بایدن: پوتین و حماس نینگ غلبه قازانیشگه یۉل قۉیمه‌یمیز
امریکا قۉشمه ایالتلری نینگ جمهور رییسی جوبایدن، اسراییل‌گه قیلگن سفری نینگ یکونیده، پوتین اوکراینده و حماس اسراییل‌ده غلبه قازانیشیگه یۉل قۉیمه‌یمیز دېب ایتدی.
سی‌ان‌ان نینگ گزارش قیلیشیچه، ۱۹- اکتوبر پنج‌شنبه کېچه‌سی جوبایدن آق اویده اوکراین و اسراییل اوروشیگه بغیشلنگن نطق سۉزیده دموکراسی و امریکا قدریتلری سقله‌نیشی مقصدیده بو ایکّی مملکتنی حمایت قیلیش ضرور دېب تیلگه آلگن.
بایدن نینگ سۉزلریگه کۉره: «حماس و پوتین فرقلی تهدیدلردن نماینده‌لیک قیله‌دیلر، اما اولر بو موردده مشترک دیرلر؛ هر ایکّیسی هم قۉشنی بیر ممکتده‌گی دموکراسینی بوتونله‌ی یۉق قیلیشنی ایسته‌یدیلر»
امریکا جمهور رییسی اوشبو نطق سۉزلریده مملکتی نینگ کانگریسیدن اۉزی نینگ اوکراین و اسراییل‌گه کمک یوباریش بۉییچه لایحه‌سینی حمایت قیلیب تصدیقلشلرینی سۉره‌دی.
اونینگ کۉپه‌یتیریشیچه: «اسراییل و اوکراین نینگ موفقیت تضمینی بیزلرنینگ خوفسیزلیگیمیز اوچون ضروری دیر. مېن کانگرسگه زودلیک بیلن ملی خوفسیزلیک احتیاجلریمیزنی مهم همکارلریمیز، شو جمله‌دن اسراییل‌نی قۉللب – قوّتلش آرقلی مالیه‌لشتیریشنی سۉره‌یمن.
شونینگدیک او، ایران‌نی حماس و روسیه‌گه کمک قیلگنی باره‌سیده جوابگرلیککه تارته‌دی.
بایدن نینگ تاکیدله‌شیچه: «ایران روسیه‌نی اوکراینده و شونینگدېک حماسنی قۉللیدی و بونینگ اوچون بیزاونی جوابگرلیککه تارته‌میز.»
امریکانینگ اوشبو بیرینچی آدمی اسراییل و فلسطین‌ده‌گی ایری دولتلر لایحه‌سیدن اۉز حمایتینی اعلام قیلیب ایتیشیچه: «ایکّی دولت‌لیک لایحه‌سیدن قۉل کۉتره آلمه‌یمیز اسراییل‌لیک همده فلسطینلیکلر خوفسیزلیک، شرف و تینچلیکده یششگه سزاوارلر.»
شونینگدېک بایدن صحبتلری نینگ باشقه بیر بۉلیمیده روسیه ناتوگه اعضا مملکتلردن بیریگه حمله قیلگن حالده، بو مملکت امریکانینگ کېسکین جوابیگه یوزمه یوز بۉله‌دی دېدی.
بو قبیل سۉزلر، بوندن آلدین امریکا کانگرسی اوکراین‌گه مالی و حربی یاردملر یوباریلیشی یانیده ییلیده ۱۰۰ میلیارد دالر یوباریش تۉغریسیده‌گی پیشنهادگه قرشیلیک بیلدیرگن حالده، تیلگه آلینماقده.