بدخشان ده ییتکیرمه‌لر نینگ یامان احوالی؛ ۴۹ ییتکیرمه دن ۷ ییتکیرمه فعال دیر
بدخشان ده خصوصی محلی ییتکیرمه‌لر مسئوللری نینگ ایتیشلریچه، اقتصادی قیینچیلیک و طالبان تامانیدن یره‌تیلگن چیکلاولر باعث ایریم قیینچیلیکلر بیلن روپه‌ره بولگنلر. بو گروه تامانیدن بیریلگن بویروغ‌لر و یره‌تیلگن چیکلاولر باعث مذکور ولایت ده کوپ سانده ییتکیرمه‌لر فعالیت‌لرینی توخته‌تیش گه مجبور بولگن. ییتکیرمه‌لر گه قوشیمچه، خبرچیلر هم اطلاعات گه قول تاپه آلمسلیک و طالبان تامانیدن تهدید بولیش باعث ایش دن قول تارتگنلر.
بدخشان ده ییتکیرمه‌لر مسئوللری ایشلری برابریده‌گی قیینچیلیکلر دن خواطر بیلدیریب ایتیشلریچه، سابق دولت قوله‌مسدن آلدین، ۴۹ تلویزیون، رادیو و چاپی ییتکیرمه فعالیت قیلماقده ایدی، بیراق حاضرگی کون ده یالغیز خصوصی تورت رادیو، ایکی تلویزیون و دولتی بیر چاپی ییتکیرمه فعالیت قیلماقده. اولر گه کوره، طالبان حاکمیتیدن آلدین، ۱۱ رادیو، اوچ تلویزیون و ۳۵ چاپی ییتکیرمه فعالیت قیلر ایدی.
خصوصی ییتکیرمه‌لر دن بیری نینگ مدیر مسوولی (مستعار اسملی) نسرین آزاد، ۸ صبح کونده‌لیگی بیلن اوتکزگن صحبتیده ایتیشیچه، طالبان حاکمیتیدن کیین اقتصادی قیین احوال و بو گروه تامانیدن خبرچیلر اینیقسه عیاللر گه یره‌تیلگن چیکلاولر باعث بو ییتکیرمه اوز فعالیتینی توخته‌تیش گه مجبور بولگن.
خانم آزاده گه کوره: «آلتی ییل آلدین، بدخشان بیلیم یورتی ژورنالیزم فاکولته‌سیده قطار عیال خبرچیلر بیلن عیاللر حقوقی خصوصیده هفته‌‌نامه نی فعال قیلیب و خبری گزارش‌لرنی نشر قیلر ایدیک. آلدین ریکلام و آگاهی‌لیک بیریش پروژه‌لر دن پول تاپیب و همکسب‌لریمیز نینگ آی‌لیکلرینی تولر ایدیک.»
محلی رادیولر دن بیری نینگ مسوول مدیری (مستعار اسملی) ابراهیم دانش نینگ ایتیشیچه، سرمایه یاتقیزیش و کوپ سعی‌وحرکت‌لر همده اجتماعی، فرهنگی، هنری اینیقسه محلی موسیقه نشر قیلیش اوچون بو رادیو نی فعال قیلگن ایدی. بو رادیو یالغیز ایکی ییل فعالیت قیلیب و طالبان حاکمیتیدن کیین اقتصادی قیینچیلیک طفیلی فعالیتی توخته‌گن.
بدخشان ده خصوصی تلویزیون‌لردن بیری نینگ مدیر مسوولی (مستعار اسملی) عباس حکیمی حاضر طالبان تامانیدن یره‌تیلگن چیکلاولر باعث فعالیتی توخته‌گن ایتیشیچه، اوتمیش ده طرف‌سیزلیک نی سقلش بیلن تنقیدی مطلب‌لر نشر قیلر ایدیلر؛ لیکن طالبان نینگ اره‌لشووی و اطلاعات گه قول تاپه آلمسلیک‌لری باعث بو ییتکیرمه نینگ فعالیتی توخته‌گن.
بدخشان ده ییتکیرمه‌لر مسوللری نینگ ایتیشلریچه، اولر نینگ اونگیده‌گی اساسی معما اطلاعات گه قول تاپه آلمسلیک دیر و حاضرگچه بو ولایت ده خبرچیلر گه معلومات بیریش فرهنگی نهادینه بولمه‌گن.
