سپورت انشااتلری یېتیشمسلیگی و یوقاری خرجتلر؛ کابل یاشلری سپورت بیلن شغللنیش قیینلیگیدن شکایت قیلماقده
ایلیا
کابلده‌گی بیر قطار یاشلر شهر‌نینگ تورلی حدودلریده مناسب و ستندرد سپورت میدانلری همده انشااتلری یېتیشمسلیگیدن شکایت قیلماقده. اولر سپورت بیلن شغللنیش اوچون خصوصی زللر و میدانلردن فایده‌لنیشگه مجبور اېکنینی، بو‌نینگ عوضیگه اېسه ساعت‌لیک تۉلاو قیلیشلرینی اَیتماقده. اولر‌نینگ سۉزلریگه کۉره، بونده‌ی جایلردن فایده‌لنیش خرجتی کۉپلب یاشلر اوچون آغیرلیک قیله‌دی و مالیوی امکانیتلری منتظم سپورت بیلن شغللنیشگه یۉل بېرمه‌یدی. اولر کابل‌نینگ کۉپلب حدودلریده عمومی و ارزان سپورت میدانلری موجود اېمسلیگینی، مناسب امکانیتلردن فایده‌لنیش اوچون اېسه اوزاقراق حدودلرگه باریشلری کېره‌کلیگینی قۉشیمچه قیلماقده.
بو یاشلر ۸صبح گزېته‌سیگه بېرگن صحبتلریده عمومی سپورت میدانلری‌نینگ، اینیقسه، کم درآمدلی یاشلر اوچون یۉقلیگی منتظم سپورت بیلن شغللنیش امکانیتلرینی چېکله‌گنینی اَیتماقده. اولر کابل‌نینگ تورلی حدودلریده عمومی و ستندرد سپورت میدانلری همده زللر تشکیل اېتیلیشینی طلب قیلماقده.
کابل‌نینگ قلعه زمانخان حدودی اهالیسی آره‌سیدن امرالله بو حدودده ستندرد و ارزان سپورت انشااتلری یېتیشمسلیگیدن خواطر بیلدیرماقده. اونینگ اَیتیشیچه، بونده‌ی جایلر بۉلمه‌گنی سببلی اَیریم یاشلر سپورت بیلن شغللنیش اوچون بۉش یېرلر و آچیق میدانلردن فایده‌لنماقده. اونینگ فکریچه، بو جایلرده سپورت اوچون ضرور امکانیتلر یۉق و اولردن فایده‌لنیش بعضاً سپورتچیلر همده محله اهالیسیگه معما توغدیره‌دی.
بو یاش شونده‌ی دېیدی: «ایشدن کېین باریب، دۉستلریمیز بیلن وقت اۉتکزیشیمیز اوچون کریکت میدانی یۉق. سپورت میدانلری، اینیقسه، جمنازیوملرنینگ یۉقلیگی کۉپلب معمالرنی کېلتیریب چیقرماقده. اساسی معمالردن بیری شوکی، سپورت اوچون بېلگیلنگن جای بۉلمسه، آدملر مجبورا اویلر‌نینگ آلدیده یاکه بۉش یېرلرده اۉینه‌شه‌دی. بونده‌ی حالتده هم سپورتچیلر، هم آدملر بېزاوته بۉله‌دی؛ چونکه بو جایلر عادتده قتناو یۉللریده جایلشگن و چنگ-تۉزان پیدا بۉله‌دی.»
امرالله کابل‌نینگ تورلی قِسملریده سپورت جمنازیوملری یېترلی اېمسلیگینی و موجود جایلردن فایده‌لنیش خرجتی هم کۉپلب یاشلر اوچون یوقاری اېکنینی قۉشیمچه قیله‌دی. اونینگ سۉزلریگه کۉره، بو خرجتلر اَیریم عایله‌لر‌نینگ اقتصادی امکانیتلریگه ماس کېلمه‌یدی و نتیجه‌ده بعضی یاشلر جمنازیوملرگه باریش همده منتظم سپورت بیلن شغللنیشدن واز کېچگن.
امرالله شونده‌ی دېیدی: «فوتبال اوچون وضعیت بیرآز یخشیراق، اما کریکتگه کۉپراق میدان و امکانیتلر کېره‌ک بۉلگنی اوچون خرجتلر هم یوقاریراق بۉله‌دی. کۉپلب یاشلر، اگر ایشله‌یدیگن بۉلسه، اېرته‌لب یاکه ایشدن کېین سپورتگه وقت اجره‌ته‌دی؛ اما مناسب جای‌نینگ یۉقلیگی بو ایشنی قیینلشتیرگن.»
