کابلده صندلگه طلب آرتیشی؛ عایلهلر قیشده اوینی ایسیتیش اوچون ارزان یۉل ایزلهماقده
آدرینا بهزاد
بیر قطار صندل یساووچی اوستهلر قیش فصلی یقینلشیشی بیلن صندل آلدی-ساتدیسی کۉپهیگنینی معلوم قیلیب، سۉنگگی کونلرده اوشبو هنر بازاری جانلنگنینی اَیتیشماقده. اولرنینگ سۉزلریگه کۉره، اطراف حدودلردن عایلهلرنینگ شهرگه آقیب کېلیشی و اولرنینگ ایسیتیش ماسلمهلریگه بۉلگن احتیاجی صندل ساتیب آلیشگه طلب آرتیشینینگ اساسی عامللریدن دیر. صندل یساووچیلرنینگ قۉشیمچه قیلیشیچه، صندللرنینگ نرخی اولرنینگ اۉلچمی، یاغاچ توری و یسهلیش صفتیگه قرهب فرق قیلهدی.
کابل شهریدهگی صندل یساووچی اوستهلردن بیری ظاهر قیش فصلی یقینلشیشی بیلن صندل ایشلب چیقریش و ساتیش بازاری جانلنگنینی معلوم قیلدی. اونینگ اَیتیشیچه، شو کونلرده ایشی آلدینگهصنسبتاً یخشیلنگن و کونیگه تخمیناً ۱۰ ته سندل ایشلب چیقرماقده.
اوشبو صندل یساووچی قۉشیمچه قیلهدی: «قیش فصلی یقینلشیشی بیلن سندل بازاری یخشی جانلندی. کونیگه تخمیناً ۱۰ ته صندل یسهیمن و شوندن اوچ-تۉرتتهسینی ساتهمن».
کابل شهریدهگی ینه بیر صندل یساووچی غلامغوث اطراف حدودلردن بیر قطار عایلهلرنینگ شهرگه کۉچیب کېلیشینی صندل بازاری جانلنیشینینگ اساسی عامللریدن بیری دېب بیلهدی.
او شوندهی دېیدی: «کوز فصلی کیریب کېلیشی بیلن، خداگه شکر، صندل آلدی-ساتدیسی یخشیلندی. کۉپچیلیک آدملر، اینیقسه ایرانگه کۉچیب کېتگن بۉلسه-ده، بونینگ عوضیگه اطراف حدودلردن کۉپلب عایلهلر شهرگه کېلگن و بو حالت صندل بازارینینگ ینهده جانلنیشیگه تاثیر کۉرسهتدی».
کابل شهریدهگی باشقه بیر صندل یساووچی امید (مستعار) صندللرنینگ نرخی اولرنینگ اۉلچمی و یسهلیش توریگه قرهب تورلیچه اېکنینی اَیتهدی. اونینگ سۉزلریگه کۉره، صندللرنینگ نرخی ۶۰۰ افغانیدن ۲ مینگ ۵۰۰ افغانیگچه اۉزگریب تورهدی.
او قۉشیمچه قیلهدی: «صندللر کیچیک، اۉرته و کتّه اۉلچملرده یسهلهدی و اولرنینگ نرخی هم هر خیل. یسهلیشی ۴۰۰ افغانیگه توشهدیگن صندللرنی ۶۰۰ افغانیگه، یسهلیش خرجتی ۱ مینگ ۲۰۰ افغانیگه یېتهدیگن صندللرنی اېسه ۱ مینگ ۵۰۰ افغانی نرخده ساتهمیز. اَیریم کونلرده ساتوو حجمیمیز تخمیناً ۵۰ ته صندلگچه هم یېتهدی. اوچته شاگردیم بار؛ قیش فصلیده سندل یسهیمیز، یازده اېسه کلکین یسهش بیلن شغللنهمیز».
کابل شهریدهگی ینه بیر صندل یساووچی جاوید قیش فصلی یقینلشیشی بیلن صندل آلدی-ساتدیسی جانلنگنینی خبر قیلیب، شو کونلرده اوشبو هنر بازارینینگ احوالی یخشی اېکنینی اَیتهدی.
او قۉشیمچه قیلهدی: «صندل آلدی-ساتدیسی جوده یخشی؛ چونکه بو هنر کۉپراق قیش فصلیده رواجلنهدی. کونلیک ساتوو مقداری تورلیچه بۉلهدی؛ بعضاً کۉپراق، بعضاً کمراق، لېکن عموماً آلگنده صندل بازاری یخشی جانلنگن».
سندل خریدارلریدن بیری احمد (مستعار) قیش فصلیده اوینی ایسیتیش اوچون اوشبو واسطهنی تنلشینینگ اساسی سببی صفتیده اوندن فایدهلنیشنینگ تېجهمکارلیگینی کۉرسهتهدی. اونینگ اَیتیشیچه، اۉتین، گاز و تاشکۉمیر نرخلری آشگنینی حسابگه آلگنده، باشقه ایسیتیش منبعلریگه نسبتاً صندلدن فایدهلنیش انچه ارزانراققه توشهدی.
او شوندهی دېیدی: «بیز اقتصادی بۉلگنی اوچون صندلدن فایدهلنهمیز؛ چونکه بیر کېچه-کوندوز دوامیده کۉمیرنی بیر مرته ینگیلش بیلن ایسّیقلیک اوزاق وقت سقلنیب قالهدی و عایلهنینگ برچه اعضالری، اینیقسه بالهلر اونینگ ایسسیغیدن بهرهمند بۉلیشلری ممکن. حاضرگی وقتده صندل و کۉمیر نرخی هم آشگن بۉلسه-ده، اۉتین، تاشکۉمیر و گاز ساتیب آلیش خرجتلریگه نسبتاً صندلدن فایدهلنیش بریبیر ارزانراق بۉلیب قالماقده».
صندلنینگ باشقه بیر خریداری غلامرضا قیش فصلیده صندلدن فایدهلنیش اونینگ ایسّیقلیگی طفیلی عایلهلر آرهسیده مشهور اېکنینی اَیتهدی.
او قۉشیمچه قیلهدی: «صندل قیش فصلیده ایسینیش اوچون قولهی واسطهدیر. اونینگ آستیگه کۉمیر یاکه یاقیلغی ماتریاللری قۉییش آرقهلی صندل ایچیدهگی بۉشلیق ایسیدی و کېکسهیو یاش عایله اعضالری اونینگ اطرافیگه تۉپلنیب، بیرگهلیکده وقت اۉتکزیشهدی».
بو حالت اوچ کون آلدین بیر قطار کابل اهالیسی قیش فصلی یقینلشیشی بیلن یاقیلغی ماتریاللری نرخی آشگنی و اولرنی ساتیب آلیشگه قُربی یېتمهیاتگنیدن خواطر بیلدیرگن بیر پیتگه تۉغری کېلماقده. اولر قیش کیریب کېلیشی بیلن یاقیلغی نرخینینگ کۉتریلیشی دایما عایلهلرنینگ جدّی معمالریدن بیری بۉلیب کېلگنینی، بیراق آغیر اقتصادی وضعیت و آدملرنینگ خرید قابلیتی پسهیگنی خواطرلرنی ینهده کوچهیتیرگنینی اَیتیشگن اېدی. اوشبو اهالینینگ سۉزلریگه کۉره، حتا یاقیلغی نرخی ارزانلشگن تقدیرده هم، کۉپلب کم تامینلنگن عایلهلر اونی ساتیب آلیش امکانیتیگه اېگه اېمس.





