بانک فاجعه‌سی‌نینگ اچّیق یکونی؛ طالبان کابل بانکینی «افغان ملی بانکی» بیلن بیرلشتیره‌دی
امین کاوه
۸صبح گزېته‌سی طالبان یېتکچیسی هبت‌الله آخوندزاده اوشبو گروه‌نینگ مالیه وزیرلیگی و طالبان کمیسیونی تامانیدن کابل بانکینی اوشبو گروه نظارتی آستیده‌گی «افغان ملی بانکی» بیلن بیرلشتیریش بۉییچه ایلگری سوریلگن تکلیفنی تصدیقله‌گنینی کۉرسه‌تووچی حجتلرنی قۉلگه کیریتدی. اوشبو حسابات نتیجه‌لری کابل بانکی مالیوی معمالردن تشقری، تیزیم بیلن باغلیق جدّی قیینچیلیکلرگه هم دوچ کېله‌یاتگنینی کۉرسه‌ته‌دی. حجتلرده اوشبو بانک حتا ایچکی تیزیملری ایشدن چیقیش درجه‌سیگچه یېتیب کېلگنی قید اېتیلگن. حجتلرگه کۉره، «اوریکل» کمپنیسی کابل بانکی‌نینگ «فلکسی‌کیوب» مرکزی دستوری تأمیناتینی ۱۴.۳-نسخه‌دن ۱۴.۷-نسخه‌گه ینگیلش حقیده‌گی سۉراوینی رد اېتگن و اۉز خدمتلرینی تیزیمگه ییللیک تخنیکی خدمت کۉرسه‌تیش بیلن چېکله‌گن. شونینگدېک، حساباتده کابل بانکی اولوشدارلری عمومی ییغیلیشی همده اخبارات تکنالوژی‌لری کمیته‌سی‌نینگ بیاننامه‌لری کۉریب چیقیلگن. اوشبو حجتلر بانک‌نینگ معلوماتلرنی سقلش قوریلمه‌لری خدمت مدتینی یکونله‌گنینی و ۲۰۲۳-ییلده مرکزی معلوماتلر بزه‌سی‌نینگ سقلش سیغیمی قریب ۹۲ فایزگه یېتگنینی کۉرسه‌ته‌دی. عینی پیتده، بانک اولوشدارلری عمومی ییغیلیشی بیاننامه‌سیدن معلوم بۉلیشیچه، کابل بانکی‌نینگ ۲۰۲۶ – ییلدن ۲۰۲۸-ییلگچه مۉلجللنگن استراتژیک رېجه‌سی بۉییچه قرار قبول قیلیش جریانی ملی بانک بیلن بیرلشیش جریانی سببلی کېچیکتیریلگن. بو حالت سابق حکومت‌نینگ عالی اقتصادی کېنگشی اۉشه پیتده‌گی مالیه وزیرلیگی تکلیفیگه اساسا اوشبو بانکلرنی بیرلشتیریشگه راضیلیک بېرگنیگه قره‌مه‌ی یوز بېرماقده. اۉشه وقتده مالیه وزیرلیگی کابل بانکی، پشتنی بانکی و افغان ملی بانکی اۉزارا بیرلشتیریلیشینی اعلان قیلگن اېدی.
۸صبح گزېته‌سی هبت‌الله آخوندزاده کابل بانکینی اوشبو گروه نظارتی آستیده‌گی ملی بانک بیلن بیرلشتیرایش حقیده بویروق چیقرگنینی کۉرسه‌تووچی حجتلرنی قۉلگه کیریتدی. حسابات نتیجه‌لری هبت‌الله اوشبو بویروقنی طالبان مالیه وزیرلیگی‌نینگ تکلیفی اساسیده چیقرگنینی کۉرسه‌ته‌دی.
