«غور فریادنامه‌سی»؛ اهالی طالباننی زۉرآورلیک و یېرلرنی تارتیب آلیشده عیبله‌ماقده
۸صبح
غور ولایتی‌نینگ مرکزی فیروزکوه شهری اهالیسی آره‌سیده اَیریم کیشیلر طالبان‌نینگ اوشبو ولایتده‌گی محلی عملدارلرینی فساد، زۉرآورلیک و خلقدن تاولمچیلیک قیلیشده عیبله‌ماقده. اولر‌نینگ اَیتیشیچه، اهالی‌نینگ شکایتلرینی کۉریب چیقه‌دیگن هېچ قنده‌ی اداره موجود اېمس. اولر‌نینگ تأکیدلشیچه، غور اهالیسی سۉنگگی بېش ییل دوامیده حقوقلری‌نینگ پایمال اېتیلیشی، زۉرآورلیک و طالبان باسیملریدن بېزار بۉلگن، بیراق قۉرقوو سببلی هېچ کیم اۉز آوازینی کۉتره آلمه‌یدی.
فیروزکوه اهالیسی ۸صبح گزېته‌سیگه «فریادنامه» سرلوحه‌سی آستیده مکتوب یوباریب، طالبان مملکتنی اېگه‌للب آلگنیدن بویان «دولت ملکینی تالان-تاراج قیلیش» بیلن شغللنه‌یاتگنی، اونی «اۉلجه» دېب بیلیب، تلشگه کیریشگنینی تأکیدله‌گن.
فیروزکوه‌نینگ اَیریم اهالیسی طالبان‌نینگ غورده‌گی سابق والیسی احمدشاه دین‌دوست تامانیدن خلقدن ییغیلگن پوللرنی تیلگه آلیب، یۉل قوریش اوچون تۉپلنگن مبلغلر‌نینگ تقدیری نامعلوملیگینی و اولر اۉزلشتیریب یوباریلگن بۉلیشی ممکنلیگینی اَیتماقده.
مکتوبده قید اېتیلیشیچه، بو پوللر زۉرآورلیک و اهالی‌نینگ پاکیزه حس-تویغولریدن فایده‌لنیش آرقه‌لی ییغیلگن. حتا اَیریم آدملر یۉل قوریلیشیگه امید قیلیب، طالبانگه پول بېریش اوچون خاتینلری‌نینگ تقینچاقلرینی ساتگن.
مکتوب‌نینگ باشقه بیر قِسمیده طالبان تامانیدن عمومی عفو اعلان قیلینگنیگه قره‌مه‌ی، شو دور ایچیده اۉنلب سابق حربی خدمتچیلر همده اَیریم نفوذلی و سیاسی اربابلر طالبان تامانیدن اۉلدیریلگنی، اولر‌نینگ ایشلری هم هېچ قنده‌ی ترتیبده کۉریب چیقیلمه‌گنی اَیتیلگن.
مکتوبده طالبان‌نینگ فیروزکوه‌ده‌گی بلدیه‌سی دولت یېرلرینی ساتیش و اېگه‌للب آلیش مسکنیگه ایلنگنی، طالبان‌نینگ باشقه اَیریم اداره‌لری بیلن تیل بیریکتیریب، دولت یېرلرینی همده یشیل حدودلرنی اۉزلشتیریب آلگنی قید اېتیلگن.
مکتوبگه کۉره، طالبان اوّلگی اېشیتتیریشلر حدودینی بازار قوریش بهانه‌سی بیلن اهالیدن تارتیب آلگن، بیراق کېینچه‌لیک اونی اۉز اعضالری اۉرته‌سیده تقسیمله‌گن. حال‌بوکه، مذکور حدود سابق حکومت دوریده هم تقسیملنگن بۉلیب، اَیریم شخصلر‌نینگ قۉلیده «آویز» دېب اته‌لووچی حجتلر موجود. شونگه قره‌مه‌ی، طالبان بلدیه‌سی اهالی‌نینگ حجتلرینی حسابگه آلمه‌سدن، اوشبو حدودنی قیته‌دن تقسیمله‌گن.
فیرازکاه اهالیسی اَیتیشیچه، طالبان بلدیه‌سی یۉل حرکتی باشقرمه‌سی و قیزیل یریم آی تشکیلاتی اداره‌سی آرتیده‌گی حدودلرگه تېگیشلی آویز حجتلرینی تن آلمه‌یدی و بو یېرلرنی قیته‌دن تقسیمله‌ماقده. حال‌بوکه، اهالی قۉلیده سابق حکومت تامانیدن بېریلگن آویز حجتلری موجود. اهالی‌نینگ تأکیدلشیچه، طالبان بلدیه‌سی اولرگه اوشبو حدود شهر ایچیده‌گی یخشی جایلردن بیری اېکنینی و سابق حکومت اونی اهالیگه ارزان نرخده ساتگنینی اَیتگن. شو سببلی، اولردن ینه پول تۉله‌ش طلب قیلینماقده، عکس حالده بو حدودلر باشقه شخصلرگه بېریلیشی اَیتیلگن.
