آدملر اۉلدیریلیشی و اۉغیرلنیشی کۉپهیشی؛ اهالی: نه جانیمیز، نه مالیمیز خوفسیز
Adrina Behzad
مملکت اَیریم اهالیسی خوفسیزلیکنینگ یامانلشگنیدن شکایت قیلماقده. اولرنینگ اَیتیشیچه، آلدین هم مملکتده خوفسیزلیک یخشی اېمس اېدی، بیراق سۉنگگی پیتلرده خوفسیزلیک بیلن باغلیق معمالر ینهده کۉپهیگن. بو اهالینینگ تأکیدلشیچه، خلق طالباننینگ ظلمی، قشّاقلیک و مملکتده صادر بۉلهیاتگن جنایتلردن بېزار بۉلگن. اولر طالبان عامهوی اخبارات واسطهلرینی چېکلش آرقهلی مملکتده صادر بۉلهیاتگن جنایتلردن هېچ کیم خبردار بۉلمهیدی، دېب اۉیلهیاتگنینی اَیتماقده. اهالینینگ سۉزلریگه کۉره، هر کونی یاشلرنینگ اۉلدیریلگنی حقیده خبرلر ترقهلماقده. بو اهالی مملکتده اۉغریلیکلرنینگ کۉپهیگنیدن هم شکایت قیلماقده.
شمس (مستعار)، مملکتدهگی خوفسیزلیک حالتینینگ کېنگ کۉلمده یامانلشگنیدن شکایت قیلهدی. اونینگ اَیتیشیچه، آلدین هم خوفسیزلیک یامان اېدی، بیراق سۉنگگی پیتلرده وضعیت بوتونلهی یامانلشگن و هر کونی قاتللیک و آدم اۉغیرلش حقیدهگی خبرلر اېشیتیلماقده.
مملکت بو وطنداش ی شوندهی دېیدی: «قۉرقوو سببلی، اېرتهلب ایشگه کېچیکیب قالیشیمگه قرهمهی، بری-بیر فرزندلریمنی مکتبگه آلیب بارهمن و ایشدن کېین اوزاق یۉلدن ایلنیب کېلیب، اولرنی اۉغیرلب کېتیشمسلیگی اوچون مکتبدن اویگه آلیب کېلهمن.» اونینگ اَیتیشیچه، اۉغریلیک هم کۉپهیگن.
شمس قۉشیمچه قیلهدی: «نه مال-ملکیمیز خوفسیز، نه جانیمیز خوفسیز، نه فرزندلریمیز. طالبان اېسه بوتون مملکت بۉیلب خوفسیزلیک تۉلیق تأمینلنگنینی اَیتهدی.»
کمال (مستعار) طالباننینگ خوفسیزلیک تأمینلنگنی حقیدهگی دعوالرینی شبهه آستیگه قۉیهدی. او شوندهی دېیدی: «اگر آوازینگنی بلند کۉترسنگ، طالبان تامانیدن عصیانچیلیکده عیبلنیب حبسگه آلینهدی؛ اما خلقنینگ جانیگه تېگدی طالباننینگ ظلمیدن، قشّاقلیکدن و دوام اېتهیاتگن جنایتلردن.»
او قۉشیمچه قیلهدی: «اجتماعی ترماقلرگه بیر کیریب کۉرینگ، او یېر قاتللیک، زۉرلش و اۉغریلیک حقیدهگی خبرلر بیلن تۉله. اجتماعی ترماقلردن کۉنگلیم قالگن. طالباننینگ برچه وکیللری، تینچ اهالی و حربی بۉلیشیدن قطعی نظر، قورالگه اېگه بۉلگنی سببلی، ارزیمس بیر تارتیشوو اوستیده هم اۉق اوزیشهدی. اۉزلرینینگ نامی یامان چیقمسلیگی اوچون اېسه اۉلدیریلگن آدمنی اۉغری یاکه قاچاقچی بۉلگن، دېب اَیتیشهدی.» اونینگ سۉزلریگه کۉره، مملکت باروت هیدیدن ذوق آلهدیگن جنگریلر قۉلیده بۉلگنی سببلی، بوندهی مسألهلر اولر اوچون عادتی حالگه ایلنگن.
کمال دېیدی: «بیزنینگ قرینداشلریمیزدن بیرینینگ یاش فرزندی اۉلدیریلگنیگه بیر نېچه آی بۉلدی. قاتلنی تاپیش اوچون کۉپ یۉل باسیلدی، اما هنوزگچه قاتل حبسگه آلینمهگن و عموماً انیقلنمهگن. قندهی قیلیب اولر کوندوزی آچیقچهسیگه قاتللیک یاکه اۉغریلیک قیلیشگه جرأت اېتیشهدی؟ طالبان شو بېش ییل دوامیده عامهوی اخبارات واسطهلریده و ییغیلیشلریده خوفسیزلیک تأمینلنگنینی اَیتماقده. خوفسیزلیک قهیېرده؟ بیز جانیمیز، مال-ملکیمیز و فرزندلریمیز ضرر کۉریشیدن قۉرقیب یشهیپمیز. خوفسیزلیک تأمینلنگن، اما اۉزلری اوچون؛ عادی خلق اوچون اېمس.»
