یونسکو و یونیسف: افغانستان باله‌لری‌نینگ ۵۳ فایزی رسمی تعلیمدن محروم قیلینگن
۸صبح، کابل: بیرلشگن ملتلر تشکیلاتی‌نینگ تعلیم، فن و مدنیت تشکیلاتی (یونسکو) و بیرلشگن ملتلر تشکیلاتی‌نینگ باله‌لرنی قۉللب-قۉتلش جمغرمه‌سی (یونیسف) افغانستانده باشلنغیچ تعلیم یاشیده‌گی باله‌لر‌نینگ ۵۳ فایزی رسمی تعلیم آلیش امکانیتیدن محروم اېکنینی معلوم قیلدی.
اوشبو ایکّی تشکیلات پنج‌شنبه کونی، ۳۰-میزان، افغانستانده تعلیم‌نینگ ۲۰۲۶-ییلده‌گی حالتی بۉییچه قۉشمه حساباتیده ۲۰۲۱-ییلدن بویان ۲،۶ میلیوندن آرتیق اۉسمیر قیز هم اۉرته تعلیمدن محروم اېتیلگنینی بیلدیردی.
حساباتگه کۉره، هر بیر اۉقوو ییلیده ینه ۳۹۷ مینگ نفر قیز تعلیمنی دوام اېتتیریش امکانیتیدن محروم بۉله‌دی.
حساباتده قید اېتیلیشیچه، باشلنغیچ تعلیم باسقیچینی توگه‌ته‌یاتگن باله‌لر‌نینگ ۹۳ فایزی اۉز یاشیگه ماس عادی متننی اۉقیب، توشونه آلمه‌یدی.
شونینگدېک، ماجرالر یاکه ویرانه‌گرچیلیکلر سببلی مینگدن آرتیق مکتب یاپیق قالماقده.
حساباتده ملَکه‌لی اۉقیتووچیلر، اینیقسه، عیال اۉقیتووچیلر یېتیشمسلیگی، اۉقوو ماتریاللری‌نینگ تنقیصلیگی، قیزلر تعلیمیگه قۉییلگن چېکلاولر و سرمایه کېریتیش‌لر‌نینگ کمه‌ییشی افغانستاندهگی تعلیم انقراضی‌نینگ اساسی عامللری صفتیده کۉرسه‌تیلگن.
افغانستانده ۵ یاشدن ۱۷ یاشگچه بۉلگن باله‌لر‌نینگ قریب ۳۰ فایزی ایش قیله‌دی، عیاللر‌نینگ اېسه ۲۸ فایزی ۱۸ یاشگه تۉلمسدن تورموشگه چیققن.
شونینگدېک، اۉسمیرلر و یاشلر‌نینگ ۴۲ فایزی تعلیم آلمه‌یدی، ایش بیلن بند اېمس و کسب-هنر اۉرگه‌تیش دستورلریده هم قتنه‌شمه‌یدی.
اوشبو گروه‌نینگ ۶۸ فایزینی قیزلر و یاش عیاللر تشکیل اېته‌دی.
مذکور ایکّی تشکیلات افغانستان تعلیم تیزیمی ۲۰۲۶ و ۲۰۲۷-ییللرده ۳۲۴ میلیون دالر مبلغ تنقیصلیگیگه دوچ کېلیشی حقیده آگاهلنتیردی.
اولر تعلیم آلیش امکانیتلرینی کېنگه‌یتیریش و اونینگ صفتینی یخشیلش اوچون برقرار سرمایه‌لر کیریتیش ضرورلیگینی تأکیدله‌دیلر.
