سانچارک‌ده اۉزبېک تیلی ملی کونی نشانلندی
۸صبح، سرپل: اۉزبېک تیلی ملی کونی سرپل ولایتی‌نینگ سانچارک تومنیده بیر قطار مدنی فعاللر و آقسقاللری اشتراکیده اۉتکزیلگن تدبیرده نشانلندی.
اوشبو تدبیر جمعه کونی، ۱ عقرب، محلی اهالی تامانیدن ۲۹ میزان، اۉزبېک تیلی ملی کونی مناسبتی بیلن تشکیل اېتیلدی.
مراسمده اۉنلب محلی اهالی وکیللری، آقسقاللر، مدنی فعاللر و یاشلر اشتراک اېتیب، اۉزبېک تیلی‌نینگ رواجلنیشی و ترقیاتی حقیده نطق سۉزله‌دیلر.
اشتراکچیلر، شونینگدېک، اۉزبېک تیلیده تعلیم بېریشگه، اینیقسه، اۉزبېک باله‌لری‌نینگ آنه تیلیده تعلیم آلیشیگه اعتبار قره‌تیشنی طلب قیلدیلر.
شو بیلن بیرگه، تدبیر دایره‌سیده طعاملر، کتابلر و مدنی بویوملر کۉرگزمه‌سی هم تشکیل اېتیلدی همده اشتراکچیلرگه اۉنلب کتابلر ترقه‌تیلدی.
تأکیدلش جایزکی، ۲۹ میزان اۉزبېک تیلی ملی کونی مناسبتی بیلن بیر وقتده کۉپلب تدبیرلر اۉتکزیلماقده. بو تدبیرلرده، اۉزبېک ضیالیلری اوشبو تیلنی رواجلنتیریشگه، اینیقسه، اۉزبېک تیلیده تعلیم آلیش امکانیتلرینی یره‌تیشگه اعتبار قره‌تیشنی طلب قیلدیلر.
