بیرلشگن ملتلر تشکیلاتی نینگ ییللیک ییغینیده طالبلر حکمرانلیگی نا قانونیلیگی تاکیدلندی
دنیا رهبرلری و نماینده‌لری تۉپله‌نیشی بیلن بۉلیب اۉته دیگن بیرلشگن ملتلر تشکیلاتی نینگ ییللیک ییغینی، معین بیر درجه‌ده نمایشی دېب سنه‌له‌دی و کۉپینچه پیتلر بو اۉلتیریش مهم طرح و قرارلر بیلن یکونلنمه‌یدی؛ اما اوشبو رهبرلرنینگ مذکور اوچره‌شووده‌گی و یازیشمه‌لر آره‌سیده‌گی رسمی بیاناتلریده دنیاده‌گی سیاسی و خوفسیزلیک حالتی، شونینگدېک، بحرانلی منطقه‌لر حقیده کۉپ فکرلر موجود، بو بیزنی دنیا و منطقوی سیاست آنگیده نیمه‌لر صادر بۉله‌یاتگنینی توشونیشگه آلیب کېله‌دی. بو رهبرلرنینگ سۉزلریده‌گی تشبهه و شبه‌لردن تارتیب، بعضی بیر کیشیلرنینگ بویروغی و رجزخوانلیگیگه قره‌گنده، بوندن هم کتّه‌راق تشویشلر، استقبال و یاندشوولرنی انگلش ممکن. افغانستان تۉغریسیده، کۉزگه کۉرینگن اېنگ مهم نقطه بو افغانستاندهگی طالبلر حکمرانلیگینی دنیا تامانیدن ناقانونی دېب انگله‌نیشی اېدی و شونینگ اوچون هم همه باشقه بیر نظام شکلله‌نیشینی، مشروعیت اوچون پیش شرط قۉیلگنلر؛ بو نظام اېسه قوملردن آلیب حزبلرگچه و تورلی اجتماعی قتملر اشتراکیده اورته گه کیلیشی و بوتون افغانستان خلقی نینگ نماینده‌سی بۉلیشیگه تاکید قیلگنلر. اۉته دینی مایللیکلرگه اېگه بۉلگن قوراللی گروه نینگ حکمرانلیگی برقرار تینچلیک و برقرارلیککه آلیب کېلمسلیگی، اونینگ حکمرانلیگی منطقه و دنیا اوچون طاقت قیلیب بۉلمه‌یدی، دېگن فکرده اېدی همه.
افغانستاندهگی حاضرگی وضعیت بیر تاماندن تهدید، ایکّینچی تاماندن اېسه امکانیت. بو مملکتده خلق ارا معیار و عرف-عادتلرگه موافق، شو دولت خلقی وکیلی صفتیده دنیا بیلن معامله قیله آله‌دیگن حربی کوچ یۉقلیگی معناسیده تهدید دیر. بو حالت سرمایه یاتقیزیلیشی و انسان کوچی رواجلنتیریلیشیگه و آدملر حیاتی و یشاوچیلر فراوانلیگینی آشیریش اوچون موجود بۉلگن باشقه امکانیتلرگه تۉسقینلیک قیله‌دی. عملده‌گی باشقروونینگ ناقانونیلیگی نینگ عاقبتلری، بو مملکتده‌گی عیاللرنینگ اَینچلی احوالیگه قۉشیمچه روشده، هر کونی باشقه کۉپلب یشاوچیلرنینگ حیاتیده سېزیله‌دی، میلیونلب آدم اۉزینی کتّه قماقخانه‌ده توشگن و اوندن قنده‌ی قیلیب چیقیشگه حرکت قیلیشنی اۉیله‌یدی. بو وضعیت باشقه نقطه‌ی نظردن هم امکانیت دیر، چونکه دنیا نینگ هېچ بیر دولتی افغانستان نینگ قانونی حکومتی صفتیده طالبان حکمرانلیگینی حاضرگی کۉرینیشیده تن آلیشگه تیار اېمسلیگینی بیلسک؛ دېمک، برچه سعی-حرکتلرنی اۉرنه‌تیشگه قره‌تیش لازم.
بو تیزیم، گرچه اونده طالبان موجود بۉلسه هم، عملده همه نرسه‌نی قمره‌ب آلووچی تیزیم بۉلیب، مملکت ایچیکریسی و تشقریسیده‌گی آدملر اوچون ایشانچلی و مقبول حکومت ترکیبی قِسملریگه اېگه بۉلسه یخشی بۉله‌دی. اېندی برچه کوچلر اۉز سعی-حرکتینی مملکت نینگ کېله‌جک تیزیمی نینگ یۉل خریطه‌سینی توزیشگه قره‌تیش وقتی کېلدی.
کېله‌جکده‌گی تیزیمنی قوریش اوچون ۴۰ ییللیک اوروش عاقبتلریدن و ۲۰ ییللیک جمهوریت نینگ خطالریدن خلاص بۉلیش کېره‌ک، شو وقتگچه مملکت نینگ بوگونکی احتیاجلرینی قاندیریش اوچون تیزیم نینگ پای‌دېواری قۉییلیشی شرط. ایشلر باشیده کیم و قَیسی تامان توریشی و حتا اونگه قنده‌ی عنوان بېریلیشی مهم اېمس، لېکن مملکت اوچون مقبول اساسی قانون تیارلنیشی جوده مهم و بو قانونده حکمدارلر نینگ صلاحیتی چېکلنگن و میکانیزملر نظرده توتیلیشی کېره‌ک حکمدارلرنی نظارت قیلیش و اولرنینگ مسوولیتینی آشیریش، یشاوچیلرنینگ تورلی درجه‌ده‌گی دولت باشقروویده اشتراک اېتیش یۉللرینی آچیش اوچون خلق نینگ و صلاحیتلرینی آشیریش بۉلسین. دیکتاتورلیکنی کېلتیریب چیقره‌دیگن و دېموکراسیگه تۉسقینلیک قیله‌دیگن صلاحیتلر مرکزله‌شیشیگه قطعی یۉل قۉیمسلیک کېره‌ک. حکومت صلاحیتلری تورلی درجه‌لرده تقسیملنیشی کېره‌ک، شونده اۉزباشیمچه‌لیک، ظلم و ظلمگه یۉل قۉییلمه‌یدی.