پاکستان حربی‌لری نینگ ایران تۉپراغی گه هوا هجومی؛ «اۉچ عیال و تۉرت باله هلاک بولگن»
پاکستان تشقی ایشلر وزیرلیگی بیر بیانیه ترقه‌تیب، بو مملکت حربی کوچلری ایران نینگ سیستان و بلوچستان ولایتیده «ترورچی گروه‌لر نینگ قرارگاه‌لری» گه قرشی هجوم اۉیوشتیرگنینی تصدیقله‌گن.
اوشبو وزیرلیک ۱۸-جنوری، پنج‌شنبه کونی، بو هجوم‌لر عاقبتیده بیر قطار شبه‌نظامی‌لر اۉلدیریلگنینی معلوم قیلگن.
بیانیه ده کېلیشیچه: «پاکستان اۉز خلقی نینگ خوفسیزلیگی اوچون مقدس و دخل‌سیز برچه چاره‌لرنی کۉریب حرکت‌لری گه دوام بیره‌دی.»
بیانیه ده، پاکستان ایران حاکمیتی و حدودی گه حرمت قیلیشی تاکیدلنگن: «بوگونگی حرکت نینگ یگانه مقصدی پاکستان خوفسیزلیگی و ملی منفعتینی تامینلش بولگن.»
عین‌حالده، سیستان و بلوچستان ولایتی حاکمی نینگ خوفسیزلیک ایشلری بوییچه اورین باسری، چېگره ده یېرلشگن بیر قیشلاق ده پاکستان نینگ راکته هجومی عاقبتیده «ایران‌لیک یېتّی تینج اهالی» جان بیرگنلر.
مهر گزارشی، علی‌رضا مرحمتی نینگ ایتیشیچه: «بوگۉن ایرته‌لب ساعت ۵:۰۴ اطرافی ده سراوان تومنی حدودلریده نیچه پارتلش آوازی ایشیتیلگن، تیکشیروولردن کیین پاکستان ایران نینگ چیگره قیشلاق‌لریدن بیری گه راکته هجوم اۉیوشتیرگنی بیللی بولدی.»
اۉنگه کوره، بو هجوم عاقبتیده چیت‌اېللیک اۉچ عیال و تۉرت باله جان بیرگنلر.
او نینگ کۉپه‌یتیریشیچه: «سراوان تومنی یقینیده بیر پارتلش یوز بیرگن و تلفاتی بولمه‌گن.»
ایتیش کېره‌ک، نیچه ساعت آلدین اجتماعی ترماق‌لر ده پاکستان حربی کوچلری ایران توپراغیده بلوچ شبه‌نظامی‌لر قرارگاهی گه هوایی هجوم اویۉشتیریشی گه دایر گزارش‌لر ترقه‌لگن.
بو گزارش‌لر اساسیده، «بلوچ جدایی طلب‌لری» آغیر زیان کورگن.
«حال وش» خبری کانالی، سراوان شهری نینگ ایریم قسم‌لری گه راکته هجوم اویۉشتیریلیب و بو منطقه یشاوچیلری دیوارلر آستیده قالگنینی معلوم قیلگن.
ایران سپاه پاسداران کوچلری نینگ ایکی کون آلدین پاکستان بلوچستان ایالتی گه راکته هجومی دن کیین، پاکستان حربی کوچلری ایران نینگ توپراغی گه هجوم قیلگن.