اوچا: تورخم چېگره‌سی یقینیده‌گی تۉقنه‌شوولر تینچ اهالی‌نینگ حیاتیگه خوف سالماقده
۸صبح، کابل: بیرلشگن ملتلر تشکیلاتی‌نینگ انسانپرورلیک یاردملرینی موافقلشتیریش باشقرمه‌سی (اوچا) تورخم چېگره‌سی یقینیده باشلنگن ینگی تۉقنه‌شوولر انسانپرورلیک یاردم خادملری، جمله‌دن، تینچ اهالی‌نینگ حیاتیگه خوف ساله‌یاتگنینی معلوم قیلدی.
اوشبو تشکیلات جمعه کونی، ۸ عقرب، چهارشنبه کونگی تۉقنه‌شوولرده بیر باله جان بېرگنی و بیر کیشی انسانپرورلیک یاردم خادیمی یره‌لنگنینی خبر قیلدی.
اوچا‌‌نینگ اَیتیشیچه، بو حدودده تۉقنه‌شوولر‌نینگ تکرارلنیشی محلی اهالی یشه‌یدیگن حدودلر خوفسیزلیگیگه هم تهدید سالماقده.
بو تۉقنه‌شوولر پاکستاندن قَیته‌یاتگن افغانلر تورخم چېگره‌سی آرقه‌لی افغانستانگه کیریب کېله‌یاتگن بیر پیتده دوام اېتماقده.
اوچا اوشبو حدودده‌گی تۉقنه‌شوولر دوام اېتیشی تینچ اهالینی ینه‌ده کتّه خوف-خطرلرگه دچار اېتیشی حقیده آگاهلنتیردی.
بو بیاناتلر افغانستان وطنداشلری‌نینگ پاکستاندن قَیتیشی و مجبوری دېپورت قیلینیشی دوام اېته‌یاتگن، هر کونی کۉپلب عایله‌لر تورخم چېگره‌سی آرقه‌لی مملکتگه کیریب کېله‌یاتگن بیر شرایطده ینگره‌ماقده.
