طالبان‌نینگ مفکوروی تازه‌لش سیاستی؛ سابق حکومت سارنواللری قنده‌ی لوازمدن چېتلشتیریلماقده؟
نیما
طالبان نظارتی آستیده‌گی فرمان و قرارلرنی نظارت قیلیش همده تعقیب اېتیش باشقرمه‌سیده ایشله‌یاتگن سابق حکومت‌نینگ اَیریم سارنواللری اَیتیشیچه، طالبان اوشبو گروه رهبری هبت‌الله‌نینگ آغزه‌کی بویروغی اساسیده اولرنی لوازملریدن چېتله‌تیش و اۉرنیگه طالبان جنگریلرینی تعیینلش جریانینی جدللشتیرگن. ۸صبح نشری هم آلتی ولایتده ۱۱ نفر سابق سارنوال هېچ قنده‌ی سبب کۉرسه‌تیلمسدن لوازمیدن آزاد اېتیلگنینی تصدیقلاوچی خطنی قۉلگه کیریتگن. منبعلر‌نینگ اَیتیشیچه، طالبان‌نینگ اَیریم ولایت حاکملری و استخبارات عملدارلری هبت‌الله‌گه شکایت قیلیب، اوشبو سارنواللر گروه منصبدارلرینی فساد‌گه علاقه‌دارلیکده عیبلب، اولرگه قرشی ایشلر تۉقیب چیقره‌یاتگنینی دعوا قیلگن.
طالبان‌نینگ فرمان و قرارلرنی نظارت قیلیش همده تعقیب اېتیش باشقرمه‌سیده ایشله‌گن سابق حکومت سارنواللری اوشبو گروه تامانیدن لوازملریدن چېتله‌تیله‌یاتگنیدن خواطر بیلدیرماقده. عینی پیتده ۸صبح نشری قۉلیگه کېلیب توشگن حجت دایکندی، بامیان، ننگرهار، کاپیسا، نورستان و میدان‌وردک ولایتلریده‌گی ۱۱ نفر سارنوال لوازمیدن آزاد اېتیلگنینی کۉرسه‌ته‌دی. منبعلر‌نینگ اَیتیشیچه، اوشبو باشقرمه‌ده سابق حکومتدن قالگن سارنواللر و باشقه خادملرنی لوازملریدن چېتله‌تیش جریانی هنوز دوام اېتماقده.
طالبان توزومی دوریده هم ایشله‌گن سابق سارنواللردن بیری شونده‌ی دېیدی: «طالبان‌نینگ فرمان و قرارلرنی نظارت قیلیش همده تعقیب اېتیش باش باشقرمه‌سی مالیه و اداری ایشلر بۉییچه اۉرین‌باسری رهبرلیگیده خادملر‌نینگ ترجمه حالی و ایش تجربه‌سینی تېکشیره‌دیگن، سابق خادملر اۉرنیگه ینگی شخصلرنی [طالبان جنگریلرینی] تعیینله‌یدیگن کمیته توزیلگن. اوشبو کمیته هر هفته ۴۰–۵۰ نفر سابق خادمنی ناانیق احوالده قالدیرماقده».
اونینگ اَیتیشیچه، طالبان نظارتی آستیده‌گی اوشبو اداره‌ده ایشله‌گن اَیریم سابق سارنواللر گروه رهبری هبت‌الله‌نینگ آغزه‌کی بویروغی اساسیده لوازملریدن چېتله‌تیلگن. اونینگ دعوا قیلیشیچه، هبت‌الله طالبان‌نینگ فرمان و قرارلرنی نظارت قیلیش همده تعقیب اېتیش باشقرمه‌سی ترکیبیده ایشله‌یاتگن سابق حکومت‌نینگ برچه اداری و تخصصی خادملرینی لوازملریدن آزاد اېتیش همده اولرنی باشقه هېچ بیر اداره‌ده ایشگه قبول قیلمسلیک حقیده بویروق بېرگن.
سابق سارنوال قۉشیمچه قیله‌دی: «بونده‌ی قرار قبول قیلینیشیگه سبب شوکی، طالبان‌نینگ باش استخبارات باشلیغی و اوشبو گروه‌نینگ عالی قاضیسی قندهارده هبت‌الله حضوریگه باریب، اونگه سابق حکومت باش سارنواللیگی خادملری طالبان اعضالریگه نسبتاً عداوت و کېک سقله‌گن حالده مناسبتده بۉله‌یاتگنی همده مجاهدلرگه قرشی ایشلر تۉقیب چیقره‌یاتگنینی اَیتیشگن».
