طالبان‌نینگ هزاره‌لرگه نسبتن یانده‌شووی؛ غزنیده ۱ مینگ ۸۰۰ جریب یېر مصادره قیلینیشی
۸صبح، غزنی
غزنی ولایتی‌نینگ قره‌باغ تومنیده‌گی باغ‌عطّار و گل‌کوه حدودلریده یشاوچی بیر گروه اهالی طالبان کوچلری اولر‌نینگ شخصی و میراثی دهقانچیلیک یېرلرینی مصادره قیلگنینی اَیتماقده. محلی اهالی‌نینگ سۉزلریگه کۉره، اوشبو یېرلر‌نینگ بیر قِسمی ایکّی ییل آلدین پاکستان طالبان حرکتی (تی‌تی‌پی) اوچون شهرچه قوریشگه اجره‌تیلگن، قالگن قِسمی اېسه سۉنگگی بیر آی دوامیده اجاره‌گه بېریلگن.
گل‌کوه حدودی اهالیسی ۸صبح گزېته‌سیگه بېرگن صحبتیده اوشبو یېرلر‌نینگ عمومی میدانی قریب ۱ مینگ ۸۰۰ جریب اېکنینی اَیتماقده. اولر‌نینگ سۉزلریگه کۉره، طالبان‌نینگ اېکینچیلیک و چارواچیلیک باشقرمه‌سی بو یېرلرنی دولت ملکی دېب اعلان قیلیب، خصوصی کمپنی آرقه‌لی باشقه شخصلرگه اجاره‌گه بېرگن. اهالی بو یېرلر اجدادلریدن میراث قالگنینی، قۉللریده قویاش ۱۳۲۷- ییلدن باشلب توزیلگن ملک گواهنامه‌لری، شرعی حجتلر و سالیق تۉلاولری حقیده‌گی دلیللر موجودلیگینی تأکیدله‌ماقده. بیراق طالبان نظارتی آستیده‌گی اۉنلب تېگیشلی اداره‌لرگه مراجعت قیلیب، عدالت طلب قیلگن بۉلسه‌لر-ده، اوشبو گروه‌نینگ بیرار رسمیسی اولر‌نینگ طلبلرینی کۉریب چیقمه‌گن.
۸صبح گزېته‌سی قۉلگه کیریتگن حجتگه کۉره، طالبان‌نینگ اېکینچیلیک و چارواچیلیک باشقرمه‌سی اۉز تکلیفی بیلن اوشبو گروه‌نینگ اېکینچیلیک وزیرلیگیدن بحثلی یېرلرنی دهقانچیلیک مقصدیده خصوصی کمپنیگه اجاره‌گه بېریشنی سۉره‌گن. طالبان‌نینگ اېکینچیلیک وزیرلیگی هم بو تکلیفنی معقولله‌گن. حال‌بوکه، محلی اهالی اوشبو یېرلر‌نینگ قانونی و شرعی ملک حجتلری اۉز قۉللریده اېکنینی اَیتماقده.
غزنی ولایتی‌نینگ قره‌باغ تومنی اهالیسی مهدی سۉنگگی بیر نېچه آی دوامیده بیر گروه محلی آقسقاللر بیلن بیرگه طالبان نظارتیده‌گی بیر نېچه ته وزیرلیک و اداره‌لرگه مراجعت قیلگنینی، بیراق طالبان‌نینگ بیرار اداره‌سی اولر‌نینگ شرعی حجتلری و ملک گواهنامه‌لرینی تېکشیریشگه هم راضی بۉلمه‌گنینی اَیته‌دی.
قره‌باغ تومنی وطنداشی شونده‌ی دېیدی: «طالبان‌نینگ اېکینچیلیک وزیرلیگی، عدلیه وزیرلیگی، یېر منبعلری باشقرمه‌سی، امر باالمعروف و نهی عن المنکر وزیرلیگی همده باشقه بیر قنچه اداره‌لرگه مراجعت قیلدیک. اما هېچ کیم حجتلریمیزنی کۉریشگه هم راضی بۉلمه‌دی. بیز ییللر دوامیده بو یېرلرده دهقانچیلیک قیلگنمیز، ملک گواهنامه‌لریمیز بار و مملکت‌نینگ تورلی حکومتلری دوریده عیناً شو یېرلر اوچون سالیق تۉله‌گنمیز. اما اېندی بیر کېچه‌ده بو یېرلر دولتنیکی، دېگن قرار چیقریلدی. بو حقیقتاً هم ظلمدیر».
گل‌کوه حدودی‌نینگ ینه بیر یشاوچیسی ۸صبح گزېته‌سیگه بېرگن صحبتیده اوچ ییل اوّل هم اولر‌نینگ یېرلری‌نینگ کتّه قِسمی پاکستان طالبان حرکتی اوچون شهرچه قوریشگه اجره‌تیلگنینی، اېندیلیکده اېسه قالگن یېرلری‌نینگ هم دولت ملکی دېب اعلان قیلینیب، طالبان اعضالریگه تاپشیریلگنینی تأکیدله‌یدی. او بو حرکتنی هزاره‌لرگه نسبتاً آچیق-آیدین کمسیتیش دېب حسابلب، شونده‌ی دېیدی: «افسوسکی، طالبان هزاره خلقی بیلن آچیق و آشکارا روشده دشمنلیک قیلماقده. ایکّی ییل اوّل یېرلریمیزنی تی‌تی‌پی و وزیرستانلیکلرگه تاپشیریشدی، اېندی اېسه قالگن قِسمینی اۉز قوراللی آدملریگه بېریشدی. اولر بیز‌نینگ حجتلریمیز و ملک گواهنامه‌لریمیزنی مطلقا انابتگه آلیشمه‌دی».
بو حالت طالبان مملکتده حاکمیتنی قَیته قۉلگه کیریتگنیدن سۉنگ وطنداشلرگه نسبتاً قتّیق چېکلاولر جاری اېتیش بیلن بیر قطارده، شیعه جماعه‌سیگه نسبتاً باسیمنی هم مثلی کۉریلمه‌گن درجه‌ده کوچه‌یتیرگنی و مملکت‌نینگ تورلی ولایتلریده اولرگه تېگیشلی یوزلب جریب یېرلرنی مصادره قیلگنی فانیده یوز بېرماقده. فقط سۉنگگی بیر آی ایچیده طالبان شیعه‌لرگه تېگیشلی بیر نېچه ته علمی، تعلیم، ساغلیقنی سقلش، سپورت و میدیا مؤسسه‌لرینی یاپیش بیلن بیرگه، غربی کابلده‌گی امید سبز شهرچه‌سی یېرلرینی دولت ملکی دېب اعلان قیلیب، اونینگ اهالیسینی اویلریدن کۉچیریش جریانینی هم باشله‌گن.
