فایو: تخم استعمالی بالهلرده اۉتکیر تۉییب-آوقتلنمسلیک خوفینی کمهیتیرهدی
۸صبح، کابل: بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (فایو) تدقیقاتی تخم استعمال قیلهدیگن بالهلرده اۉتکیر تۉییب-آوقتلنمسلیک خوفی اوچ برابر کملیگینی کۉرسهتماقده.
اوشبو تشکیلات سهشنبه، ۲۴-سنبله کونی اۉزینینگ ایکس صحیفهسیده اوی شرایطیده تاووق باقیش عایلهلرنینگ تۉییملی آزیق-آوقتگه اېگه بۉلیش امکانیتینی آشیریشی ممکنلیگینی معلوم قیلدی.
فایو معلوماتلریگه کۉره، افغانستانده بېش یاشگچه بۉلگن قریب ۳،۷ میلیون باله اۉتکیر تۉییب-آوقتلنمسلیک معماسیگه دوچ کېلماقده و کۉپلب عایلهلرنینگ تورلی خیل آزیق-آوقت محصولاتلریدن عبارت آوقت ترتیبینی تامینلش امکانیتی یۉق.
فایو قۉشیمچه قیلیشیچه، ایشگه چیقیش امکانیتی چېکلنگن کۉپلب افغان عیاللری اوچون اوی شرایطیده تاووق باقیش عایلهنی آزیق-آوقت بیلن تامینلش و درآمد تاپیش منبعی بۉلیشی ممکن.
تشکیلات یاردمی عملگه آشیریلهیاتگن اوی شرایطیده تاووق باقیش فعالیتی دایرهسیده تاووقلر، یېم-خشک و ضرور جهازلر ترقهتیش، شونینگدېک، پرندهچیلیکنی باشقریش، تازهلیک و کسللیکلرنینگ آلدینی آلیش بۉییچه تعلیم بېریش ایشلری آلیب باریلماقده.
اوشبو دستورنینگ مقصدی آزیق-آوقت ایشلب چیقریش و عایلهلرنینگ تیریکچیلیک منبعلرینی مستحکملش همده اولرنینگ ساغلام تاووقلرنی پرورش قیلیش بۉییچه بیلیملرینی آشیریشدن عبارت.
