یونیسف: مهاجرلرنینگ کېنگ کۉلمده قَیتیشی افغانستاندهگی اساسی خدمتلرگه کتّه باسیم اۉتکزماقده
۸صبح، کابل: بیرلشگن ملتلر تشکیلاتینینگ بالهلرنی قۉللب-قوّتلش جمغرمهسی (یونیسف) افغانلرنینگ پاکستان و ایراندن کېنگ کۉلمده قَیتیشی افغانستاندهگی چېگره مرکزلری، مېزبان جماعهلر و اساسی خدمتلرگه باسیمنی ینهده آشیرگنینی اَیتماقده.
اوشبو تشکیلات دوشنبه کونی، ۲۳ سنبله، ۲۰۲۳-ییلدن بویان ۶،۴ میلیوندن آرتیق افغان پاکستان و ایراندن افغانستانگه قَیتگنینی معلوم قیلدی.
حساباتگه کۉره، فقط ۲۰۲۶-ییلده جولای آیی آخریگچه قریب ۱،۸ میلیون افغان مملکتگه قَیتگن. اولرنینگ ۶۵۲ مینگدن آرتیغی پاکستاندن، قریب ۴۲۵ مینگ نفری اېسه ایراندن بۉلگن.
یونیسفنینگ اَیتیشیچه، اوشبو کیشیلرنینگ ۴۱۳ مینگدن آرتیغی دېپورت قیلینگن و قَیتیب کېلگنلرنینگ یریمیدن کۉپراغینی عیاللر و بالهلر تشکیل اېتهدی.
اوشبو تشکیلات کۉپلب قَیتیب کېلگنلرنینگ اۉزلرینینگ اصل یشهش جایلری بیلن علاقهسی کم اېکنیدن آگاهلنتیریب، اولر قشّاقلیک و ینه باشپناهسیزلیککه دوچ کېلیشی ممکنلیگینی بیلدیرگن.
فقط جولای آیینینگ اۉزیده تورخم، میلک، اسپینبولدک و بهرامچه تۉرت ته چېگرهدن ۱۲۰ مینگدن آرتیق کیشی افغانستانگه کیریب کېلگن.
یونیسفنینگ اَیتیشیچه، افغانستانده آزیق-آوقت خوفسیزلیگی و تۉییب-آوقتلنمسلیک حالتی همان تشویشلی بۉلیب، تخمیناً ۱۷،۴ میلیون کیشی شاشیلینچ آزیق-آوقت یاردمیگه محتاج.
اوشبو تشکیلات معلوماتیگه کۉره، ۲۰۲۶-ییلده قریب ۴،۹ میلیون عیال و باله تۉییب-آوقتلنمسلیک بۉییچه دوالنیشگه محتاج بۉلهدی. اولرنینگ تخمیناً ۳،۷ میلیون نفری بېش یاشگچه بۉلگن بالهلردیر.