طالبان مالیه وزیرلیگی اوشبو گروه نظارتی آستیده‌گی مرکزی بانککه یوبارگن مکتوبده کابل بانکینی ملی بانک بیلن بیرلشتیریش جریانی مالیه وزیرلیگی‌نینگ تکلیفی و طالبان یېتکچیسی هبت‌الله آخوندزاده‌‌نینگ معقوللشی اساسیده باشلنگنینی کۉریش ممکن. مکتوبدن معلوم بۉلیشیچه، طالبان مالیه وزیرلیگی‌نینگ تکلیفی دستلب هبت‌الله اداره‌سی تامانیدن اوشبو گروه‌نینگ اداری کمیسیونیگه یوباریلگن و طالبان یېتکچیسی مذکور کمیسیون‌نینگ فکرینی تصدیقله‌گن.
پشتو تیلیده یازیلگن مکتوب‌نینگ اصل متنیده اَیتیلیشیچه، طالبان مالیه وزیرلیگی‌نینگ ۱۴۴۵-ییل ۱۱-آیی‌نینگ ۲۰-کونیده‌گی ۳۱۷-سانلی تکلیفیدن سۉنگ، هبت‌الله ۱۴۴۵-ییل ۱۱-آیی‌نینگ ۲۶-کونیده‌گی ۵۷۲۵-سانلی فرمایشیده قوییده‌گیچه کۉرسه‌تمه بېرگن: «کۉریب چیقیلدی. تکلیف شوندن عبارتکی، بو مسأله بۉییچه اۉز فکرینی بیلدیریش اوچون اداری کمیسیونگه یوباریلسین. والسلام».
شوندن سۉنگ، طالبان کمیسیونی‌نینگ ۱۴۴۶-ییل ۱-آیی‌نینگ ۱۲-کونیده‌گی ۵-سانلی خلاصه‌سی هبت‌الله آخوندزاده اداره‌سیگه یوباریلگن. او اېسه ۱۴۴۶-ییل ۶-آیی‌نینگ ۲۹-کونیده‌گی ۳۳۸۳/۴۹۴-سانلی فرمایشی آرقه‌لی قوییده‌گیچه کۉرسه‌تمه بېرگن: «کۉریب چیقیلدی. وعلیکم السلام و رحمت‌الله و برکاته! شوندن سۉنگ، کابل بانکینی افغان بانکی بیلن بیرلشتیریش باره‌سیده هیات‌نینگ فکری بیز تامانیمیزدن تصدیقلنه‌دی».
شونینگدېک، طالبان مالیه وزیرلیگی رهبریت هیاتی‌نینگ یېتّینچی ییغیلیشی ۵-سانلی قراریگه موافق همده اوشبو مسأله‌گه عاید حجتلر اوّلراق طالبان نظارتیده‌گی مرکزی بانک بیلن بۉلیشیلگنیگه اشاره قیلگن حالده، ملی بانک و کابل بانکی رهبریتیدن ایکّله بانک‌نینگ ۲۰۲۴-ییلگی تیکشیروو حساباتلری همده مرکزی بانک‌نینگ اولر حقیده‌گی سۉنگگی نظارت حساباتلرینی تقدیم اېتیش سۉره‌لگن.
اوشبو مکتوبده طالبان مالیه وزیرلیگی افغان ملی بانکی و کابل بانکی رهبریتیدن ایکّله بانک‌نینگ تشکیلی توزیلمه‌سی، تیزیملری، نماینده‌لیکلری، اجرائیه هیاتی و کوزه‌توو کېنگشیگه عاید رۉیخطلر همده معلوماتلرنی هم تقدیم اېتیشنی سۉره‌گن.
مکتوبده مذکور مسأله بۉییچه ییغیلیش‌نینگ وقتی و کونی یقین آره‌ده واتس‌اپ گروهی آرقه‌لی بانککه معلوم قیلینیشی قید اېتیلگن. شونینگدېک، تېگیشلی بانک مسؤوللری ایشلرنی ایلگری سوریش مقصدیده اوشبو مسأله یوزه‌سیدن کېنگ قمراولی تکلیفلر، معلوماتلر و قره‌شلرینی تیّارلشلری همده ییغیلیشده اشتراک اېتیش اوچون ضرور تیّارگرلیک کۉریشلریگه امید بیلدیریلگن.
