کاپیساده بیر عایلهنینگ تۉرت اعضاسی قوراللی شخصلر تامانیدن اۉلدیریلدی
۸صبح، کاپیسا: محلی منبعلر کاپیسا ولایتینینگ تگاب تومنیده بیر عایلهنینگ تۉرت اعضاسی، جملهدن، اوچ عیال قوراللی شخصلر تامانیدن اۉلدیریلگنینی اَیتماقده.
منبعلر دوشنبه، ۳۰ سنبله کونی ۸صبح گزېتهسیگه بېرگن صحبتیده اوشبو واقعه اۉتگن کېچه ساعت تخمیناً ۱:۰۰ ده تگاب تومنیگه قرهشلی «ببرخواجه» قیشلاغیده صادر بۉلگنینی اَیتدی.
منبعلرگه کۉره، قوراللی شخصلر عایلهنینگ اوشبو تۉرت اعضاسینی آتیب اۉلدیرگچ، واقعه جاییدن قاچیب کېتگن.
منبعلر قۉشیمچه قیلیشیچه، حاضرگچه اوشبو واقعهنینگ سببی و مقصدی انیقلنمهگن.
طالباننینگ کاپیسادهگی ایچکی ایشلر قوماندانلیگی هم اوشبو واقعهنی تصدیقلهگن، بیراق اونینگ قندهی صادر بۉلگنی حقیده قۉشیمچه تفصیلات بېرمهگن.
بو واقعه مملکت وطنداشلری تورلی ولایتلرده جنایتلر و مقصدلی قاتللیکلر کۉپهیگنیدن شکایت قیلهیاتگن بیر پیتده یوز بېردی.
اۉتگن کون هم منبعلر بادغیسده بیر شفاکارنینگ اۉلدیریلگنی، کابلده بیر یاش ییگیتنینگ قتل قیلینگنی، فراهده ینه بیر یاش ییگیتنینگ اۉزینی آسگنی و هرات ولایتینینگ غوریان تومنیده ایکّی بالهنینگ جسدی تاپیلگنی حقیده خبر بېرگن اېدی.
