طالباننینگ قصاص آلیشی؛ خارجدهگی تنقیدچیلر افغانستانگه کیریش چاغیده حبسگه آلینماقده
نیما
ایراندن افغانستانگه قَیتیب کېلگن اَیریم طلبهلر طالبان اولرنی بو گروهگه قرشی ترغیبات آلیب بارگنلیکده عیبلب حبسگه آلگنی و قماققه تشلهگنینی اَیتماقده. اولرنینگ اَیریملری هنوز طالبان قماقخانهلریده سقلنماقده. حبسگه آلینگنلر سانی انیق اېمس، چونکه طالبان قماقدن آزاد قیلهیاتگن شخصلردن بو حقده هېچ نرسه یازمسلیک ومېدیا بیلن هم گپلشمسلیک حقیده یازمه مجبوریت آلهدی. شونگه قرهمهی، بو گروهگه قرشی ترغیبات آلیب بارگنلیکده عیبلنیب، افغانستانگه سفر قیلهیاتگنیده تۉرت آی دوامیده حبسده سقلنگن طلبهلردن بیری باشقه بیر نېچه طلبه بیلن بیر وقتده حبسده بۉلگنینی تصدیقلهیدی.
طالبان سۉنگگی بېش ییلدن آرتیق وقت دوامیده مملکت وطنداشلریدن قصاص آلیشده دایما عیبلنیب کېلماقده. بو گروه طالبان رژیمینی تنقید قیلگن شخصلرنی حبسگه آلهدی، قماققه تشلهیدی و قییناققه سالهدی. طالبان، شونینگدېک، بو گروه حاکمیتینی تنقید قیلیش جنایت حسابلنیشینی رسماً اعلان قیلگن و وطنداشلرنینگ هر قندهی مدنې همده سیاسې فعالیتیگه تۉسقینلیک قیلگن. بو گروه هېچ کیمنینگ افغانستانده سیاسې و اجتماعې فعالیت آلیب باریشگه حققی یۉقلیگیدن آگاهلنتیرگن.
اوشبو طلبهلردن بیری حسن (مستعار)، جارې ییل بهاریده اسلامقلعه چېگرهسیده طالبان استخباراتی تامانیدن حبسگه آلینگنینی اَیتهدی. اونینگ قۉشیمچه قیلیشیچه، طالبان استخبارات کوچلری دستلب اونی حقارتلب، قییناققه سالگن، کېین اېسه بو گروه محکمهسیگه تاپشیرگن. او تأکیدلشیچه، طالبان محکمهسی اونی بو گروهگه قرشی ترغیبات آلیب بارگنلیکده عیبلب، تۉرت آی قماق جزاسیگه حکم قیلگن و او بوتون شو مدتنی قماقده اۉتکزگن.
اوشبو طلبه اجتماعی ترماقلرده فعال بۉلگن و بو گروهنی تنقید قیلهدیگن شخصلرگه نسبتاً طالباننینگ کېسکین و قتّیققۉل یاندهشووی بارلیگینی قۉشیمچه قیلهدی. اونینگ اَیتیشیچه، حتا خارجدن توریب طالبانگه قرشی اجتماعی ترماقلرده فعالیت یوریتهدیگن شخصلر هم افغانستانگه کیرگنلریده انیقلنیب، حبسگه آلینهدی و قییناققه سالینهدی.
حسننینگ اَیتیشیچه، او بیلن بیر وقتده قماقده باشقه طلبهلر هم بۉلگن و اولر بو گروهگه قرشی ترغیبات آلیب بارگنلیکده عیبلنیب حبسگه آلینگن و قماققه تشلنگن. اونینگ سۉزلریگه کۉره، اولر حاضرگچه آزاد قیلینمهگن. اونینگ اَیتیشیچه، طالبان اوشبو عیبلاو بیلن حبسگه آلگن برچه شخصلردن آزاد اېتیلگنیدن کېین بو حقده هېچ نرسه یازمسلیک یاکه آو بیلن گپلشمسلیک حقیده مجبوریت آلهدی.
اوشبو طلبه طالبانگه قرشی یازهدیگن شخصلردن افغانستانگه قَیتمسلیکنی سۉرهیدی، چونکه اونینگ اَیتیشیچه، اولر اوچون شرایط قولهی اېمس. او قۉشیمچه قیلهدی: «افغانستانگه کېلیشنی رېجهلشتیرهیاتگنلرگه خبر بېرینگلر، هېچ قچان کېلیشمسینلر، چونکه حبسگه آلینهدیلر». اونینگ اَیتیشیچه، طالبان بو گروهگه قرشی بیرار نرسه یازگن هر قندهی کیشیدن قصاص آلهدی.
بو یاش ییگیت، شونینگدېک، حاضرده طالبان حکومتیده عالی معلوماتلی و بیلیم یورتی تماملهگن شخصلر اوچون هېچ قندهی ایش امکانیتی موجود اېمسلیگینی تأکیدلهیدی. اونینگ اَیتیشیچه، بو گروه دولت ادارهلریگه فقط ایلگری اوروش و حربې فعالیت بیلن شغللنگن شخصلرنی ایشگه قبول قیلهدی.
«چېگره بیلمس مخبرلر» تشکیلاتی بوندن آلدین طالبان بو گروه منصبدارلرینی تنقید قیلووچی یېتکرمه آوازینی اۉچیرگنینی خبر قیلگن اېدی. تشکیلاتگه کۉره، طالبان کۉرسهتمهلری بو گروه یېتکچیلرینی حقارت قیلیشده عیبلنگن شخصلرنی جزالش اوچون شرایط یرهتگن؛ بوندهی جزالر قمچیلش یاکه قماقنی اۉز ایچیگه آلیشی ممکن. تشکیلات، شونینگدېک، طالبان سۉنگگی بېش ییل ایچیده یېتکرمه فعالیتینی کېسکین چېکلهیدیگن و باستیرهدیگن ۲۰ دن آرتیق فرمان و کۉرسهتمه چیقرگنینی قۉشیمچه قیلگن. «چېگره بیلمس مخبرلر»گه کۉره، اوشبو کۉرسهتمهلرنینگ اَیریملری طالبان ادارهلری تامانیدن آوگه آغزهکی طرزده یېتکزیلهدی.
طالبان عدلیه وزیری عبدالحکیم شرعی، افغانستانده بو گروه حکمرانلیگی آستیده سیاسې حزبلرنینگ فعالیت یوریتیشیگه رخصت بېریلمسلیگینی و حتا حزبنینگ موجودلیگی حقیده گپیریش هم جنایت حسابلنیشینی اَیتگن.
بو آرهده، بوندن آلدین غور ولایتیدهگی منبعلر طالبان جمعه نمازیده اوشبو ولایت اهالیسینی اجتماعی ترماقلرده بو گروهگه قرشی فکرلرنی بیلدیریش یاکه بوندهی ماتریاللرنی یاقتیریش حقوقیگه اېگه اېمسلیکلری حقیده آگاهلنتیرگنینی اَیتگن اېدی. طالبان خارجده یشهیاتگن غور اهالیسی وکیللرینی هم بو گروه مخالفلرینینگ ماتریاللریگه «لایک» و «کامنت» قالدیرگن تقدیرده، اولرنینگ یقینلری و قرینداشلری حبسگه آلینیب، قماققه تشلنیشیدن آگاهلنتیرگن.