کابل بانکی دستوری تأمیناتنی ینگیلش امکانیتی یۉقلیگینی تصدیقله‌دی
کابل بانکی هم طالبان نظارتیده‌گی افغانستان مرکزی بانکیگه یوبارگن مکتوبیده اۉز تیزیمیده جدّی معمالر موجودلیگینی معلوم قیلگن. بانک‌نینگ اَیتیشیچه، اونینگ دستوری تأمیناتینی ینگیلش اوچون مسؤول بۉلگن اوریکل کمپنیسی بانک‌نینگ دستوری تأمینات نسخه‌سینی ینگیلش حقیده‌گی سۉراوینی رد اېتگن.
۸صبح گزېته‌سی قۉلگه کیریتگن اوشبو مکتوب نسخه‌سیدن معلوم بۉلیشیچه، کابل بانکی «اوریکل» کمپنیسی‌نینگ افغانستاندهگی دولت مؤسسه‌لری بیلن تجاری فعالیتینی چېکلش حقیده‌گی قراری یوزه‌سیدن خط یوبارگن. کابل بانکی مکتوبده کمپنی وکیلی بانک مسؤوللریگه اوریکل‌نینگ افغانستاندهگی فعالیتی چېکلنیشینی معلوم قیلگنینی بیلدیرگن.
طالبان نظارتیده‌گی افغانستان مرکزی بانکیگه یۉللنگن مکتوبده قوییده‌گیلر کېلتیریلگن: «یقینده «اوریکل» کمپنیسی‌نینگ حقوقی بۉلیمی وکیلی مارک شنکر ۲۰۲۵-ییل ۱۶-اکتوبرده یوبارگن ایمیل آرقه‌لی بانک‌نینگ فلکسی‌کیوب دستوری تأمیناتینی ۱۴.۳-نسخه‌سیدن ۱۴.۷-نسخه‌سیگه ینگیلش حقیده‌گی سۉراوینی رد اېتدی. او اوریکل کمپنیسی ۲۰۲۴-ییل اکتوبر آییده ینگی سیاستنی اعلان قیلگنینی، اونگه کۉره، اَیریم مملکتلرده، جمله‌دن، افغانستانده هم دولت سکتوری تشکیلاتلری بیلن تیجاری فعالیت چېکلنگنینی معلوم قیلدی».
کابل بانکی اوشبو مکتوبده بانک اولوشدارلری عمومی ییغیلیشی‌نینگ ۱۴۰۴-ییل ۷-آیی‌نینگ ۲۰-کونیده اۉتکزیلگن نوبتدن تشقری ییغیلیشیگه هم اشاره قیلگن. بانک‌نینگ بیلدیریشیچه، اۉشه پیتده کابل بانکی اوچون استثنا قۉللش حقیده‌گی سۉراو «اوریکل» کمپنیسی‌نینگ حقوقی و قانونلرگه رعایه اېتیلیشینی نظارت قیلیش بۉلیمی تامانیدن ینه بیر بار کۉریب چیقیله‌یاتگن اېدی.
بیراق کابل بانکی‌نینگ اَیتیشیچه، یوقاریده تیلگه آلینگن ایمیل گه کۉره، بانکنی اوریکل‌نینگ ینگی سیاستیدن استثنا قیلیش و آزاد اېتیش حقیدگی سۉراو قطعی رد اېتیلگن. حاضرده کمپنی خدمتلری تیزیمگه ییللیک تخنیکی خدمت کۉرسه‌تیش بیلن چېکلنماقده.
بانک اوشبو قرار کابل بانکی اوچون حیاتی اهمیتگه اېگه بۉلگن تیزیمنی مدرنیزه قیلیش لایحه‌سینی عملگه آشیریش جریانیده جدّی معمالرنی یوزه‌گه کېلتیرگنینی و بانک‌نینگ تکنالوژیک محیطیده احتمالی عملیاتی خطرلرنی آشیرگنینی تأکیدله‌گن.
