۸صبح، کابل: طلعت‌بیک محمد صادقوف، دبیرکل سازمان پیمان امنیت جمعی، در سفر به تاجیکستان از بخش‌هایی از مرز میان افغانستان و تاجیکستان بازدید کرده است.
این سازمان، روز دوشنبه، ۸ سرطان، در گزارشی اعلام کرده که دبیرکل سازمان پیمان امنیت جمعی، با جنرال مرادعلی ربژادزاده، معاون کمیته دولتی امنیت ملی و فرمانده نیروهای مرزبانی تاجیکستان، در مورد روند اجرای برنامه هدف‌مند بین‌دولتی سازمان پیمان امنیت جمعی برای تقویت مرز تاجیکستان و افغانستان گفت‌وگو کرده است.
براساس گزارش، طلعت‌بیک محمد صادقوف ضمن بررسی بخش‌هایی از مرز، از یک گذرگاه مرزی و همچنین روند احداث یک جاده مرزی کوهستانی نیز بازدید کرده است.
در گزارش آمده که طلعت‌بیک محمد صادقوف، به دعوت شخصی امام‌علی رحمان، رییس جمهور تاجیکستان، برای دو روز به این کشور سفر کرده است.
قاچاق و ترانزیت مواد مخدر از مرز افغانستان به کشورهای آسیای میانه، به‌ویژه تاجیکستان و امنیت مرزی همواره یکی از نگرانی‌های کشورهای عضو سازمان پیمان امنیت جمعی بوده است.
