کابلده قوراللی اۉغریلیکلرنینگ کۉپهییشی؛ اهالی خوفسیزلیک یۉقلیگی و حمایهسیزلیگیدن خواطر بیلدیرماقده
۸صبح
کابل شهرینینگ سکّیزینچی ناحیهسی حدودیدهگی اَیریم اهالی سۉنگگی کونلرده اویلریدن قوراللی اۉغریلیکلرنینگ کۉپهیگنیدن شکایت قیلماقده. اولر اۉغریلر گروه بۉلیب و اویوشگن طرزده تونده اویلرگه کیریب، آدملرنینگ مال-ملکینی آلیب کېتهیاتگنینی اَیتماقده. اولرنینگ سۉزلریگه کۉره، اَیریم حاللرده اۉغریلر اۉغریلیک وقتیده اوی ایچیدهگی آدملر بیلن تۉقنهشیب، اولرگه ضرر یېتکزماقده. اولر اویلرنینگ کیریش قِسمیگه خوفسیزلیک کمرهلری و یاریتیش چیراقلری اۉرنهتیلگنیگه قرهمهی، اۉغریلیکلر هنوز دوام اېتهیاتگنینی تأکیدلهماقده.
بو اهالی ۸صبح گزېتهسیگه اَیتیشیچه، خوفسیزلیک کمرهلریدهگی تصویرلرده اۉغریلر یوزینینگ تۉغری انیقلنمسلیگی، اۉغریلیک حالتلری بۉییچه ایشلرنینگ جدّی کۉریب چیقیلمسلیگی، قشّاقلیک، ایشسیزلیک و اَیریم اۉغریلرنینگ پول عوضیگه آزاد قیلینیشی اوشبو حادثهلرنینگ آلدینی آلیش جریانینی قیینلشتیرهیاتگن عامللردندیر. اهالینینگ اَیتیشیچه، اَیریم حاللرده اۉغریلر برق سیملرینی اوزیب، خوفسیزلیک کمرهلرینی ایشدن چیقرهدی و اۉغریلیک قیلیش اوچون قارانغولیکدن فایدهلنهدی. اولر برقنینگ اوزیلیشی کمره تصویرلرینی تېکشیریش و اۉغریلیککه علاقهدار شخصلرنی انیقلشنی هم قیینلشتیریشینی قۉشیمچه قیلماقده. اولرنینگ فکریچه، بو حالتنینگ دوام اېتیشی آدملرنینگ اویلری و مال-ملکی خوفسیزلیگی بارهسیدهگی خواطرینی آشیرگن.
کابل شهرینینگ سکّیزینچی ناحیهسیده یشاوچی میعالله، اوشبو ناحیهنینگ اَیریم حدودلریده تونگی اۉغریلیکلر کۉپهیگنینی، اۉغریلر گروه بۉلیب اویلرگه و تورلی حدودلرگه کیرهیاتگنینی اَیتهدی. او کۉچهلرده و یۉللرده آدملرنینگ تېلفونلرینی اۉغیرلش هم کوندوزی دوام اېتهیاتگنینی، اهالی خوفسیزلیک عاقبتلریدن خواطرده بۉلگنی سببلی اۉغریلیک حادثهلرینی خبر قیله آلمهیاتگنینی قۉشیمچه قیلهدی.
بو کابل اهالیسی شوندهی دېیدی: «کابلنینگ تورلی حدودلریده خوفسیزلیک پُستلری موجود بۉلیشیگه قرهمهی، تونگی اۉغریلیکلر هنوز دوام اېتماقده. اۉغریلر گروه بۉلیب اویلرگه کیرهدی، برق سیملری و آدملرنینگ مال-ملکینی آلیب کېتهدی، اَیریم حاللرده آدملرنینگ تېلفونلری هم آچیق کونده اۉغیرلنهدی. آدملر هم خوفسیزلیکلریدن خواطرده بۉلگنی سببلی بو حالتگه قرشی آواز چیقره آلمهیدی.»
سکّیزینچی ناحیهسی اهالیسیدن ینه بیری صدیقنینگ اَیتیشیچه، اۉغریلرنینگ تهدیدیدن قۉرقیش و اۉغریلیک ایشلری جدّی تعقیب قیلینمسلیگی اَیریم آدملرنینگ اۉغریلر اوستیدن شکایت قیلیشدن تیییلیشیگه سبب بۉلگن. اونینگ قۉشیمچه قیلیشیچه، شاه شهید، تپه نادرخان، شهدا، صالحین و قول حشمتخان، حدودلریده کېچه و کوندوز اۉغریلیک حالتلری صادر بۉلماقده و تېکشیروو پستلری موجودلیگیگه قرهمهی، طالباننینگ اوشبو حدودلرده تونگی ایلنیشلری عملگه آشیریلمهیدی. اونینگ اَیتیشیچه، اَیریم حاللرده اۉغریلر برق سیملرینی اوزیب، اۉغریلیک قیلیش اوچون قارانغولیکدن فایدهلنهدی و شو سببلی خوفسیزلیک کمرهلری هم اولرنینگ تصویرلرینی قید اېته آلمهیدی.
