یونیسف: افغانستانده آلتی میلیوندن آرتیق کیشی ضرور ساغلیق خدمتلردن فایدهلندی
۸صبح، کابل: بیرلشگن ملتلر تشکیلاتینینگ بالهلرنی قۉللب-قوّتلش جمغرمهسی (یونیسف) ۲۰۲۶-ییل جولای آییده افغانستان بۉیلب آلتی میلیوندن آرتیق کیشیگه، جملهدن عیاللر و بالهلرگه ضرور ساغلیق خدمتلر کۉرسهتیلگنینی معلوم قیلدی.
اوشبو تشکیلات دوشنبه کونی، ۲۳ سنبله، ترقهتگن حساباتیده اوشبو خدمتلر سوو تاشقینلری، زلزلهلر، کسللیکلر ترقهلیشی و مجبوری قَیتیشلردن ضرر کۉرگن حدودلرده هم کۉرسهتیلگنینی بیلدیرگن.
یونیسفنینگ اَیتیشیچه، افغانستان ۲۰۲۶-ییل جولای آییده تکراری طبیعی آفتلر، مهاجرلرنینگ کېنگ کۉلمده قَیتیشی، آزیق-آوقت خوفسیزلیگینینگ کېسکین یامانلشووی، تۉییب-آوقتلنمسلیک، کسللیکلر ترقهلیشی، اقتصادی باسیم و اساسی خدمتلردن فایدهلنیش امکانیتلرینینگ چېکلنیشیگه دوچ کېلگن.
یونیسف حساب-کتابلریگه کۉره، ۲۰۲۶-ییلده افغانستانده تخمیناً ۲۱،۹ میلیون کیشی، جملهدن ۱۱،۶ میلیون باله انسانپرورلیک یاردمگه محتاج بۉلهدی.
اوشبو تشکیلات عیاللر و قیزلر تعلیم، ایش، جماعت حیاتی و اساسی خدمتلردن فایدهلنیش امکانیتلریگه تاثیر قیلهیاتگن چېکلاولر سببلی همان علیحده ضعیف حالتده قالهیاتگنینی قۉشیمچه قیلگن.
یونیسف تاکیدلشیچه، ساغلیق خدمتلر کۉرسهتیش همده بالهلر و ضعیف عایلهلرنی، اینیقسه طبیعی آفتلر و مهاجرلرنینگ قَیتیشیدن ضرر کۉرگن حدودلرده، قۉللب-قوّتلش افغانستاندهگی مهم انسانپرورلیک احتیاجلردن بیری بۉلیب قالماقده.
