بیرلشگن ملتلر تشکیلاتی: طالبان مخالف جبههلری سۉنگگی اوچ آیده ۸۸ ته هجوم عملگه آشیرگن
۸صبح، کابل: بیرلشگن ملتلر تشکیلاتینینگ ینگی حساباتیگه کۉره، طالبان مخالف جبههلری می آییدن جولای آییگچه بۉلگن دورده افغانستاننینگ ۲۱ ولایتیده ۸۸ ته هجوم اوچون جوابگرلیکنی اۉز ذمّهسیگه آلگن.
بیرلشگن ملتلر تشکیلاتی اوشبو حساباتیده مذکور هجوملرنینگ ۵۵ تهسینی تصدیقلهگنینی و جولای آییده طالبان مخالفلرینینگ هجوملری سانی ۳۰ تهگه یېتگنینی بیلدیرگن.
حساباتگه کۉره، افغانستان آزادلیک جبههسی، ملی مقاومت جبههسی، یشیل جریان، وطن سپاهیلری جبههسی، افغانستان مستقللیک جبههسی، جمهوریت جبههسی، افغانستان بیرلشگن جبههسی، اندراب قرشیلیک جبههسی، آزادلیک و عدالت حرکتی، افغانستان خلقی اسلامی آزادلیک جبههسی، افغانستان خلقی اسلامی آزادلیک حرکتی و ملی انسجام جبههسی اوشبو هجوملر اوچون جوابگرلیکنی اۉز ذمّهسیگه آلگن.
حساباتنینگ بیر قِسمیده اَیتیلیشیچه، اوشبو دورده طالبان مخالفیدهگی قوراللی گروهلر ینهده ترقاق و مرکزلشمهگن حالگه کېلگن همده اولرنینگ فعالیتی اساسا محلی حدودلرگه قرهتیلگن.
بو هجوملر اساسا طالبان کوچلرینینگ نظارت-اۉتکزیش پستهلری و اوشبو گروهنینگ حربی انشااتلریگه پیستیرمه و هجوملردن عبارت بۉلگن.
وطن سپاهیلری جبههسی ۱۷-جولای کونی بدخشاننینگ ییفتل پایین تومنیدهگی اداری بنالرنی قیسقه مدتگه اېگهللهگن و کېینچهلیک اوشبو بنالردن چېکینگن.
شونینگدېک، افغانستان آزادلیک جبههسی ۲۴-جولای کونی بدخشاننینگ زیباک تومنیده طالبان خوفسیزلیک کوچلرینینگ نظارت-اۉتکزیش پستهسیگه هجوم قیلگن.
طالبان امر باالمعروف و نهی عن المنکر وزیرلیگی کوچلری هم ۱۲-جون کونی هراتده و ۲۲-جون کونی کابلده هجومگه اوچرهگن.
