افغانستان عیاللر اوچون دنیاده‌گی اېنگ یامان مملکت دېب تانیلدی
۸صبح، کابل: امریکا نینگ جورج‌تاون بیلیم یورتیگه علاقه‌دار تدقیقات انستیتوتی، افغانستاننی دنیا نینگ ۱۸۸ دولتی آره‌سیده عیاللر اوچون اېنگ یامان مملکت صفتیده اعلان قیلدی.
مذکور مؤسسه، ۱۰- جدی، چهارشنبه کونی، اعلان قیلگن ییللیک گزارشیده افغانستاندن کېینگی ا‌ۉرینلرده یمن، سودان، گیتی و بوروندی جایلشگنینی قید اېتگن.
گزارشده عیاللر احوالی اوچ اساسی کۉرسه‌تکیچ، اشتراک، عدالت و خوفسیزلیک مېزانلری اساسیده تحلیل قیلینگن. نتیجه‌لرگه کۉره، افغان عیاللری خوفسیزلیک و عدالتگه کیریش امکانیتی بۉییچه دنیاده گی مقیاسده اېنگ قویی پاغانه‌ده قالماقده.
گزارشده تأکیدلنیشیچه، افغانستانده عیاللر و قیزلر هنوز جمعیتده‌گی اېنگ ضعیف و حمایه‌سیز گروهلردن بیری حسابلنه‌دی.
شونینگدېک، حجتده قید اېتیلیشیچه، افغانستان بیرلشگن ملتلر تشکیلاتی نینگ سۉنگگی جنسی رواجلنیش کورستکیچی بۉییچه یمندن کېین جدول نینگ اېنگ آخریده جایلشگن.
گزارشگه کۉره، عیاللر نینگ ایشلش و تعلیم آلیش حقوقلریگه قۉییلگن کېسکین چېکلاولر اولر نینگ انسان سیورلیک یاردملر همده اساسی خدمتلردن فایده‌لنیش امکانیتلرینی هم جدی درجه‌ده ایزدن چیقرگن.
گزارش نینگ ینه بیر قسمیده افغانستان کۉچه‌لری، ایریم باشقه دولتلر کبی، عیاللر اوچون خوفسیز محیط حسابلنمسلیگی قید اېتیلگن.
مذکور وضعیت نینگ اساسی سببلریدن بیری صفتیده طالبان نینگ سیاستی و عملیاتی کۉرستیلگن. گزارشده ایتیلیشیچه، طالبان عیاللر نینگ جماعت حیاتیده‌گی اشتراکینی قطعی نظارت آستیگه آلیب، اۉز قاعده‌لرینی زۉرآورلیک آرقه‌لی تطبیق اېتماقده.
بو آره‌ده ۲۰۲۵-ییلگی دنیاده گی تینچلیک کورستکیچی هم افغانستان هنوز دنیاده‌گی اېنگ بې‌قرار دولتلر قطاریده قاله‌یاتگنینی کۉرسه‌تماقده.
مذکور گزارشگه کۉره، افغانستان ۱۶۳ دولت آره‌سیده ۱۵۸-ا‌ۉریننی اېگه‌للب، دنیاده‌گی بېشینچی اېنگ خوفلی مملکت همده جنوبی آسیا منطقه‌سیده‌گی اېنگ ناتینچ دولت صفتیده قید اېتیلگن.