کابل‌نینگ کارته‌نو حدودی اهالیسی آره‌سیدن سیر بو شهرده سپورت میدانلری یېتیشمسلیگی یاشلر‌نینگ سپورت امکانیتلریدن فایده‌لنیشینی چېکله‌گنینی اَیته‌دی. اونینگ سۉزلریگه کۉره، کابل‌نینگ کۉپلب حدودلریده فوتبال و والیبال کبی سپورت تورلری اوچون مناسب زللر و میدانلر یۉق و سپورتچیلر مشغولات اۉتکزیش اوچون باشقه حدودلرگه باریشگه مجبور.
بو سپورتچی شونده‌ی دېیدی: «کابل شهریده‌گی کتّه معمالردن بیری سپورتچیلر اوچون یېترلی امکانیتلر موجود اېمسلیگیدیر. فوتبال، والیبال و باشقه سپورت تورلری اوچون مناسب ستدیونلر و جمنازیوملر کم. شو سببلی آدملر بۉش جایلر و عمومی محله‌لرده سپورت بیلن شغللنه‌دی. بو بعضاً محله اهالیسیگه خلل بېره‌دی و سپورت نقطه نظریدن هم ماس اېمس.» اونینگ سۉزلریگه کۉره، عمومی سپورت میدانلری‌نینگ چېکلنگنلیگی یاشلر‌نینگ مشغولات اوچون امکانیتلرینی هم کمه‌یتیرگن.
سیر شونده‌ی دېیدی: «موجود چېکلنگن جمنازیوملرنینگ اکثریتی خصوصی بۉلیب، سپورتچیلر اولردن فایده‌لنیش اوچون پول تۉله‌شی کېره‌ک. کۉپلب آدملر‌نینگ بو خرجتلرنی تۉله‌شگه امکانیتی یۉق و شو سببلی اولر بو جایلردن فایده‌لنه آلمه‌یدی.»
کابل‌نینگ خیرخانه حدودی اهالیسی آره‌سیدن عبیدالله بو حدودده سپورت کلوپلری یېتیشمسلیگی موجود جایلرده سپورتچیلر‌نینگ تۉپلنیب قالیشیگه سبب بۉلگنینی اَیته‌دی. اونینگ قۉشیمچه قیلیشیچه، اَیریم کلوپلر‌نینگ جهازلری هم اېسکیرگن و سپورتچیلر مشغولاتلری اوچون یېترلی امکانیتلر موجود اېمس.
عبیدالله‌نینگ سۉزلریگه کۉره، کابل‌نینگ اَیریم حدودلریده هم یېترلی سپورت میدانلری و زللری موجود اېمس و سپورتچیلر مشغولات اۉتکزیشده قیینچیلیکلرگه دوچ کېلماقده. او کابل‌نینگ تورلی محله‌لریده کۉپراق سپورت کلپ‌لری و زللری تشکیل اېتیلیشینی، سپورتچیلر یشه‌ش جایلریگه اېنگ یقین حدودلرده مشغولات اۉتکزه آلیشلرینی ایسته‌یدی.
عبیدالله شونده‌ی دېیدی: «اگر فوتبال حقیده گپیره‌دیگن بۉلسک، رسمی مسابقه‌لر اۉتکزیله‌دیگن غازی ستدیونیدن تشقری، ستندرد میدانلریمیز کۉپ اېمس. فوتسال اوچون بیر نېچه ته چیملی میدان و زللر بار، اما اولر‌نینگ کۉپچیلیگی ستندردلرگه جواب بېرمه‌یدی. اگر بیرار میدان یاکه زلده زمانوی و ستندرد امکانیتلر، چیم همده جهازلر بۉلسه، اوندن فایده‌لنیش خرجتی هم یوقاری بۉله‌دی.»
