یونیسف افغانستانده باله‌لر و عایله‌لر اوچون صفتلی دارو-درمانلر تأمینلشگه اورغو بېردی
۸صبح، کابل: بیرلشگن ملتلر تشکیلاتی‌نینگ باله‌لرنی قۉللب-قۉتلش جمغرمه‌سی (یونیسف)نینگ افغانستاندهگی وکیلی، تاج‌الدین اویوالی، افغانستانده باله‌لر و عایله‌لر اوچون خوفسیز و صفتلی دارو-درمانلردن ایشانچلی فایده‌لنیش امکانیتی ضرور اېکنینی اَیتماقده.
اویوالی یک‌شنبه کونی، ۲۶ میزان، ایکس صحیفه‌سیده یازیشیچه، یونیسف افغانستان و یونیسف اۉزبېکستان تاشکېنت شهریده منطقه‌‌نینگ تورلی حدودلریدن کېلگن دارو ایشلب چیقرووچیلر بیلن اوچره‌شگن.
اونینگ اَیتیشیچه، اوشبو اوچره‌شوودن مقصد افغانستانده ضرور دارو-درمانلردن برقرار و ایشانچلی فایده‌لنیشنی تأمینلش اوچون همکارلیک امکانیتلرینی اۉرگنیش بۉلگن.
یونیسف افغانستانده ضرور دارو-درمانلردن ایشانچلی فایده‌لنیش امکانیتیگه اورغو بېره‌یاتگن بیر پیتده، سۉنگگی بېش ییل دوامیده، طالبان مملکتنی قَیته اېگه‌لله‌گنیدن کېین، ساغلیقنی سقلش خدمتلرینی کۉرسه‌تیش، اینیقسه، آلیس حدودلرده، کۉپلب معمالرگه دوچ کېلماقده.
طبی جهازلر و صفتلی دارو-درمانلر‌نینگ یۉقلیگی، عیال شفاکارلر فعالیتیگه قۉییلگن چېکلاولر همده طبی امکانیتلر‌نینگ یېتیشمسلیگی وطنداشلر‌نینگ، اینیقسه، عیاللر و باله‌لر‌نینگ دوالنیش خدمتلریدن فایده‌لنیشینی قیینلشتیره‌یاتگن معمالر جمله‌سیدندیر.
