یان اېگلند سۉنگگی بېش ییلنی افغانستان خلقی اوچون امیدسیزلیککه آلیب بارووچی ییللر دېب اتهدی
۸صبح، کابل: ناروی قاچقینلر کېنگشی باشلیغی یان اېگلند سۉنگگی بېش ییل افغانستان خلقی اوچون امیدسیزلیککه آلیب بارووچی پسهییش ییللری بۉلگنینی اَیتدی. او بو مملکتدهگی عایلهلر آیمه-آی یامانلشیب بارهیاتگن بحرانگه دوچ کېلهیاتگنینی قۉشیمچه قیلدی.
ناروی قاچقینلر کېنگشی چهارشنبه کونی، ۱۸-سنبله، افغانستاندهگی عایلهلرنینگ احوالی حقیده حسابات اعلان قیلیب، آدملر کۉچیشگه مجبور بۉلیش، تۉقنهشوولر، اقلیم شوکلری و گېندېر کمسیتیشیدن کېلیب چیقهدیگن بحرانگه دوچ کېلهیاتگنینی بیلدیردی.
حساباتگه کۉره، یان اېگلند بو مملکت بوتونلهی تشلب قۉییلگنینی و بونینگ عیاللر و قیزلر اوچون دهشتلی عاقبتلرگه آلیب کېلهیاتگنینی اَیتگن.
او افغانستانگه سفری حقیده شوندهی دېدی: «چقهلاقلرنینگ تۉییب-آوقتلنمسلیگی آرتیب بارماقده، جماعهلر اېنگ آغیر احوالده و باشپناه تاپیش اوچون جایلری یۉق.»
اېگلند اېنگ عادی باشپناهلرده یشهشگه مجبور بۉلگن، بعضاً اېسه حتا تامسیز قالگن عایلهلر بیلن اوچرهشگنینی اَیتدی.
ناروی قاچقینلر کېنگشی باشلیغی بوگونگی کونده افغانستانده قَیتیب کېلگن عایلهلر دهشتلی احوالگه توشیب قالگنینی اَیتدی.
عینی پیتده، طالباننینگ قَیته حاکمیتنی اېگهللشی بیلن بو مملکتده قشّاقلیک ینهده کېنگهیدی، عیاللر تعلیم و ایشلشدن محروم قیلیندی همده یوز مینگلب مهاجرلرنینگ مجبوری قَیتریلیشی موجود معمالرنی ینهده کوچهیتیردی.