مکتوبده کابل بانکینی افغان ملی بانکی بیلن بیرلشتیریش جریانی طالبان مالیه وزیرلیگی و مرکزی بانکی تامانیدن کۉریب چیقیله‌یاتگنی قید اېتیلگن. «اوریکل» کمپنیسی تامانیدن بیلدیریلگن حالت هم بیرلشیش جریانیگه دایر ضرور قرارلرنی قبول قیلیش اوچون معلوم قیلینگن. کابل بانکی اوشبو مکتوب آرقه‌لی طالبان نظارتیده‌گی مرکزی بانکدن بانکنی افغان ملی بانکی بیلن بیرلشتیریش جریانیده ضرور یۉل-یۉریقلر بېریشنی سۉره‌گن.
کابل بانکی‌نینگ اخبارات تکنالوژی‌لری کمیته‌سی بیاننامه‌لری
شونینگدېک، ۸صبح گزېته‌سی قۉلگه کیریتگن کابل بانکی اخبارات تکنالوژی‌لری کمیته‌سی‌نینگ اَیریم بیاننامه‌لری اوشبو بانک تخنیکی آست-قورمه‌لر و معلوماتلرنی سقلش تیزیمیده جدّی معمالرگه دوچ کېلگنینی کۉرسه‌ته‌دی. کمیته‌‌نینگ بیاننامه‌لریدن بیریده بانک‌نینگ AIX سرورلری و IBM معلوماتلرنی سقلش قوریلمه‌لری‌نینگ خدمت مدتی توگه‌گنی، IBM کمپنیسی اېسه بیر نېچه ییل اوّل اوشبو اسکونه‌لرگه تخنیکی خدمت کۉرسه‌تیشنی تۉخته‌تگنی قید اېتیلگن.
حساباتده اَیتیلیشیچه، ۲۰۲۳-ییلده کابل بانکی‌نینگ مرکزی معلوماتلر بزه‌سی سقلش قوریلمه‌سی سیغیمی قریب ۹۲ فایزگه یېتگن. بو حالت‌نینگ دوام اېتیشی بانک تیزیمی‌نینگ ایشلشیگه جدّی خوف توغدیریشی و حتا اونینگ تۉخته‌ب قالیشیگه آلیب کېلیشی ممکن اېدی. شو سببلی تیزیم باشقرمه‌سی سقلش سیغیمینی آشیریش مقصدیده فایده‌لنیلمه‌یاتگن، هر بیری ۵۵۸ گیگابایت حجمگه اېگه آلتی ته قتّیق دیسکنی ایشگه توشیریشنی تکلیف قیلگن. تیزیم باشقرمه‌سی بهالشیگه کۉره، اوشبو چاره عملیاتلر حجمیگه قره‌ب سقلش قوریلمسی‌نینگ فایده‌لی خدمت مدتینی کمیده بیر ییلگه، کۉپی بیلن اېسه ایکّی-اوچ ییلگه اوزه‌یتیریشی ممکن اېدی.
بیراق سقلش قوریلمه‌سی سیغیمینی آشیریش رېجه‌سینی عملگه آشیریش هم تخنیکی خطرلر بیلن باغلیق بۉلگن. حساباتده GPFS کلاستری‌نینگ تۉخته‌ب قالیشی، کلاستر توگونلری اۉرته‌سیده ناموافقلیک یوزه‌گه کېلیشی همده معلوماتلر بزه‌سی سرورلری بیلن سقلش قوریلمه‌سی اۉرته‌سیده‌گی علاقه اوزیلیشی احتمالی قید اېتیلگن. اوشبو خطرلرگه قره‌مه‌ی، تیزیم باشقرمه‌سی آلتی ته قتّیق دیسکنی ایشگه توشیریشنی تیزیم‌نینگ تۉخته‌ب قالیشیگه یۉل قۉیمسلیک اوچون قیسقه مدتلی یگانه یېچیم صفتیده کۉرسه‌تگن.
