اۉز جانیگه قصد قیلیش، قاتللیک و اۉغیرلش حالتلرینینگ کۉپهییشی؛ خوفسیزلیکنینگ یۉقلیگی و قشّاقلیک اهالی حیاتیگه تهدید سالماقده
امین کاوه
۸صبح گزېتهسینینگ انیقلشیچه، سۉنگگی کونلرده مملکتده اۉز جانیگه قصد قیلیش، سِرلی قاتللیکلر و بالهلرنی اۉغیرلش حالتلری کۉپهیگن. اوشبو گزارش معلوماتلریگه کۉره، فقط اۉتگن کون اوچ ولایتده اوچ کیشی اۉز جانیگه قصد قیلگن. اۉتگن بیر هفته دوامیده کابل، خوست، هرات، بادغیس و فاریاب ولایتلریده کمیده تۉقّیز کیشی سِرلی طرزده اۉلدیریلگن بۉلیب، اولردن اوچ نفری اۉتگن کون اۉلدیریلگن. شونینگدېک، سۉنگگی اوچ کون ایچیده کنر ولایتیده یېتّی باله بېدرَک یۉقالگن، هراتده اېسه اۉغیرلب کېتیلگن ایکّی بالهنینگ جسدی تاپیلگن. حالبوکه، فقط سنبله آیینینگ بیرینچی هفتهسیده ۱۰ ولایتده ۲۲ کیشی سِرلی طرزده اۉلدیریلگن اېدی.
طالباننینگ خوفسیزلیکنی تأمینلهگنی حقیدهگی دعوالریگه قرهمهی، مملکت وطنداشلری سِرلی قاتللیکلر، قوراللی تالانچیلیکلر و کېنگ ترقهلگن قشّاقلیک همده ایشسیزلیک آرتیدن اۉز جانیگه قصد قیلیش حالتلرینینگ کۉپهییشیدن خواطر بیلدیرماقده. مملکت اهالیسی اَیتیشیچه، طالبان خوفسیزلیکنی تامینلشگه قادر اېمسلیگیدن تشقری، مملکتده قشّاقلیک و ایشسیزلیکنینگ کۉپهییشیگه سبب بۉلگن و بو وضعیت، اینیقسه یاشلر آرهسیده، اۉز جانیگه قصد قیلیش حالتلرینینگ آشیشیگه آلیب کېلگن.
بیر کونده اوچ کیشینینگ اۉز جانیگه قصد قیلیشی
۸صبح تامانیدن اعلان قیلینگن خبرلرگه کۉره، خوست ولایتیده یاشلر و اۉسمیرلر آرهسیده اۉز جانیگه قصد قیلیش حالتلری باشقه ولایتلرگه قرهگنده کۉپهیگن. خوست اهالیسی قشّاقلیک، ایشسیزلیک و طالباننینگ باسیملرینی اوشبو حادثهلرنینگ اساسی عامللری دېب بیلیب، یاشلر حیاتلرینینگ سۉنگگی چیزیغیگه یېتیب کېلگنینی اَیتماقده. گزارش انیقلشیچه، فقط سنبله آیینینگ اۉزیده بو ولایتده آلتی کیشی اۉز جانیگه قصد قیلگن.
سۉنگگی حالتده خوست ولایتیدن فیضالله اسملی ییگیت ایرانگه ناقانونی یۉل بیلن باریش اوچون پولی بۉلمهگنی سببلی اۉز جانیگه قصد قیلگن. منبعلرگه کۉره، بو ییگیت اۉتگن کون خوست ولایتینینگ مندوزی تومنیده اۉز جانیگه قصد قیلگن.
منبعلر قۉشیمچه قیلیشیچه، فیضاللهنینگ دۉستلری ایرانگه ناقانونی یۉل بیلن باریش اوچون یۉلگه چیققن، بیراق او سفر خرجتیگه پولی بۉلمهگنی سببلی اولر بیلن باره آلمهگن و اولرنینگ کېتگنیدن خبر تاپگچ، اۉز جانیگه قصد قیلگن.
شو بیلن بیرگه، اۉتگن کون اجتماعی ترماقلرده بیر ییگیت اۉزینی تانکر موتری آستیگه تشلهیاتگنی عکس اېتگن ویدیو ترقهلدی. منبعلرگه کۉره، بو حادثه کابل شهرینینگ کمپنی حدودیده یوز بېرگن.
شونینگدېک، اۉتگن کون فراه ولایتیده بیر ییگیتنینگ آسیلگن جسدی تاپیلگن. منبعلرگه کۉره، بو ییگیت عبدالمتین اسملی بۉلگن و فراه ولایتی مرکزیده اۉزینی آسگن.
سِرلی قاتللیکلرنینگ کۉپهییشی
منبعلر شنبهگه اۉتر کېچهسی خوستده بیر ییگیت آتیشمه عاقبتیده هلاک بۉلگنینی اَیتماقده. منبعلرگه کۉره، بو ییگیت عثمان اسملی بۉلگن و خوست مرکزیدهگی مانی قیشلاغیده اۉلدیریلگن. عثماننینگ قندهی قیلیب اۉلدیریلگنی حقیده باشقه معلومات یۉق.
