بیرلشگن ملتلر تشکیلاتی بیر مینگ ۵۰۰ افغانستانلیک عیال تدبیرکارنی مالیوی قۉللب-قوّتلهگنینی معلوم قیلدی
۸صبح، کابل: بیرلشگن ملتلر تشکیلاتینینگ ترقیات دستوری (UNDP) و بیرلشگن ملتلر تشکیلاتینینگ عیاللر بۉلیمی (UN Women) افغانستانلیک عیال تدبیرکارلرنی قۉللب-قوّتلش اوچون ۱،۷ میلیون دالر مقداریده قۉشمه سرمایه کیریتیشینی معلوم قیلدی.
بیرلشگن ملتلر تشکیلاتینینگ ترقیات دستوری یکشنبه کونی، ۵ میزان، اعلان قیلگن حساباتیده اوشبو «افغانستان عیاللرینینگ برقرار کمپنیلری اوچون جمغرمه» (AWFRE) دېب ناملنگن لایحه کېلگوسی بیر ییل دوامیده قریب ۱ مینگ ۵۰۰ نفر عیال تدبیرکارنی قۉللب-قوّتلشینی یازگن.
حساباتگه کۉره، اوشبو لایحهنی بیزنسلرنی مستحکملش و عایلهلر درآمدینی آشیریش آرقهلی عملگه آشیریش نتیجهسیده ۱۴ مینگدن آرتیق کیشی بالواسطه قمرهب آلینیشی کوتیلماقده.
اوشبو جمغرمه اسلام شریعتیگه موافق و گرو طلب قیلینمهیدیگن مالیوی مبلغلر بیلن بیر قطارده مالیوی و رقملی سوادخانلیک بۉییچه تعلیم، مصلحت، بیزنسنی رېجهلشتیریش همده بازارلرگه کیریش امکانیتینی قۉللب-قوّتلش خدمتلرینی تقدیم اېتهدی.
اوشبو لایحه دایرهسیده حاضرده ۱۰ مینگدن آرتیق افغانستانلیک عیال تدبیرکارلیک فعالیتی اوچون رخصتنامهگه اېگه؛ بو کۉرسهتکیچ سۉنگگی بېش ییل ایچیده ۱۰ برابر آشگن.
شونینگدېک، اوشبو ایکّی تشکیلات دستورنی کېنگهیتیریش اوچون ینه ۱۰ میلیون دالر مبلغ جلب قیلیشگه حرکت قیلماقده.
اگر اوشبو مبلغ تأمینلنسه، ینه قریب ۱۰ مینگ نفر عیال تدبیرکار مالیوی مبلغلر و بیزنسنی قۉللب-قوّتلش خدمتلریدن فایدهلنیش امکانیگه اېگه بۉلهدی.
