هزاره خلقی وکیللری افغانستانده قومی تعقیبلر، مجبوری کۉچیریش و یېرلرنی تارتیب آلیشنی قاره‌له‌دیلر
۸صبح، کابل: هزاره خلقی‌نینگ سیاسی حزبلری، وطنداشلیک و اجتماعی تشکیلاتلری وکیللری ییغیلیشده افغانستانده هزاره‌لرگه نسبتاً قومی و دینی تعقیبلر، مجبوری کۉچیریش، یېرلرنی تارتیب آلیش همده هزاره‌لر و شیعه‌لر‌نینگ حقوقلری بوزیلیشینی قاره‌له‌دیلر.
اوشبو تشکیلاتلر چهارشنبه کونی، ۶ عقرب، ییغیلیش حقیده بیانات اعلان قیلیب، هزاره‌لر‌نینگ حاضرگی احوالی بو خلققه نسبتاً اوزاق ییللردن بېری دوام اېتیب کېله‌یاتگن ظلم تاریخی‌نینگ بیر قِسمی اېکنینی بیلدیردیلر.
اولر هزاره‌لرگه نسبتاً تعقیبلرنی قاره‌لش افغانستاندهگی انسان حقوقلری بوزیلیشی‌نینگ باشقه حالتلرینی اعتبارسیز قالدیریش دېگنی اېمسلیگینی تأکیدله‌دیلر. عیاللر و قیزلرگه قۉییلگن چېکلاولر، وطنداشلیک و سیاسی فعاللر‌نینگ باستیریلیشی همده عامه‌وی اخبارات واسطه‌لری اېرکینلیگی‌نینگ چېکلنیشی هم اولرنی تشویشگه ساله‌یاتگن مسأله‌لر قطاریگه کیره‌دی.
هزاره وکیللری، شونینگدېک، کابل‌نینگ تۉقّیزینچی و اۉن-بېشینچی ناحیه‌لریده همده جلال‌آباد‌نینگ تۉرتینچی ناحیه‌سیده، اهالی‌نینگ مجبوری کۉچیریلیشی، یېرلر و ملکلر‌نینگ تارتیب آلینیشی یوزه‌سیدن خواطر بیلدیردیلر.
اولر طالبان رژیمینی قانونی دېب تن آلمسلیکلرینی بیلدیریب، حاکمیتنی کوچ و زۉرآورلیک آرقه‌لی قۉلگه کیریتیش اوشبو گروهگه خلق تامانیدن قانونیلیک بېرمسلیگینی اَیتدیلر.
اولر طالبانگه آگاهلنتیریش بېریب، هزاره‌لرگه نسبتاً کمسیتیش، مجبوری کۉچیریش، یېرلرنی تارتیب آلیش و حقوقلرنی بوزیش دوام اېتیشی جدّی سیاسی، اجتماعی و حقوقی عاقبتلرگه آلیب کېلیشی ممکنلیگینی تأکیدله‌دیلر. اولر‌نینگ اَیتیشیچه، بو عاقبتلر اوچون مسؤولیت طالبان ذمّه‌سیده بۉله‌دی.