سابق حکومت‌نینگ ینه بیر سارنوالی شونده‌ی دېیدی: «طالبان‌نینگ مالیه و اداری ایشلر بۉییچه اۉرین‌باسری شاه‌محمد شاهد رهبرلیگیده کمیته توزیلگن. فقرالیک ایشلری بۉییچه اۉرین‌باسر عزت‌الله حقانی، حربی ایشلر بۉییچه اۉرین‌باسر و خادملر ایشلری باشلیغی هم اوشبو کمیته اعضالریدیر».
طالبان رهبری‌نینگ بویروغی بیلن لوازمیدن چېتله‌تیلگن ینه بیر سارنوالنینگ اَیتیشیچه، طالبان‌نینگ حاضرگی کابل حاکمی و اوّل دایکندی ولایتیده حاکم بۉلگن امین‌الله عبید قیزیل یریم آی تشکیلاتی‌نینگ اون، یاغ، چادر و کۉرپه-تۉشکلردن عبارت ۸۱ لک افغانیلیک یاردم مبلغلرینی اۉزلشتیرگن. سارنوالنینگ سۉزلریگه کۉره، سارنواللر اوشبو ایش بۉییچه حجتلرنی تیّارلب، مرکزگه یوبارگن اېدی.
اوشبو سابق سارنوال قۉشیمچه قیلیشیچه، طالبان حاکملری، جمله‌دن، امین الله عبید قندهارده هبت‌الله بیلن بۉلیب اۉتگن اوچره‌شووده سابق حکومت سارنواللری اوستیدن شکایت قیلیب، اولر گروه اعضالریگه قرشی ایشلر تۉقیب چیقره‌یاتگنینی دعوا قیلیشگن. اونینگ اَیتیشیچه، اوشبو شکایتلردن سۉنگ هبت‌الله سابق حکومت سارنواللرینی لوازملریدن چېتله‌تیش حقیده آغزه‌کی بویروق بېرگن. او شمس‌الدین شریعتی‌نینگ طالبان‌نینگ فرمان و قرارلرنی نظارت قیلیش همده تعقیب اېتیش باشقرمه‌سی رهبرلیگیدن چېتله‌تیلیب، اوشبو گروه‌نینگ ارزگان ولایتیگه حاکم اېتیب تعیینلنیشی هم شو دایره‌ده عملگه آشیریلگنینی اَیته‌دی.
۸صبح نشری‌نینگ بیر حساباتیده کېلتیریلگن معلوماتلر هم امین‌الله عبید دایکندی اهالیسی اوچون اجره‌تیلگن کمیده ۵۰ تُن بوغدای و ۲۰ ته یوک مو‌تریگه آرتیلگن انسانپرورلیک یاردمنی کابل، غور، میدان ورد‌ک، فراه و ارزگان ولایتلریده‌گی دۉستلری همده یقینلریگه اجره‌تیب بېرگنینی کۉرسه‌ته‌دی.
عینی پیتده، سابق حکومت سارنواللریدن بیری‌نینگ لوازمیدن چېتله‌تیلگن عایله اعضاسی اوچون خواطر آله‌یاتگن قرینداشی طالبان اوشبو خادملر اۉرنیگه اۉزیگه علاقه‌دار شخصلرنی ایشگه قبول قیله‌یاتگنینی اَیته‌دی.
او جبرلنگن عایله‌لر‌نینگ تورموش شرایطیدن خواطر بیلدیریب، شونده‌ی دېیدی: «قه‌یېرگه باره‌یلیک، کیم‌نینگ اېشیگینی قاقه‌یلیک؟ بیر آغیز نان تاپیش اوچون ینه قنچه عذاب چېکه‌یلیک؟ بو قدَر مظلوم، بې‌گناه و ناچار انسانلر‌نینگ آوازینی اېشیته‌دیگن هېچ کیم یۉق. بو لعنتی گروه حاکمیتنی اېگه‌لله‌گن کوندن بېری بې‌چاره خلق اوستیدن ظلم و زۉرآورلیک قیلیشدن باشقه ایش قیلمه‌یپتی».