کابل بانکی اولوشدارلری عمومی ییغیلیشی‌نینگ ییللیک بیاننامه‌لری
۸صبح گزېته‌سی کابل بانکی اولوشدارلری عمومی ییغیلیشی‌نینگ ۱۴۰۴-ییل ۱۹-حملده اۉتکزیلگن ییغیلیشی بیاننامسی نسخه‌سینی قۉلگه کیریتدی. اوشبو حجتگه کۉره، ییغیلیشده بانک‌نینگ ۲۰۲۴-ییلگی مالیوی حساباتلری کۉریب چیقیلیب، تصدیقلنگن همده مالیوی معمالر، تخنیکی اسکونه‌لردن فایده‌لنیش امکانیتی و بانک‌نینگ کېله‌جکده‌گی استراتژیک یۉنه‌لیشی محاکمه قیلینگن.
بیاننامه‌گه کۉره، کابل بانکی مسؤوللری خلق‌ارا چېکلاولر سببلی بانک اوچون ضرور بۉلگن اخبارات تکنالوژی‌لری اسکونه‌لرینی خرید قیلیش قیینلشگنیدن شکایت قیلگنلر. بانک اجرائیه هیاتی باشلیغی تخنیکی اسکونه‌لرنی خرید قیلیشده همکارلیک کۉرسه‌تیشنی سۉره‌گن و اینیقسه HSM خوفسیزلیک قوریلمسینی تیلگه آلگن. اوشبو قوریلمه بانکامه‌تلر (ATM) و سودا نقطه‌لریده‌گی تۉلاو اسکونه‌لری (POS) تیزیملری خوفسیزلیگینی تأمینلش اوچون ضرور حسابلنه‌دی. بانک مسؤوللری‌نینگ اَیتیشیچه، چېکلاولر طفیلی یوزه‌گه کېلگن چېکلاولر سببلی بونده‌ی اسکونه‌لرنی افغانستانده خرید قیلیش قیینلشگن یاکه امکانسیز بۉلیب قالگن.
بیاننامه‌‌نینگ باشقه بیر قِسمیده کابل بانکی‌نینگ ۲۰۲۳–۲۰۲۵-ییللرگه مۉلجللنگن عملده‌گی استراتژیک رېجه‌سی یکونلنیش عرفه‌سیده اېکنی و بانک ۲۰۲۶–۲۰۲۸-ییللر اوچون ینگی استراتژیک رېجه ایشلب چیقیشی کېره‌کلیگی قید اېتیلگن. بیاننامه‌گه کۉره، اوشبو رېجه‌‌نینگ مقصدی کابل بانکینی اسلامی تجارت بانکیگه ایلنتیریش و اونینگ فعالیت رخصت‌نامه‌سینی تېگیشلی روشده اۉزگرتیریشدن عبارت بۉلگن. بیراق اکسیه‌دارلر عمومی ییغیلیشی اعضالری بانک‌نینگ کېله‌جکده‌گی استراتژیک یۉنه‌لیشی بۉییچه قرار قبول قیلیشنی اونینگ افغان ملی بانکی بیلن بیرلشیش جریانی یکونلنگونگه قدَر کېچیکتیریشگه قرار قیلگنلر.
اوشبو بیاننامه‌ده هبت‌الله آخوندزاده‌‌نینگ کابل بانکینی افغان ملی بانکی بیلن بیرلشتیریش مسأله‌سیده هیات فکرینی تصدیقلش حقیده‌گی فرمایشی هم تیلگه آلینگن. حجتگه کۉره، بیرلشیش جریانی طالبان مالیه وزیرلیگی تامانیدن آلیب باریله‌یاتگنی سببلی بانک‌نینگ ینگی استراتژیک رېجه‌سی بۉییچه قرار قبول قیلیش اوشبو بیرلشوو‌نینگ تقدیری آیدینلشگونیگه قدَر کېچیکتیریلگن.
