ایران عامه‌وی اخبارات واسطه‌لری منطقه‌ده‌گی امریکا بَزه‌لریگه ایران کوچلری تامانیدن راکت هجوملری عملگه آشیریلگنی حقیده خبر بېرماقده
ایران عامه‌وی اخبارات واسطه‌لری خبر بېریشیچه، اوشبو مملکت اسلامی انقلاب قوریقچیلری اردن‌نینگ «الارزق» حدودیده، بحرین و کویتدهگی امریکا حربی هوا بزه‌لری همده امریکا اوردوسی نینگ باشقروو مرکزلرینی راکت هجوملری بیلن نشانگه آلگن.
فارس اخبارات آژانسی، چهارشنبه کونی، ۱۰ جون، ترقه‌تگن خبرگه کۉره، اسلامی انقلاب قوریقچیلری اردن‌ده‌گی امریکا حربی هوا بزه‌سی و باشقروو مرکزیده جایلشگن تۉرت ته مهم نشاننی راکت هجوملری بیلن اورگن.
خبرگه کۉره، ایران کوچلری امریکا بزه‌لریگه قرشی هجوملر قتّیق یاقیلغیلی راکت‌لر بیلن عملگه آشیریلگنینی بیلدیرگن.
ایران مملکت اسلامی انقلاب قوریقچیلری شونینگدېک، اوشبو هجوملرده اردن‌ده‌گی امریکا حربی هوا بزه‌سی نینگ «اف-۳۵» قیرووچی اوچاقلری هم نشانگه آلینگنینی دعوا قیلگن.
ایران کوچلری بیاناتیده ایتیلیشیچه: «دېنگیز کوچلری جنگچیلری ساعت تانگ چاغی ساعت ۲:۳۰ده بحرین نینگ بېشینچی دېنگیز مرکزی وکویت‌ده‌گی علی‌السالم بزه‌سیگه درونلر بیلن هجوم قیلگن.»
بو شونده‌ی بیرحالده دیر که بوگون تانگده امریکا اوردوسی نینگ مرکزی قوماندانلیگی (سنتکام) ایرانده‌گی بیر نېچه نقطه‌لرگه هجوم قیلینگنی حقیده خبر بېرگن.
سنتکام نینگ ایتیشیچه، اوشبو هوا هجوملری ایران کوچلری تامانیدن امریکانینگ بیر دانه «آپاچی» تیک اوچری اوریب توشیریلیشیگه جوابا عملگه آشیریلگن.