نویده (مستعار)، اَیتیشیچه، سۉنگگی پیتلرده خوفسیزلیک بیلن باغلیق معمالر کۉپهیگن و آدملر بوندن ضرر کۉریب قالیشدن تاباره کۉپراق خواطرده. او شوندهی دېیدی: «بو کبی حادثهلر قنچه کۉپهیسه، آدملر اۉز جانلری و مال-ملکلری حقیده شونچه کۉپراق خواطرگه توشهدی و اۉزلرینی همده مال-ملکلرینی قندهی قیلیب ساغ-سلامت سقلب قالیش حقیده اۉیلهیدی.»
بو عیال شوندهی دېیدی: «اۉتگن ییلی مېن دوچ کېلگن واقعه آدملر گوجوم جای بۉلگن کۉته-سنگی بازاریده صادر بۉلدی. ایکّی نفر طالبان وکیلی بیر کیشینی اۉغریلیکده عیبلب، تعقیب قیلهیاتگن اېدی. او کیشی هم قورال بیلن قوراللنگن بۉلیب، طالبان وکیللری بیلن تۉقنهشدی. عادی آدملر ضرر کۉریشی احتمالی جوده کتّه اېدی. بوندهی حادثهلر کۉپهیگن، اما افسوس که اولرنینگ اکثریتی خبر قیلینمهیدی و عیناً شو مسأله خلقنینگ خواطرینی ینهده آشیرماقده.»
نعمت (مستعار) اَیتیشیچه، طالبان عامهوی اخبارات واسطهلرینی چېکلش آرقهلی مملکتده صادر بۉلهیاتگن جنایتلردن هېچ کیم خبردار بۉلمهیدی، دېب اۉیلهیدی. اونینگ سۉزلریگه کۉره، هر کونی یاشلرنینگ اۉلدیریلگنی حقیده خبرلر ترقهلماقده. او شوندهی دېیدی: «حاضرگچه شخصا طالبان بو قاتللیکلرنینگ بیرار عیبدارینی قۉلگه آلگنینی کۉرمهدیم. کیم و نیمه سببدن اۉلدیرهیاتگنی نامعلوم.» اونینگ اَیتیشیچه، باشقه تاماندن، اۉز جانیگه قصد قیلیش حالتلری هم کۉپهیگن و مملکت بایلیگی بۉلگن یاشلر هر کونی نابود بۉلماقده.
نعمت قۉشیمچه قیلهدی: «کیمنی دیر طالبان اۉز عیبلاولری بیلن اۉلدیرهدی، کیمنی دیر نامعلوم شخصلر اۉلدیرهدی، کیمدیر یۉل-ترانسپورت حادثهلریده هلاک بۉلهدی، ینه کیم دیر مهاجرت یۉلیده اۉلدیریلهدی.»
بو آرهده کاپیسا ولایتینینگ کوهستان تومنیدهگی محلی منبعلر ۸صبح گزېتهسیگه بېرگن صحبتیده اوشبو تومننینگ اَیریم حدودلریده خوفسیزلیک حالتی قریب بیر ییل دوامیده یامانلشگنینی اَیتگن. اولرنینگ سۉزلریگه کۉره، اویلرنینگ اۉغیرلنیشی و خوفسیزلیک بیلن باغلیق معمالر، اینیقسه تونگی وقتلرده، کۉپهیگن.
هرات شهریده هم اۉتگن آینینگ آخریده بیر قطار شهر اهالیسی ۸صبح گزېتهسیگه بېرگن صحبتیده خوفسیزلیکنینگ یامانلشگنی و خوفسیزلیک حالتی اوستیدن یېترلی نظارت یۉقلیگیدن شکایت قیلگن همده سۉنگگی آیلرده مقصدلی قاتللیکلر و آدم اۉغیرلاوچیلر تامانیدن شخصلرنینگ بېدرَک یۉقالیشی کۉپهیگنینی اَیتگن اېدی. منبعلرنینگ اَیتیشیچه، هراتدهگی خوفسیزلیک حالتی کوندن-کونگه خواطرلی توس آلماقده و اَیریم حاللرده آدملر اوّل بېدرَک یۉقالیب، بیر مدت اۉتگچ اولرنینگ جسدلری تاپیلماقده.
