آلمان جنایی اۉتمیشگه اېگه بۉلمه‌گن افغانلرنی دېپورت قیلیش جریانینی باشله‌یدی
۸صبح، کابل: آلمان عامه‌وی اخبارات واسطه‌لری آلمان حکومتی جنایی اۉتمیشگه اېگه بۉلمه‌گن افغانستان وطنداشلرینی هم دېپورت قیلیش جریانینی باشله‌گنینی خبر قیلدی.
آلمان‌نینگ تاتس گزېته‌سی، پنج‌شنبه کونی، ۱۸ سرطان، کمیده بېش نفر جنایی اۉتمیشگه اېگه بۉلمه‌گن افغانستان وطنداشی آلمانده‌گی دېپورت مرکزلریده سقلنه‌یاتگنینی معلوم قیلدی.
آلمان ۲۰۲۱-ییلده طالبان حاکمیتنی اېگه‌لله‌گنیدن سۉنگ افغانستان وطنداشلرینی دېپورت قیلیشنی بیر نېچه ییلگه تۉخته‌تگن اېدی، بیراق بو جریان ۲۰۲۴-ییل کوزیده ینه قَیته باشلنگن.
تاتس یازیشیچه، آلمان فدرا‌ل پولیسی سۉنگگی هفته‌لرده افغانستان وطنداشلریگه نسبتاً مناسبتینی اۉزگرتیرگن، اما مملکت ایچکی ایشلر وزیرلیگی بو دعوانی رد اېتگن.
آلمان ایچکی ایشلر وزیرلیگی جاری ییل دوامیده حاضرگچه ۷۷ نفر افغانستان وطنداشی چارتر اوچیش‌لری آرقه‌لی افغانستانگه دېپورتقیلینگنینی معلوم قیلدی.
طالبان ۲۰۲۱-ییل اگوست آییده حاکمیتنی اېگه‌لله‌گنیدن سۉنگ، انسان حقوقلری تشکیلاتلری بیر نېچه بار افغانستان مهاجرلرنی مجبوری قَیتریش اوچون خوفسیز مملکت اېمسلیگی حقیده آگاهلنتیریب کېلماقده.
اوشبو تشکیلاتلرگه کۉره، قَیتریلگن شخصلر نه‌فقط حبسگه آلینیشی، قییناققه سالینیشی و یامان معامله‌گه دوچ کېلیش خوفی آستیده، بلکه باش‌پناه یېتیشمسلیگی، مالیوی منبعلر‌نینگ کملیگی همده اساسی خدمتلردن چېکلنگن فایده‌لنیش کبی جدّی تورموش معمالریگه هم دوچ کېلماقده.