بو یاش دوام اېته‌دی: «بو حدودده احتمال بیر یاکه ایکّیته کلپ بار، اولردن فایده‌لنیش خرجتی هم یوقاری، جهازلری هم اېسکی. اگر کلپده ستندرد امکانیتلر و جهازلر بۉلسه، مشغولات اوچون پول تۉله‌ش ارزییدی؛ اما خیرخانه‌ده بونده‌ی کلپلر کم. شو سببلی موجود کلپ‌لرده هم آدم کۉپ، چونکه اهالی سانی کتّه، سپورت امکانیتلری اېسه چېکلنگن. سپورت زللری کۉپه‌ییشیگه امید قیله‌من؛ چونکه سپورت بۉلمه‌سه، یاشلر مخدره مادّه‌لر کبی باشقه ایشلرگه یوز توتیشی ممکن. سپورت ساغلیق جهتیدن فایده‌لی، یاشلر‌نینگ رغبتینی آشیره‌دی و ساغلام رقابت اوچون شرایط یره‌ته‌دی. حتا یاشلر‌نینگ انرژیسی و روحیتی اولر‌نینگ اۉقیشیگه هم ایجابی تأثیر کۉرسه‌تیشی ممکن.»
شو بیلن بیرگه، بیر قطار عیال سپورتچیلر سپورت میدانلریدن فایده‌لنیش امکانیتی چېکلنگنی سببلی سپورت مشغولاتلری‌نینگ اکثریتینی اویده بجریشلرینی اَیتماقده. اولر‌نینگ سۉزلریگه کۉره، عیاللر اوچون مناسب و فایده‌لنیش ممکن بۉلگن سپورت جایلری‌نینگ یۉقلیگی اولر‌نینگ منتظم سپورت فعالیتی بیلن شغللنیش امکانیتلرینی چېکله‌گن.
کابلده‌گی عیال سپورتچیلردن بیری عاقله طالبان تامانیدن عیاللر اوچون ستدیونلر‌نینگ یاپیلیشی اونینگ سپورت بیلن شغللنیشی اوچون مناسب جایلردن فایده‌لنیش امکانیتینی یۉققه چیقرگنینی اَیته‌دی. اونینگ قۉشیمچه قیلیشیچه، منتظم سپورت بیلن شغللنیش ضرورتی سببلی حاضر مشغولاتلرینی اویده بجریشگه مجبور، بیراق مناسب جای‌نینگ یۉقلیگی و سپورت انجاملری‌نینگ قیمتلیگی مشغولاتلرینی دوام اېتتیریشنی قیینلشتیرگن.
بو عیال شونده‌ی دېیدی: «طالبان حاکمیتگه کېلگنیدن کېین بیز سپورت بیلن شغللنیش اوچون مناسب جایدن فایده‌لنه آلمه‌یمیز. اویده سپورت بیلن شغللنه‌من، اما امکانیتلریمیز کۉپ اېمس. شو سببلی روحی خاطرجمعلیککه اېگه بۉلیش اوچون یاگه بیلن شغللنه‌من. مېن شطرنج و بادیبیلدینگنی جوده یخشی کۉره‌من، اما بو ایکّی قیزیقیشیمنی دوام اېتتیره آلمه‌یمن. چېکلاولر بېکار قیلینیشیگه امید قیله‌من، تاکه عیاللر چېکلاولرسیز ایشلشی و سپورت بیلن شغللنیشی همده اېرکین نفس آلیشی ممکن بۉلسین.»
سۉنگگی ییللرده سپورت افغانستان‌نینگ کۉپلب یاشلری قیزیقه‌دیگن فعالیتلردن بیری بۉلیب کېلگن. اما ستندرد سپورت میدانلری و زللری‌نینگ، اینیقسه، کابل شهریده یېتیشمسلیگی اولر‌نینگ بیر قِسمی‌نینگ مناسب امکانیتلردن فایده‌لنیشینی قیینلشتیرگن.
طالبان نظارتیده‌گی جسمانی تربیه و سپورت همده المپیک باشقرمه‌سی افغانستانده ۶۰ ته سپورت فدراسیونی فعالیت یوریته‌یاتگنی و قریب ۱ میلیون ۳۰۰ مینگ سپورتچی اوشبو باشقرمه تصرفیده اېکنینی اَیته‌دی. شونگه قره‌مه‌ی، سپورتچیلر کابل‌نینگ کۉپلب حدودلریده عمومی و ارزان سپورت امکانیتلری موجود اېمسلیگینی، خصوصی جایلردن فایده‌لنیش اوچون اېسه یوقاری خرجتلرنی تۉله‌شگه تۉغری کېله‌یاتگنینی اَیتماقده.