یقینده ۸صبح گزېته‌سی طالبان نظارتیده‌گی افغانستان مرکزی بانکی‌نینگ کابل بانکی فعالیتی یوزه‌سیدن اۉتکزیلگن کېینگی نظارت تېکشیرووی حساباتی‌نینگ بیر نسخه‌سینی هم قۉلگه کیریتگن اېدی. حساباتده بانک باشقرووی، ایچکی نظارت، بانک قاعده‌لریگه رعایه اېتیش و توزه‌تیش چاره‌لرینی عملگه آشیریش ساحه‌لریده معمالر دوام اېته‌یاتگنی کۉرسه‌تیلگن. حسابات نتیجه‌لریگه کۉره، مزاجلر عملیات‌لرینی نظارت قیلیشده‌گی ضعیفلیکلر، غزنه‌چیلیکنی باشقه‌ریشده‌گی کمچیلیکلر، مینگلب فعال بۉلمه‌گن حسابور‌قلر‌نینگ سقلنیب قالیشی، بانک قاعده‌لری‌نینگ بوزیلیشی، ملَکه‌لی خادملر یېتیشمسلیگی، درآمدلر‌نینگ اساسا خدمت حقلری و کمیسیونلرگه باغلیقلیگی همده نقدلیک انقراضیگه قرشی کوره‌شیش بۉییچه عملی تیّارگرلیک موجودلیگی اثباتلنمه‌گنی اوشبو بانک‌نینگ اساسی معمالری قطاریگه کیره‌دی.
کابل بانکی بو حالتگه قچاندن باشلب توشیب قالدی؟
حساباتلرگه کۉره، کابل بانکی ۲۰۱۰-ییلده ییریک مالیوی فساد ایشی فاش اېتیلگنی، اولوشدارلر و بانک رهبریتیگه علاقه‌دار شخصلرگه ناقانونی کریدیتلر بېریلگنی آرتیدن جدّی مالیوی انقراضگه اوچره‌گن. ناقانونی کریدیتلر و نفوذلی شخصلر بیلن باغلیق عملیاتلر نتیجه‌سیده بانک‌نینگ یوزلب میلیون دالرلیک سرمایه‌لری یۉقاتیلگن اېدی. اۉشه پیتده اوشبو انقراض افغانستان‌نینگ بانک تیزیمیگه هم جدّی تأثیر کۉرسه‌تگن.
امریکا‌نینگ افغانستاننی قَیته تیکلش بۉییچه مخصوص باش تیکشیرووچیسی (سیگار) تامانیدن ۲۰۱۹-ییل نوامبر آییده اعلان قیلینگن SIGAR ۲۰-۰۶-AR رقملی حساباتده افغانستان حکومتی کابل بانکیده‌گی اۉزلشتیریش ایشی بۉییچه ناقانونی اۉزلشتیریلگن جمعی ۹۸۷ میلیون دالر‌نینگ قریب ۴۰ فایزینی قَیتریب آلگنی کۉرسه‌تیلگن. حسابات اعلان قیلینگن پیتده اوشبو مبلغ‌نینگ قریب ۶۰ فایزی هلی قَیتریلمه‌گن اېدی.
خلق‌ارا پول جمغرمه‌سی حساباتلریگه کۉره، افغانستان مرکزی بانکی ۲۰۱۱-ییلده سابق کابل بانکی‌نینگ فعالیت رخصت‌نامه‌سینی بېکار قیلگن و اونینگ نامینی «نوی کابل بانک» دېب اۉزگرتیرگن. ینگی کابل بانکی ۲۰۱۱-ییل ۲۱-اپرېلده اۉز فعالیتینی باشله‌گن و اونینگ اېگه‌لیگی اۉشه پیتده‌گی افغانستان حکومتیگه اۉتکزیلگن.
عامه‌وی اخبارات واسطه‌لری خبرلریگه کۉره، حامد کرزی جمهور رییسلیک دوریده کابل بانکی ایشی مخصوص محکمه‌گه یوباریلگن و ۲۰۱۳-ییلده محکمه حکمی چیقریلگن. بیراق ایشنی کۉریب چیقیش جریانی، اونگه علاقه‌دار شخصلرگه تعیینلنگن جزالر‌نینگ درجه‌سی و اۉزلشتیریلگن سرمایه‌لرنی قَیتریش ترتیبی تنقیدلر همده سواللرنی کېلتیریب چیقرگن. بو سواللرگه حاضرگچه انیق جواب بېریلمه‌گن.
