ییلدهگی ترغیباتی
طالبان سۉنگگی بېش ییل دوامیده قیزلر اسملری بیلن ساخته حسابلر یرهتیش آرقهلی اۉز ترغیبات اصوللرینی کېنگهیتیرگن. بو گروه تورلی میدیا پلتفورملرینی تشکیل اېتیش و مستقل یېتکرمهده اعلان قیلینهیاتگن معلوماتلر، خبرلر همده راپورتاژلرگه قرشی ماتریاللر ترقهتیش آرقهلی اولرگه قرشی کورهشیب کېلگن. شونینگدېک، اولر اۉزلرینی گۉیاکه خلققه یقین قیلیب کۉرسهتیش آرقهلی جماعتچیلیک فکرینی چلغیتیشگه و بوزیشگه دایمی روشده اورینیب کېلگن.