باشقه تاماندن، طالبان‌نینگ فرمان و قرارلرنی نظارت قیلیش همده تعقیب اېتیش باشقرمه‌سیگه ایشگه قبول قیلیش امتحانیدن موفقیتلی اۉتگن اَیریم شخصلر‌نینگ اَیتیشیچه، اولر‌نینگ ایش تجربه‌سی تېکشیریلیب، اوّلگی حکومت دوریده اوشبو اداره‌ده ایشله‌گنی انیقلنگنیدن سۉنگ، امتحاندن موفقیتلی اۉتگن بۉلیشلریگه قره‌مه‌ی، اولر موفقیتسیز دېب اعلان قیلینگن. اولر‌نینگ اَیتیشیچه، بو شخصلرگه هبت‌الله سابق حکومت سارنواللری هېچ قنده‌ی شرایطده اوشبو اداره‌گه ایشگه آلینمسلیگی حقیده بویروق بېرگنی اَیتیلگن.
اوشبو شخصلر قۉشیمچه قیلیشیچه، باشقرمه‌‌نینگ اَیریم خادملری اولرگه طالبان‌نینگ قراری سابق حکومتدن قالگن باشقه خادملرنی هم استه-سېکین گروه اعضالری بیلن المشتیریشدن عبارت اېکنینی اَیتگن. اولر‌نینگ تأکیدلشیچه، طالبان سابق حکومتدن قالگن خادملرنی لوازملریدن چېتله‌تیش و اولر‌نینگ اۉرنیگه اوشبو گروهگه علاقه‌دار شخصلرنی تعیینلش جریانینی باسقیچمه-باسقیچ دوام اېتتیرماقده.
اوّلراق، طالبان بیلن یقین علاقه‌لرگه اېگه بۉلگن اوشبو گروه نظارتی آستیده‌گی اداره‌لردن بیریده‌گی منبعلر هم طالبان سابق حکومت‌نینگ برچه خادملرینی، جمله‌دن، بیلیم یورتی اۉقیتووچیلرینی باسقیچمه-باسقیچ لوازملریدن چېتله‌تیب، اولر‌نینگ اۉرنیگه گروه اعضالری، اونگه علاقه‌دار و یقین شخصلرنی ایشگه قبول قیله‌یاتگنینی تصدیقله‌گن اېدی.
طالبان رهبری هبت‌الله باش سارنوالنینگ ماهیتینی سود-حقوق اداره‌سیدن نظارت ارگانیگه اۉزگرتیرگن. اېندیلیکده اونینگ وظیفه‌سی هبت‌الله فرمانلری‌نینگ بجریلیشینی نظارت قیلیش بیلن چېکلنگن. سابق باش سارنواللیک حاضر «فرمان و قرارلرنی نظارت قیلیش همده تعقیب اېتیش باش باشقرمه‌سی» نامی آستیده فعالیت یوریته‌دی و هبت‌الله فرمانلریگه رعایه اېتیلیشی همده اولر‌نینگ اجراسینی نظارت قیلیش اوچون مسؤول حسابلنه‌دی.
اوّلراق ۸صبح نشری قۉلیگه کېلیب توشگن خطلرگه کۉره، طالبان نظارتی آستیده‌گی اوشبو اداره گروه منصبدارلریدن طالبان رهبری فرمانلری‌نینگ قنده‌ی بجریله‌یاتگنی حقیده ایضاح طلب قیله‌دی. طالبان رهبری‌نینگ بویروغی اساسیده حبسگه آلیش تۉغریسیده قرار چیقریش، آزادلیکدن محروم اېتیش جایلرینی نظارت قیلیش، محبوسلرنی خارجی دولتلردن افغانستانگه کۉچیریش و عیبلنووچیلرنی قیتریش هم اوشبو اداره‌‌نینگ باشقه وظیفه‌لری صفتیده کۉرسه‌تیلگن. شونینگدېک، طالبان حجتلرینی تکلیف قیلیش، تیّارلش، اۉزگرتیریش و بېکار قیلیش هم اوشبو اداره‌‌نینگ اساسی وظیفه‌لریدن حسابلنه‌دی.
