امیدسبز شهرچه‌سی؛ طالبان تامانیدن اویلر‌نینگ تیکشیریلیشی و عایله‌لر‌نینگ ملک حقوقیدن محروم اېتیلیشیدن خواطری
۸صبح
کابل‌نینگ غربیده جایلشگن امیدسبز شهرچه‌سی‌نینگ بیر قطار اهالیسی طالبان‌نینگ عدلیه وزیرلیگی هیاتلری تامانیدن اویلرنی تېکشیریش دوام اېته‌یاتگنی و اوشبو گروه باسیمی‌نینگ کوچه‌ییب باره‌یاتگنیدن خواطر بیلدیرماقده. اولر‌نینگ اَیتیشیچه، طالبان‌نینگ تورلی هیاتلری منتظم روشده اهالی اویلریگه تشریف بویورماقده و بو تشریفلر کۉپینچه عایله‌ده‌گی اېرککلر اویده بۉلمه‌گن وقتلرده عملگه آشیریلماقده. محلی اهالی‌نینگ تأکیدلشیچه، بونده‌ی شرایطده قوراللنگن شخصلر‌نینگ اویلریگه کیریشی عیاللر و باله‌لر‌نینگ بېزاوته قیلینیشیگه سبب بۉلگن همده اولر آره‌سیده کوچلی خواطر و خوفسیزلیک حسسی‌نینگ یۉقالیشیگه آلیب کېلگن.
امید سبز شهرچه‌سی اهالیسی اوشبو وضعیت‌نینگ دوام اېتیشی آدملر‌نینگ عادتی حیاتینی ایزدن چیقره‌یاتگنینی، اولر کېچه و کوندوز اویلریدن اَیریلیب قالیش خواطری و تشویش بیلن یشه‌یاتگنینی تأکیدله‌ماقده. اولر‌نینگ قۉشیمچه قیلیشیچه، سۉنگگی اوچ هفته دوامیده اۉز طلبلرینی طالبان منصبدارلریگه یېتکزیش اوچون اوشبو گروهگه علاقه‌دار اۉنلب اداره‌لرگه مراجعت قیلیشگن، بیراق اولر‌نینگ هېچ بیری اهالی طلبلرینی تینگلشگه راضی بۉلمه‌گن.
امید سبز شهرچه‌سی اهالیسیدن بیری محمد (مستعار)نینگ اَیتیشیچه، ایکّی کون اوّل او ایش جاییده بۉلگن پیتده طالبان‌نینگ قوراللنگن شخصلری اونینگ اوییگه زۉرلیک بیلن کیریب، تورموش اۉرتاغی، آنه‌سی و فرزندلریگه نسبتاً حقارتلی مناسبتده بۉلیشگن.
امید سبز شهرچه‌سی اهالیسی وکیلی محمد شونده‌ی دېیدی: «مېن و عایله‌م‌نینگ بار-یۉغی مشقت بیلن ساتیب آلگن شو بیرته خاندانیمیز. ایکّی کون اوّل، مېن ایشده بۉلگنیمده، بیر نېچه قوراللنگن شخص و طالبان‌نینگ باشقه آدملری زۉرلیک و قۉپاللیک بیلن اوییمگه باستیریب کیریشدی. تورموش اۉرتاغیم، آنه‌م و فرزندلریمنی حقارتلب، کمسیتیشدی و خاتینیمدن برماق ایزی آلیشدی. اونگه بوندن بویان اۉز اوییده یشش اوچون اجاره حقی تۉله‌شی کېره‌کلیگینی اَیتیشدی».
محمد شونده‌ی دېیدی: «عایله‌م جوده دهشتلی وضعیتنی باشدن کېچیردی. تورموش اۉرتاغیم و ایکّی نفر کیچیک قیزیم‌نینگ احوالی جوده یامان. اولر هر لحظه‌ده دهشتلی توشلر کۉریشماقده».
شهرچه‌‌نینگ ینه بیر اهالیسی طالبان وکیللری‌نینگ آدملر اویلری و شخصی ملکلریگه کیریشینی شخصی حیات دخلسیزلیگی‌نینگ آچیقدن-آچیق بوزیلیشی دېب حسابله‌یدی و بو حرکت قانونلر، عرف-عادتلر همده خلق مدنیتیگه ضد اېکنینی اَیته‌دی.
امید سبز شهرچه‌سی اهالیسیدن بیری شونده‌ی دېیدی: «بو یېرده نېچه ته حاکمیت بارلیگینی توشونمه‌یمیز. مېنیمچه، طالبان‌نینگ هر بیر اعضاسی اۉزیچه علیحده حکومت. اگر بونده‌ی بۉلمسه، اونده نېگه بیر وزیرلیک اۉزیگه آدملر‌نینگ اویلرینی تېکشیریش حقوقینی بېره‌دی؟ بیز اۉغریلیک قیلدیکمی یاکه جنایتچیمیزمی؟ محکمه بیز‌نینگ اویلریمیزنی تېکشیریش و تینتوو قیلیش حقیده قرار چیقرگنمی؟ ایشا‌نینگ، بیزنی جوده قتّیق تحقیرلشماقده. طالبان وکیللری شخصی حیاتیمیز دخلسیزلیگیگه تجاوز قیلماقده، حتا یاتاقخانه‌میزنی هم رۉیخطگه آلیب، اونده نېچه ته الماری و باشقه بویوملر بارلیگینی قید اېتیشگن».
شو بیلن بیرگه، شهرچه اهالیسی‌نینگ بیر قِسمی وکیللری سۉنگگی اوچ هفته دوامیده طالبان‌نینگ یوقاری مرتبه‌لی منصبدارلری بیلن اوچره‌شیب، معمالرینی اولرگه یېتکزیشگه بیر نېچه بار اورینگنینی، بیراق حاضرگچه بونگه اېریشه آلمه‌گنینی اَیتماقده.
امید سبز شهرچه‌سی کابل‌نینگ غربیده جایلشگن بۉلیب، اونینگ اهالیسی‌نینگ اکثریتینی افغانستان هزاره‌لری و شیعه‌لری تشکیل اېته‌دی. معلوماتلرگه کۉره، حاضرده اوشبو شهرچه‌ده ۱۱ مینگدن آرتیق عایله یشه‌یدی.
طالبان اوّلراق هر بیر تورر جای خانه‌سی اوچون آییگه ۴ مینگ افغانی اجاره حقی بېلگیله‌گن و اوی اېگه‌لری همده اجاره‌چیلردن سۉنگگی آلتی آیلیک اجاره حقینی اوشبو گروهگه تۉله‌شنی طلب قیلگن. اهالی‌نینگ اَیتیشیچه، اوشبو سوممنی تۉله‌شدن باش تارتگنلر اویلرینی بۉشه‌تیشگه مجبور قیلینه‌دی.
شونینگدېک، اوشبو گروه اویلرنی بۉشه‌تیش حقیدگی بویروققه قرشی چیققن اهالی وکیللری‌نینگ بیر قِسمینی حبسگه آلگن. منبعلرگه کۉره، حبسگه آلینگنلر‌نینگ اَیریملری طالبان عدلیه وزیرلیگی بناسی ایچیده‌گی «تاش خانه» دېب اتله‌دیگن جایده سقلنماقده. اولردن بېلگیلنگن اجاره حقینی تۉله‌ش یاکه اویلرینی بۉشه‌تیش مجبوریتینی آلیش طلب قیلینماقده.