بو آرهده شعیب اسملی ییگیتنینگ یقینلری اونینگ کابلدهگی چهلستون حدودیده مخدره مادّهلر ساتووچیلری تامانیدن اۉلدیریلگنینی اَیتماقده. شعیبنینگ یقینلری اَیتیشیچه، طالبان قاچاقچیلر و مخدره مادّهلر ساتووچیلرینی قۉلگه آلیشده عاجز و شو سببلی آدملر اۉغریلر همده مخدره مادّهلر ساتووچیلرینینگ اۉلجهسیگه اَیلنماقده. اولر شعیبنی اۉلدیرگن شخص واقعه جاییدن قاچیب کېتگنینی، اونینگ آتهسی و اکهسی اېسه طالبان تامانیدن حبسگه آلینگنینی اَیتماقده.
شونینگدېک، اۉتگن هفته هرات ولایتینینگ انجیل تومنیدهگی شادیجان قیشلاغیده بیر اېرکک اۉلدیریلگن. منبعلرگه کۉره، بو اېرکک سَیر قیلیش اوچون حدودگه کېلگنیدن سۉنگ اۉلدیریلگن. منبعلر قۉشیمچه قیلیشیچه، اېرکک اۉلدیریلگندن کېین اونینگ جسدی یاقیب یوباریلگن.
اوشبو قاتللیکلر دوامیده بادغیس ولایتی مرکزی قلعهنو شهریده حسامالدین اکبری اسملی تیش دوکتوری قوراللی شخصلر تامانیدن اۉلدیریلگن. منبعلرگه کۉره، او یکشنبه کونی قلعهنو شهرینینگ بیرینچی حدودیگه قرهشلی «جر خشک» حدودیده اۉلدیریلگن. او رسمی وظیفهسیدن تشقری ستوماتولوژی کلینیکیگه هم اېگه اېدی.
شونینگدېک، اۉتگن هفته کابلده سابق حکومتنینگ بیر قاضیسی و بیر کېکسه اېرکک، قندهارده بیر اېرکک، خوستده بیر باله و فاریابده بیر باله اۉلدیریلگن. اوشبو حادثهلرنینگ هېچ بیری بۉییچه گمانلنووچیلر قۉلگه آلینمهگن.
حالبوکه، فقط سنبله آیینینگ بیرینچی هفتهسیده ۱۰ ولایتده ۲۲ کیشی سِرلی طرزده اۉلدیریلگن. ۸صبح گزارشینینگ انیقلشیچه، بو شخصلر کابل، هرات، بادغیس، بغلان، تخار، پکتیکا، پکتیا، فاریاب، بلخ و غزنی ولایتلریده سِرلی طرزده اۉلدیریلگن.
اۉتگن بیر هفته دوامیده بالهلرنینگ اۉغیرلنیشی و اۉلدیریلیشی
منبعلر اۉتگن کون هراتدن ۸صبحگه اَیتیشیچه، اوشبو ولایتنینگ غوریان تومنیده بېش و یېتّی یاشلی ایکّی بالهنینگ جسدی تاپیلگن. منبعلرگه کۉره، بو ایکّی بالهنینگ اسمی خالد و ادریس بۉلیب، اولر اکه-اوکه بۉلگن. منبعلر قۉشیمچه قیلیشیچه، بو ایکّی باله بیر هفتهدن کم وقت آلدین بېدرَک یۉقالگن اېدی. منبعلرگه کۉره، بالهلرنینگ جسدلری غوریان تومنیده آلیب باریلگن قیدیروولردن سۉنگ تاپیلگن.
بو آرهده شنبه کونی کنر ولایتیدهگی منبعلر اوشبو ولایتده یېتّی بالهنینگ جماعهوی طرزده اۉغیرلب کېتیلگنی حقیده خبر بېرگن. منبعلرگه کۉره، بو بالهلر شنبه کونی توشدن آلدین کنر مرکزی اسعدآبادگه قرهشلی نوآباد حدودیده اۉغیرلب کېتیلگن. طالبان هم بو حادثهنی تصدیقلب، اۉغیرلب کېتیلگن بالهلر تۉرت قیز و اوچ اۉغیلدن عبارت بۉلگنینی همده اولرنینگ یاشی تۉرت یاشدن ۱۰ یاشگچه اېکنینی بیلدیرگن.
بوندن آلدین بیرلشگن ملتلر تشکیلاتی باش کاتبی اوشبو تشکیلات خوفسیزلیک کېنگشیگه تقدیم اېتگن حساباتیده ۱-میدن ۳۱-جولایگچه بیرلشگن ملتلر تشکیلاتی خوفسیزلیک مسألهلری بیلن باغلیق ۲ مینگ ۹۴۷ ته حادثهنی قید اېتگنینی اَیتگن اېدی. بو اۉتگن ییلنینگ شو دوریگه نسبتاً ۱۱ فایزگه آشگنینی کۉرسهتهدی.