بدخشان ده ملی خبرچیلر دن احمد الهام گه کوره، سونگی کونلر ده محلی ییتکیرمه‌لر و خبرچیلر اطلاعات گه قول تاپه آلمسلیک قیینچیلیگی بیلن دوچ دیر. او نینگ ایتیشیچه: «بدخشان ده‌گی خبرچیلر حاضر اقتصادی قیینچیلیک بیلن دوچ دیر. اطلاعات گه قول تاپه آلمسلیک باشقه معما، خبری سوژه یا که خبری دستور سوژه‌سی حقیده مسئوللر دن اطلاعات سوره‌ش اجازه‌میز یوق.»
عین‌حالده، افغانستان خبرچیلر ملی اتحادیه‌سی بدخشان ده خصوصی ییتکیرمه‌لر فعالیتی توخته‌لیشیدن خواطر بیلدیریب، بو ولایت ده‌گی ییتکیرمه‌لر اقتصادی قیینچیلیک بیلن دوچ بولیب و خبرچیلر ایشلرینی قولدن بیریش گه سبب بولگنینی معلوم قیله‌دی.
بدخشان ده خبرچیلر ملی اتحادیه مسوولی احمد جواد فروغ نینگ ایتیشیچه، بو ولایت ده خصوصی چاپی هیچ ییتکیرمه نینگ فعالیتی یوق و یالغیز دولتی چاپی بیر نشریه فعالیت قیلماقده.
فروغ جنابلری نینگ کوپه‌یتیریشیچه، جمهوریت توزومی قوله‌شیدن کیین، خبرچیلر نینگ اطلاعات گه قول تاپه آلمسلیگی کتته معما گه اوزگرگن و بو اتحادیه نینگ طالبان محلی رسمی‌لری بیلن اوتکزگن ییغیلیش‌لری هیچ نتیجه بیرمه‌گن.
بدخشان ده خبرچیلر ملی اتحادیه مسوولی گه کوره: «خصوصی ییتکیرمه‌لر نینگ اقتصادی قیینچیلیگی خصوصیده ییتکیرمه‌لر دن حمایت قیلووچی موسسه‌لر حاضرگچه اقدام قیلمه‌گن. عین‌حالده بو قیینچیلیک موسسه‌لر مسووللری بیلن شریک قیلینگن.»
شو بیلن بیرگه، طالبان حاکمیتی ده بدخشان معلومات و مدنیت ریاستی نینگ اطلاعات آمری حکمت‌الله محمدی نینگ ایتیشیچه، بو نهاد ییتکیرمه‌لر رولی و اطلاعات نی شریک قیلیش ده دولت اداره‌لری حصه قوشیشی باره‌سیده ییغیلیش اوتکزگن و ییتکیرمه‌لر قیینچیلیگینی کابل ده اوشبو گروه مدیریتی ده معلومات و مدنیت وزیرلیگی بیلن شریک قیلگن.
محمدی جنابلری نینگ ایشانچی گه کوره، ییتکیرمه‌لر طالبان حاکمیتی ده اقتصادی قیینچیلیک باعث فعالیت‌لرینی توخته‌تگن و هیچ ییتکیرمه بو گروه نینگ باسیم‌لری باعث فعالیتینی توختتمه‌گن.
عین‌حالده، بدخشان ده‌گی خبرچیلر طالبان نی سانسور و ییتکیرمه‌لر ایشلری گه اره‌لشیش گه عیبله‌یدیلر. اولر نینگ ایتیشلریچه، بو گروه ییتکیرمه‌لر قانونی گه عمل قیلگن حالده، موجود قیینچیلیکلر تیزلیک بیلن حل بولیشی ممکن.
خوفسیزلیک تهدیدلر باعث گزارش ده آت‌لری ذکر بولمسلیکنی سوره‌گن اوشبو خبرچیلر، طالبان کینگ کولملی چیکلاو یره‌تیش بیلن ایرکین ییتکیرمه‌لر فعالیتینی قیین و حتا ممکن‌سیز قیلگنینی معلوم قیله‌دیلر.