سابق حکومت مالیه وزیرلیگی کابل بانکی تقدیری بۉییچه اۉشه پیتده‌گی جمهورلیک ریاست سرایی‌نینگ اېنگ مهم قرارلریدن بیری نوی کابل بانکینی افغان ملی بانکی بیلن بیرلشتیریش رېجه‌سی بۉلگنینی معلوم قیلگن اېدی. سابق حکومت مالیه وزیرلیگی حساباتیگه کۉره، ۲۰۲۰-ییلده اشرف غنی رئیسلیگیده‌گی عالی اقتصادی کېنگش نوی کابل بانکی و افغان ملی بانکینی بیرلشتیریشگه راضیلیک بېرگن. اۉشه پیتده‌گی مالیه وزیرلیگی اوشبو قرار‌نینگ مقصدی دولت بانکلری ثمره‌دارلیگینی آشیریش و خدمتلر صفتینی یخشیلش اېکنینی بیلدیرگن.
سابق حکومت مالیه وزیرلیگی ۲۰۲۰-ییل ۵-سپتمبرده اوشبو وزیرلیک‌نینگ اۉشه پیتده‌گی وظیفه‌سینی بجرووچی رهبری عبدالهادی ارغندیوال رئیسلیگیده نوی کابل بانکی و افغان ملی بانکینی بیرلشتیریش مسأله‌سیگه بغیشلنگن ییغیلیش اۉتکزیلگنینی معلوم قیلگن اېدی. حساباتگه کۉره، ییغیلیشده مرکزی بانک، مالیه وزیرلیگی و هر ایکّی بانک رهبرلری اشتراک اېتیب، اۉز قره‌شلرینی بیلدیرگنلر. یکونده مالیه وزیرلیگیگه بیلدیریلگن فکرلرنی اۉشه پیتده‌گی جمهور باشلیغگه تقدیم اېتیش وظیفه‌سی یوکله‌تیلگن.
شونینگدېک، اۉشه پیتده‌گی مالیه وزیرلیگی ۲۰۱۴-ییلده عالی اقتصادی کېنگش قراریگه موافق کابل بانکی، پشتنی بانکی و افغان ملی بانکی اۉزارا بیرلشتیریلیشینی معلوم قیلگن اېدی.
افغان ملی بانکی قنده‌ی بانک؟
اوشبو بانک اۉزی‌نینگ رسمی وېب-سایتیده ۱۳۱۲-ییل ۹-ثورده تشکیل اېتیلگنینی و افغانستانده بانک تیزیمینی جاری قیلگن بیرینچی بانک بۉلگنینی یازگن. شونینگدېک، بانک ۱۳۱۸-ییلده افغانستان مرکزی بانکی تشکیل اېتیلگونگه قدَر اونینگ وظیفه‌لرینی هم بجرگنینی همده افغانستان و خلق‌ارا مقیاسده ۹۰ ییلدن آرتیق تاریخگه و آبروگه اېگه اېکنینی بیلدیرگن.
بانک اۉز فعالیتینی ۹،۶ میلیون افغانی باشلنغیچ سرمایه بیلن یۉلگه قۉیگنینی یازگن. اوشبو مبلغ‌نینگ ۷۲ فایزی خصوصی سکتورگه، قالگن ۲۸ فایزی اېسه دولت سکتوریگه تېگیشلی بۉلگن. بانک وېب-سایتیده‌گی معلوماتلرگه کۉره، افغان ملی بانکی ۱۳۵۵-ییلده اۉشه پیتده‌گی حکومت تامانیدن تۉلیق مالیه‌لشتیریلگن. اونینگ مقصدی سودا، صناعت و اېکینچیلیک کبی مهم ساحه‌لرنی رواجلنتیریشگه قره‌تیلگن بانک فعالیتینی آلیب باریشدن عبارت بۉلگن.
حاضرده افغان ملی بانکی‌نینگ کابلده‌گی مرکزی اداره‌سی بیلن بیرگه ۱۷ ته وکالت‌خانه‌سی همده مملکت ولایتلریده ۲۴ ته وکالت‌خانه‌سی موجود. شونینگدېک، بانک ۳۰ ته تۉلاو اسکونه‌لرگه اېگه.