مکتوبده تأکیدلنیشیچه، طالبان‌نینگ اوشبو ولایتده‌گی یېرلرنی ناقانونی اېگه‌للب آلیش‌نینگ آلدینی آلیش کمیته‌سی شخصی منفعتلر بیلن شغللنه‌دی، للمی یېرلرگه تېگیشلی عرف-عادتلرگه اساسلنگن و قۉشنی چېگره‌لرنی تصدیقلاوچی حجتلرنی قبول قیلمه‌یدی همده یېر اېگه‌لریدن شرعی حجت طلب قیله‌دی. مکتوب مؤلفلری‌نینگ دعوا قیلیشیچه، اوشبو کمیته اعضالریگه پول بېرمه‌گن کیشیلر‌نینگ یېرلری «دولت یېری» دېب اعلان قیلینه‌دی.
فیروزکوه اهالیسی اۉز «فریادنامه»سیده طالبان بلدیه‌سی تامانیدن شهرده‌گی بازارلر‌نینگ ترتیبگه سالینیشی پاره تۉله‌ش اساسیده عملگه آشیریلیشینی یازگن. اولر‌نینگ اَیتیشیچه، پول تۉله‌گن شخصلر آزیق-طعام محصولاتلری ساتیله‌دیگن دوکانلرنی اۉزلری ایسته‌گن تامانگه کۉچیریشلری ممکن. اهالی هریرود دریاسی‌نینگ جَنوبیدن شهردن اوزاقراق جایگه کۉچیریلگن اولگورجی بازارنی تیلگه آلیب، بو قرار دوکاندارلر بیلن مصلحتلشمسدن قبول قیلینگنینی و خلق اوچون معمالر توغدیرگنینی اَیتماقده.
فیروزکوه اهالیسی «فریادنامه»سیده اۉتین ساتیله‌دیگن و خزینه بویوملری سوداسی بیلن شغللنووچی دوکانلر اوچون جای تنلش و تقسیملش وعده همده پول تۉله‌ش اساسیده عملگه آشیریلگنینی قید اېتگن. اولر‌نینگ دعواسیگه کۉره، لوازملر هم طالبان‌نینگ خواهشی و اقتصادی منفعتلریگه موافق ساتیله‌دی.
شو بیلن بیرگه، غور ولایتی‌نینگ اَیریم اهالیسی طالبان‌نینگ اوشبو ولایتده‌گی تعلیم باشقرمه‌سیده اۉقیتووچیلرنی ایشگه قبول قیلیش جریانیده‌گی فساد و سوءاستعماللیکلردن خواطر بیلدیرماقده. اولر‌نینگ اَیتیشیچه، بو جریانده شفّافلیک یۉق و بو باره‌ده هېچ کیم جوابگرلیکنی اۉز ذمّه‌سیگه آلمه‌یدی. اَیریم شخصلر امتحانده قتنه‌شمسدن توریب، ایشگه قبول قیلینگنلر رۉیخطیگه کیریتیلگن و اولر‌نینگ اسملری طالبان‌نینگ تعلیم وزیرلیگیگه یوباریلگن.
بوندن اوّل هم غور ولایتی اهالیسیدن بیری مکتوبیده طالبان‌نینگ اوشبو ولایتده‌گی سابق والیسی احمدشاه دین‌دوست یۉل و کیچیک کۉپریکلر قوریش بهانه‌سیده اهالیدن کتّه مقدارده پول ییغگنینی یازگن اېدی. اوشبو فقرا‌نینگ اَیتیشیچه، پوللر‌نینگ بیر قِسمی دین دۉست‌نینگ یقینلریدن بیری تامانیدن صرافلیک اداره‌سیدن آلیب، اونینگ قۉلیگه تاپشیریلگن. مکتوب مؤلفی حقیقتنی انیقلش و بو دعوالرنی رد اېتیش یاکه تصدیقلش اوچون حساب-کتابلر، پول ییغیشگه عاید حجتلر همده مبلغلر‌نینگ صرفلنیش تفصیلاتلری شفّاف طرزده اهالیگه تقدیم اېتیلیشی کېره‌کلیگینی تأکیدله‌گن.