بو کابل اهالیسی شوندهی دېیدی: «اویلر خوفسیزلیگینی تأمینلش اوچون چیراقلر و خوفسیزلیک کمرهلرینی اۉرنهتگنمیز، اما الکتر اۉچگنیده کېینراق اۉغریلر برق سیمینی اوزیب، اۉزلری بیلن آلیب کېتگنینی بیلیب قالهمیز. طالباندن کمره تصویرلرینی تېکشیریشنی سۉرهگنیمیزده، اولر برق یۉقلیگینی بهانه قیلهدی. باشقه تاماندن، آدملر اۉغریلر اوستیدن شکایت قیلسه، حیاتلری خوف آستیده قالیشیدن قۉرقهدی.»
سکّیزینچی ناحیهسی اهالیسیدن ینه بیری میر افغاننینگ اَیتیشیچه، او سۉنگگی کونلرده شخصهن اۉغریلیک گواهی بۉلمهگن، اما دۉستلری و تنیشلریدن وېلوسیپېد و مابیل تېلفونلر اۉغیرلنگنی حقیده اېشیتگن. او اۉغریلیک ایشلری بۉییچه تعقیبنینگ ضعیفلیگی و اۉغریلرنی خوفسیزلیک کمرهلری آرقهلی انیقلشدهگی قیینچیلیکلر اوشبو حادثهلرگه مناسبت بیلدیریشدهگی اساسی معمالردن اېکنینی قۉشیمچه قیلهدی. میر افغان، شونینگدېک، اَیریم حاللرده اۉغریلیکده عیبلنگن شخصلر حبسگه آلینگنیدن کېین اَیریم خوفسیزلیک کوچلری بیلن کېلیشوو نتیجهسیده آزاد قیلینیشینی دعوا قیلهدی.
بو ییگیت شوندهی دېیدی: «کمرهلر اوزاق مصافهدن اۉغریلرنینگ یوزینی تۉغری انیقلهی آلمهیدی و اولرنی انیقلش اوچون اولرنینگ حرکتلنیشینی هم کوزهتیش کېرهک؛ اما بو جریان کۉپ وقت طلب قیلهدی و جدّی تعقیب قیلینمهیدی. اۉغریلر قانون قۉلیگه تاپشیریلمهگونچه، بو جریان دوام اېتهدی.»
اما کابلدهگی اۉغریلیک حالتلری فقط سکّیزینچی ناحیهسی بیلن چېکلنمهیدی و کابل شهرینینگ ۶- و ۱۳-ناحیهلری اهالیسی هم بوندهی حادثهلر صادر بۉلهیاتگنیدن شکایت قیلماقده.
کابلنینگ دارالامان حدودی اهالیسیدن بیری سلیمهنینگ اَیتیشیچه، سۉنگگی کونلرده اولرنینگ حدودیده اۉغریلیک کۉپهیگن و اۉغریلر تورلی اصوللر بیلن آدملرنینگ مال-ملکینی نشانگه آلماقده. او ایشسیزلیک و اقتصادی معمالر، اونینگ اَیتیشیچه، اۉغریلیکلرنینگ کۉپهییشیگه شرایط یرهتگن عامللردن اېکنینی قۉشیمچه قیلهدی.
سلیمه شوندهی دېیدی: «سۉنگگی پیتلرده اۉغریلیکلر کۉپهیگن. اوچ کېچه آلدین، تخمیناً ساعت ۹ ده، بیزنینگ کۉچهمیزدهگی بیر اوی هم اۉغیرلنگن، اما اۉغریلر آدملر خبردار بۉلگنینی سېزگچ، مال-ملکنی آلیب کېته آلمهی، قاچیب کېتگن. آدملر اقتصادی معمالر و ایشسیزلیک بیلن یوزمه-یوز توریبدی، کۉپلب عایلهلرنینگ حیات شرایطی آغیرلشگن.»
طالبان کابلنی قَیته اېگهللهگنیدن سۉنگ، افغانستان بۉیلب، اینیقسه پایتختده «برقرار خوفسیزلیک» اۉرنهتیلگنی حقیده بیر نېچه بار گپیرگن.
بو خواطرلر بیرلشگن ملتلر تشکیلاتی باش کاتبی اۉزینینگ ینگی حساباتیده ۱-میدن ۳۱-جولایگچه بیرلشگن ملتلر تشکیلاتی خوفسیزلیک مسالهلری بیلن باغلیق ایکی مینگ و ۹۴۷ ته حادثهنی قید اېتگنینی بیلدیرگن بیر پیتده بیلدیریلماقده. بو کۉرسهتکیچ اۉتگن ییلنینگ شو دوریگه نسبتاً ۱۱ فایزگه آشگنینی کۉرسهتهدی.
