مجبوری قیتریش؛ اۉتگن کون ایکّی مینگ‌دن آرتیق کیشی افغانستانگه قیتریلدی
۸صبح، کابل: طالبان اعلان قیلیشیچه، اۉتگن کون ۴۳۹ عایله، جمعی ایکّی مینگ ۷۱ نفر مهاجر افغانستانگه قَیتریلگن.
طالبان سۉزلاوچیسی‌نینگ اۉرین‌باسری حمدالله فطرت، شنبه کونی، ۷ سنبله، بیانات ترقه‌تیب، تورخم چېگره‌سی آرقه‌لی ۳۶۷ عایله، جمعی بیر مینگ ۸۰۵ نفر کیشی افغانستانگه قَیتگنینی اَیتگن.
بیاناتگه کۉره، ۱۳ عایله سپین‌بولدک آرقه‌لی، ۴۲ عایله نیمروز چېگره‌سی یۉلی آرقه‌لی و ۱۷ عایله اسلام‌قلعه چېگره‌سی آرقه‌لی افغانستانگه کیرگن.
بو قَیتیشلر افغان مهاجرلرینی پاکستان و ایراندن چیقریب یوباریش همده مجبوری قَیتریش جریانی هنوز دوام اېته‌یاتگن بیر پیتده عملگه آشیریلماقده.
شو بیلن بیرگه، یقینده بیرلشگن ملتلر تشکیلاتی افغانستانده باش‌پناه احتیاجلرینی تأمینلش و قَیتیب کېلووچیلرگه یاردم کۉرسه‌تیش اوچون مبلغ‌نینگ کېسکین یېتیشمه‌یاتگنیدن خبر بېرگن.
